ފަތުރުވެރިކަމުގެ ދާއިރާގައި ނަޒާހަތްތެރިކަން އިތުރުކޮށް ކޮރަޕްޝަނާއި ދެކޮޅަށް މަސައްކަތްކުރުމަށް ޚާއްސަ ފޯރަމެއް ސައުދީ އާއި ގުޅިގެން ރާއްޖޭގައި ބާއްވަން ނިންމައިފިއެވެ.
ދިވެހި ރާއްޖޭގެ ވިލާ ނައުޓިކާ ރިސޯޓުގައި މެއި މަހުގެ 6 ވަނަ ދުވަހުން 7 ވަނަ ދުވަހުގެ ނިޔަލަށް ކުރިޔަށްގެންދާ މިފޯރަމްއަކީ އައިއޯސީ (އިންޓަރނޭޝަނަލް އޯގަނައިޒޭޝަން އޮފް އިސްލާމިކް ކޯޕަރޭޝަން) ގެ ގައުމުތަކަށް ޚާއްސަކޮށްގެންނެވެ.
މި ފޯރަމް އިންތިޒާމުކުރަނީ، ރާއްޖޭގެ އެންޓި ކޮރަޕްޝަން ކޮމިޝަން (އޭސީސީ) އާއި ސައުދީގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީ ގުޅިގެންނެވެ. އަދި މިފޯރަމް ކުރިޔަށް ދާނީ ”ސައުދީ މޯލްޑިވްސް އިންޓަނޭޝަނަލް ފޯރަމް އޮން އިންޓެގްރިޓީ“ ގެ ނަމުގައި، ދެ ދުވަހުގެ މުއްދަތަށެވެ.
އިސްލާމީ ޤައުމުތަކުގެ އިސްވެރިންނާއި، ސިޔާސަތު ކަނޑައަޅާ ފަރާތްތަކާއި، އަދި ފަތުރުވެރިކަމުގެ ސިނާޢަތުގެ މާހިރުން އެއްތަނަކަށް ގެނެސްގެން ކުރިޔަށްގެންދަން ނިންމާފައިވާ މި ފޯރަމްގައި، ފަތުރުވެރިކަމުގެ ދާއިރާގައި ކޮރަޕްޝަން ހުއްޓުވުމަށް އައު އުކުޅުތަކާއި ސްޓްރެޓެޖީތައް ބޭނުން ކުރުމާ ގުޅޭ ގޮތުން މަސައްކަތްކުރަން ހަމަޖެހިފައިވެއެވެ.
މިފޯރަމާ ގުޅޭ ގޮތުން މައުލޫމާދެއް ދެއްވަމުން ޕީއެސްއެމްގައި، އޭސީސީގެ ޑިރެކްޓަރ އޮފް ޕްރިވެންޝަން ފާތިމަތު އިބްނާ ވިދާޅުވީ، މި ފޯރަމްގައި ގާތްގަނޑަކަށް 50 އޯއައިސީގެ ގައުމުން ބައިވެރިވާނެ ކަމަށެވެ. ސެޝަންތަކަކަށް ބަހާލައިގެން ބާއްވާ ފޯރަމްގައި، އިސްލާމީ ގިނަ ގައުމުތަކެއްގެ އިސްފަރާތައް ވާހަކަ ދައްކަވާނެއެވެ. އޭގެ ތެރޭގައި ރާއްޖޭގެ އޭސީސީގެ ރައީސް އާދަމް ޝާމިލް އާއި ސައުދީގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީގެ ރައީސް، މާޒިން ބިން އިބްރާހިމް އަލް ޚަމޫސް ހިމެނެއެވެ.
މީގެ އިތުރުން އިސްލާމީ ގައުމުތަކުގެ ބައެއް ވަޒީރުން އަދި ތަންފީޒީ އިދާރާތަކުގެ އިސްފަރާތްތައް، ފަތުރުވެރިކަމުގެ ދާއިރާގައި ހުރި ކޮރަޕްޝަންގެ ހިރާސްތައް، އަދި އެ ހިރާސްތަކުން އަރައިގަތުމާ ގުޅޭގޮތުން މިފޯރަމްގައި މަޝްވަރާ ކުރާނެއެވެ.
މި ފޯރަމުގައި ޔޫއެންޑީޕީގެ ފަރާތުން ވަރަށް ޚާއްސަ ޕެނަލް ޑިސްކަޝަނެއް ބޭއްވުމަށް ހަމަޖެހިފައިވެއެވެ. އިންޓަރޕޯލް، ވޯލްޑް ބޭންކް އަދި އދ. ގެ، ކޮރަޕްޝަންގެ ހިރާސްތައް ނައްތާލުމުގެ މާހިރުން، ފޯރަމުގެ ބައިވެރިންނަށް ފަތުރުވެރިކަމުގެ ދާއިރާގައި ހިނގާ މުޢާމަލާތްތަކުގައި ކޮރަޕްޝަން ނައްތާލުމަށް ބޭނުންކުރެވިދާނެ އެކި ބާވަތުގެ ވަސީލަތްތަކާއި، ނިޒާމުތަކާއި އަދި ގޮތްތަކުގެ މައުލޫމާތު ދޭނެއެވެ.
ކޮރަޕްޝަނުގެ ކުށްތައް ގުޅިފައިވަނީ އިގްތިސާދާކަމާއި، ރާއްޖޭގެ އިގްތިސާދުގެ އެންމެ ބޮޑުބައެއް ހިއްސާކުރަނީ ފަތުރުވެރިމުގެ ދާއިރާ ކަމަށްވާއިރު، މި ފޯރަމްގެ ސަބަބުން ކޮރަޕްޝަނާ ދެކޮޅަށް ކުރާ މަސައްކަތްތައް ހަރުދަނާކުރުމަށް ރާއްޖެއަށް ފުރުސަތުތަކެއް ފަހިވެގެންދާނެ ކަމަށް އިބްނާ ވިދާޅުވިއެވެ. އަދި މިއީ އިސްލާމީ ގައުމުތަކާ އެކި ދާއިރާތަކުން ގުޅުންބަދަހިކުރުމަށް ލިބޭ ފުރުސަތެއްކަމުގައި އިބްނާ ފާހަގަކުރެއްވިއެވެ.
މި ފޯރަމްގައި އޮންލައިންކޮށް ބައިވެރިވުމުގެ ފުރުސަތު ވެސް ވަނީ ހުޅުވާލައިފައެވެ. އެގޮތުން މި ފޯރަމަށް ޚާއްސަކޮށް ތައްޔާރުކޮށްފައިވާ ވެބްސައިޓުން ( https://registration.ifi.org.mv) ބައިވެރިވުމަށް ރަޖިސްޓްރީ ކުރެވޭނެއެވެ. ފޯރަމުގެ އެޖެންޑާ ވެސް ހިމެނޭހެން، ފޯރަމާ ގުޅޭ ގިނަ މައުލޫމާތުތަކެއް މި ވެބްސައިޓުން ލިބޭނެއެވެ.