ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިހާރު އިނގިރޭސިވިލާތައް ކުރައްވާ ދަތުރުފުޅުގައި ފުޓްބޯޅަ ފޯ ޕީސްއާއެކު ބައިވެރިވެވަޑައިގަންނަވައިފިއެވެ.
ރައީސަށް މަރުޙަބާ ދެންނެވުމުގައި ފުޓްބޯޅަ ފޯ ޕީސްގެ މުހިންމު ފަރާތްތަކުން ބައިވެރިވެ ވަޑައިގަތެވެ. މީގެ ތެރޭގައި އެ ޖަމްޢިއްޔާގެ ބާނީއާއި ކުރީގެ ޕްރޮފެޝަނަލް ފުޓްބޯޅަ ކުޅުންތެރިއެއް ކަމުގައިވާ މިސްޓަރ ކާޝިފް ސިއްދީޤީއާއި، ބްރެޑްފޯޑް ސިޓީ އޮފް ކަލްޗަރ 2025 ގެ ސީއީއޯ މިސް ޝަހްނާޒް ގުލްޒާރު ހިމެނެއެވެ.
މި ހަރަކާތުގައި، ރައީސަށް ޔުނިވަރސިޓީގެ ޕީސް ސެންޓަރާއެކު ފުޓްބޯޅަ ފޯ ޕީސްއިން ހިންގާ ހަރަކާތްތަކާ ބެހޭ މަޢުލޫމާތު ދެވުނެވެ. އަދި ރައީސް ފުޓްބޯޅަ ދަނޑުތަކަށް ޒިޔާރަތްކުރައްވައި، އެވަގުތު އެތަނުގައި ތަމްރީނުކުރަމުންދިޔަ ޒުވާނުންނާ ބައްދަލުކުރެއްވިއެވެ.
2013 ވަނަ އަހަރު އުފެދުނު ފުޓްބޯޅަ ފޯ ޕީސްއަކީ، ޔުނައިޓެޑް ނޭޝަންސް އޮފީސް ފޯ ސްޕޯޓް ފޯ ޑިވެލޮޕްމަންޓް އެންޑް ޕީސްގެ އެހީތެރިކަން ލިބިގެން ހިންގާ، ފުޓްބޯޅަ މެދުވެރިކޮށް އިޖްތިމާޢީ މައްސަލަތައް ހައްލުކުރުމަށް ޒުވާނުން ބާރުވެރިކުރުވުމަށް މަސައްކަތްކުރާ ފާހަގަކޮށްލެވޭ ބައިނަލްއަޤްވާމީ މަދަނީ ޖަމްޢިއްޔާއެކެވެ.
ފުޓްބޯޅަ ފޯ ޕީސްއިން ސުލްޙަ ކުރިއެރުވުމާއި، އިޖްތިމާޢީ ގޮތުން އެކުލެވިގެންވުން އިތުރުކުރުމާއި، ތަފާތު ބައްރުތަކުން އަންނަ މީހުން ކުޅިވަރު ޑިޕްލޮމަސީއާއި މަޙައްލީ ޕްރޮގްރާމްތައް މެދުވެރިކޮށް ގުޅުވައިދީ އެކުގައި މަސައްކަތްކުރުމަށް މަގުފަހިކޮށްދެއެވެ. މި މުބާދަރާތުން އަދިވެސް ފަރަގު ބޮޑު މުޖުތަމަޢުތައް ބާރުވެރިކުރުވައި، ޒުވާނުންނަށް ގުޅިގެން މަސައްކަތްކުރުމާއި ހަމަނުޖެހުން ހައްލުކުރުމުގެ ހުނަރު ދަސްކޮށްދެއެވެ. އެމީހުންގެ ހެޔޮއެދޭ މެޗުތަކާއި ތަމްރީނު ޕްރޮގްރާމްތަކުން ކުޑަކުދިންނާއި، ކޯޗުންނާއި، ޓީމު މެނޭޖަރުންނަށް ބޭނުންވާ ހުނަރުތައް ދަސްކޮށްދިނުމުގައި ދުނިޔޭގެ ފެންވަރުގައި އަސަރުފޯރުވަމުން ގެންދެއެވެ.