މުހިންމު ބަދަލުތަކަކާއެކު ޢީދު ބައިބަލާ ޗެލެންޖް 1446 މިރޭ ފެށުމަށް ފުރިހަމައަށް ތައްޔާރު ވެފައިވާކަމަށް، ބައިބަލާ އެސޯސިއޭޝަން އޮފް މޯލްޑިވްސްއިން ހާމަކޮށްފިއެވެ.
އެގޮތުން ހުޅުމާޅެ ފޭސް އެކެއްގައި މިރޭ ފެށުމަށް ހަމަޖެހިފައިވާ މުބާރާތުގެ ގުރުނެގުން ބާއްވާފައިވަނީ މިދިޔަ ހޮނިހިރު ދުވަހުއެވެ.
މި މުބާރާތުގައި ޖުމަލް ޖުމްލަ 29 ޓީމު ބައިވެރިވާއިރު، ފުރަތަމަ މެޗުގައި ކުޅޭނީ އެންމެ ފަހުގެ ޗެމްޕިއަން ބުރު ސްޕޯޓްސް ކުލަބާއި، ޓީއެފްޓީ އެވެ. މިދިޔަ އަހަރުގެ މުބާރާތުގެ ރަނަރަޕް، ކުލަބް ކާސިންޖީ، އެޓީމުގެ ފުރަތަމަ މެޗުގައި ނިކުންނާނީ ޓީނޭޖް ވެޓެރަންސްއާ ދެކޮޅަށެވެ.
ބައިބަލާ ޗެލެންޖް މުބާރާތުގެ އިވެންޓް މެނޭޖަރ، ސްޓޭޖް ކޯ އިން މި މުބާރާތަށް ތައްޔާރުކުރާ ސެޓަޕަކީ، ރާއްޖޭގެ ކުޅިވަރުގައި މިހާތަނަށް ފެނިގެންދާނެ އެންމެ ފުރިހަމަ ސެޓަޕްކަމަށް ބައިބަލާ އެސޯސިއޭޝަނުން މައުލޫމާތުދެއެވެ. އަދި ހުރިހާ ގޮތަކުންވެސް މިފަހަރުގެ މުބާރާތް ވެގެންދާނީ މީގެ ކުރީ އަހަރުތަކަށްވުރެ ފޯރިގަދަ، ފެންވަރު ރަނގަޅު މުބާރާތަކަށް ކަމުގައިވެސް އެ އެސޯސިއޭޝަނުން ބުނެއެވެ.
ޓީމުތަކުންވެސް ދަނީ މިފަހަރުގެ މުބާރާތަށް ވަރަށް ފުރިހަމައަށް ތައްޔާރުވަމުންނެވެ. އެގޮތުން ބައެއް ޓީމުތަކުގެ ފަރިތަކުރުންތައް މިދިޔަ އަހަރުގެ މުބާރާތް ނިމުނުތަނާހެން ފެށިއިރު، ފާހަގަކޮށްލެވޭ ހަތަރު ޓީމަކުން ވަނީ ބޮޑު އަގުގައި، ބައިބަލާގެ އެންމެ ހުނަރުވެރި ކުޅުންތެރިންގެ ސޮއިތައް ހޯދާފައެވެ.
ހުޅުމާލެ ފޭސް އެކެއްގައި 6 ދުވަހުގެ މުއްދަތައް ކުރިއަށްދާ މުބާރާތުގެ ކަންކަން އެންމެ ފުރިހަމައަށް ގެންދިއުމަށްޓަކާ، ކުޅިބެލުންތެރިންގެ އަމަލުތައް ކުޅިވަރުގެ ރޫހާ އެއްގޮތް ބެހެއްޓުމަށް ބައިބަލާ އެސޯސިއޭޝަނުން އިލްތިމާސް ކޮށްފައިވެއެވެ. އަދި މިކަމަށް ހުރިހާ ޓީމުތަކުގެ އެއްބާރުލުމަސްވެސް އެސޯސިއޭޝަނުން އެދިފައިވެއެވެ.
މިފަހަރުގެ މުބާރާތުގައި ބައިވެރިވާ ޓީމުތަކާއި އެސޯސިއެޝަނަށް، ސަރުކާރުން ބޮޑެތި އެހީތަކެއް ވަނީ ފޯރުކޮށްދީފައިވެއެވެ. އަދި ހުޅުމާލޭގައި މިމުބާރާތް ކުރިއަށްދާނީ ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) ގެ ފުރިހަމަ އެހީތެރިކަމާއެކުގައެވެ.