އިނގިރޭސިވިލާތައް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ލީޑްސް ޔުނިވަރސިޓީއަށް ޒިޔާރަތްކުރައްވާފައެވެ.
މި ޒިޔާރަތަކީ ދިވެހިރާއްޖެއާއި އެ ޔުނިވަރސިޓީއާ ދެމެދު އެއްބާރުލުމުގެ ފުރުޞަތުތައް ހޯދުމަށް ކުރެއްވި ޒިޔާރަތެކެވެ.
ރައީސަށް މަރުޙަބާ ދެންނެވީ އެމްޕީ އެލެކްސް ސޯބެލް އަދި ލީޑްސް ޔުނިވަރސިޓީގެ ޕްރޮވޯސްޓް އަދި ޑެޕިއުޓީ ވައިސް-ޗާންސެލަރ ޕްރޮފެސޕްރޮފެސަރ ހައި-ސުއި ޔޫއެވެ.
ރައީސަކީ ލީޑްސް ޔުނިވަރސިޓީގެ ފާހަގަކޮށްލެވޭ ދަރިވަރެކެވެ. އަދި ރައީސް ވަނީ 2009 ވަނަ އަހަރު ސިވިލް އިންޖިނިއަރިންގ ދާއިރާއިން އެޔުނިވާސިޓީން ޕީއެޗްޑީ ހާސިލުކުރައްވާފައެވެ.
1904 ވަނަ އަހަރު ޤާއިމުކުރެވުނު ލީޑްސް ޔުނިވަރސިޓީއަކީ އިނގިރޭސިވިލާތުގެ އެންމެ ޝަރަފުވެރި އެކަޑަމިކް މުއައްސަސާތަކުގެ ތެރެއިން އެއް މުއައްސަސާއެވެ. މި ޔުނިވަރސިޓީއަކީ ރިސަރޗްގެ ދާއިރާއިން ތަފާތު ޚާއްޞަ ކާމިޔާބީތަކެއް ހޯދާފައިވާ އަދި ދުނިޔޭގެ ފެންވަރުގައި ވަރަށް މަޝްހޫރު ޔުނިވަރސިޓީއެކެވެ.