ރާއްޖޭގެ ފަތުރުވެރިކަން އިޝްތިހާރުކުރަން ލިވަޕޫލް ފުޓްބޯޅަ ކުލަބާއިއެކު ވެވުނު އެއްބަސްވުމުގެ ތެރެއިން ކުޅެވުނު ފުރަތަމަ މެޗުގައި އެޓީމުން އެވަޓަން ބަލިކޮށް އިނގިރޭސި ޕްރިމިއަރ ލީގުގެ ތަށި ހޯދުމާއި ކައިރިވެއެޖެއެވެ.
ދެޓީމުންވެސް ރަނގަޅު ކުޅުމެއް ދެއްކި މިމެޗުގެ ހަމައެކަނި ގޯލު ކާމިޔާބުކޮށްފައިވަނީ ލިވަޕޫލްގެ ޑިއޯގޯ ޖޯޓާއެވެ.
އެވަޓަންއިން ގޯލެއް ކާމިޔާބު ކުރިނަމަވެސް އެގޯލު ވަނީ ވީއޭއާރު އިން އޮފްސައިޑް ކަމަށް ނިންމައި ބާތިލްކޮށްފައެވެ.
މީގެ އިތުރުން އެވަރޓަންގެ ޑިފެންޑަރ ޖޭމްސް ޓާކޮވްސްކީ ލިވަޕޫލްގެ އެލެކްސިސް މެކް އެލިސްޓާ އަށް ކުރި ނުރައްކާ ޓެކުލްވެސް މިމެޗުގައި ފާހަގަކުރެވުނެވެ. ނުރައްކާތެރި މި ފައުލަށް ރެފްރީ ހަމައެކަނި ރީނދޫ ކާޑެއް ދެއްކި ނަމަވެސް މި އީ ރަތް ކާޑު ދައްކަން ޖެހޭ ފައުލެއްކަމަށް ގިނަ ބަޔަކު ދެކުއެވެ.
ލިވަރޕޫލް އަދި އެ ޓީމުގެ ސަޕޯޓަރުން ވަނީ ދެވަނަ ބައިގައި ކުޅުން ހަލުވިކުރަން މަސައްކަތްކޮށްފައެވެ. އަދި ރަޔާން ގްރޭވެންބާޗްގެ ވަރުގަދަ ޝޮޓެއް ޕިކްފޯޑް ވަނީ ދުރަށް ޖައްސާލާފައެވެ. ނަމަވެސް ޖޯޓާގެ 56 ވަނަ މިނެޓުގެ ގޯލުން ތަފާތު ގެނެސްދިނެވެ.
އިނގިރޭސި ޕްރިމިއަރ ލީގުގައި ލިވަޕޫލަށް ބާކީ 8 މެޗު ކުޅެއް އޮތް އިރު މިމެޗުތަކުން ލިބެންޖެހޭ 24 ޕޮއިންޓްގެ ތެރެއިން 13 ޕޮއިންޓް ހޯދައިގެން އެޓީމަށް ޗެމްޕިއަންކަން ޔަޤީން ކުރެވޭނެއެވެ.