ހައްދުފަހަނައަޅާފައިވާ އިސްރާއީލުގެ ބޮޑުވަޒީރު ނެތަންޔާހޫގެ އިންޒާރެއް އަނެއްކާވެސް އެޤައުމުގެ ޓީވީތަކުން ދައްކައިފިއެވެ. ބައިނަލްއަޤްވާމީ ޤާނޫނުތަކާއި ޚިލާފަށް އަދި ހަނގުރާމަށް ލޯބިކުރާ އެމެރިކާއާއި ގުޅިގެން މިހާރު ގާޒާއަށް ދެމުންދާ މަރުގެ ހަމަލާތަކަކީ ”ހަމައެކަނި ފެށުން“ ކަމަށް އޭނާގެ ވީޑިއޯ މެސެޖުގައި ވަނީ ބުނެފައެވެ.
އަދި އޭނާ ބުނި ގޮތުގައި ކުޑަކުދިންނާއި އަންހެނުން މަރާ އިސްރާއީލްގެ ބާރުތަކުން ފަލަސްތީނުގެ ނިކަމެތި ރައްޔިތުންނަށް ވަރުގަދަކޮށް ހަމަލާ ދޭނެކަމަށާއި އަދި ކުރިޔަށް އޮތް ތަނުގައި ހަނގުރާމަ ހުއްޓާލުމުގެ މަޝްވަރާތައް ކުރިއަށްދާނީ ”ހަމައެކަނި ހަނގުރާމައިގެ ތެރެއިން“ ކަމަށްބުނެ އޮޅުވާލުމުގެ ގޮތުން ދޮގު ހަދާފައެވެ.
”އަހަރެމެން ހަނގުރާމައިގެ ހުރިހާ ލަނޑުދަނޑިތަކެއް ހާސިލުކުރުމަށް ކުރިއަށްދާނަން – އަހަރެމެންގެ ހުރިހާ ރަހީނުން ދޫކޮށްލުން، ހަމާސް ނައްތާލުން، އަދި ގާޒާއަކީ އިސްރާއީލަށް އިތުރު ނުރައްކަލެއް ނުވާނެކަމުގެ ޔަޤީންކަން ހޯދުން.“ ބައިނަލްއަޤުވާމީ ޤާނޫނުތަކަށް ގޮންޖަހައި ނެތަންޔާހޫ ބުންޏެވެ.
ނެތަންޔާހޫގެ މި ހަރުކަށި ބަސްތައް އައިސްފައިވަނީ އިސްރާއީލުން ގާޒާއަށް ދިން މަރުގެ ހަމަލާތަކުން ޖެނުއަރީ 19 ގައި ފެށުނު ހަމާސްއާއެކު އޮތް ނާޒުކު ހަނގުރާމަ ހުއްޓާލުން ނިމުމަކަށް ގެނައުމަށްފަހުގައެވެ.
ވައިގެ ހަމަލާތަކުން މަދުވެގެން 404 ފަލަސްޠީނުން މަރުވެފައިވާ ކަމަށާއި، އޭގެ ތެރޭގައި ގިނަ ކުޑަކުދިން ހިމެނޭ ކަމަށާއި، އަދި 560 އަށްވުރެ ގިނަ މީހުން ޒަޚަމްވެފައިވާ ކަމަށް ގާޒާގެ ސިއްޙީ ވުޒާރާއިން ބުނެފައިވެއެވެ.
މި ހަމަލާތައް އަމާޒުކުރެވުނީ ގާޒާގެ އާންމުން ދިރިއުޅޭ ސަރަޙައްދުތަކަކަށެވެ. އޭގެ ތެރޭގައި ދެކުނުގެ ޚާން ޔޫނިސް އަދި ރަފާ، އުތުރުގެ ގާޒާ ސިޓީ، އަދި ދެއިރު އަލް-ބަލާ ފަދަ މެދު ސަރަޙައްދުތައް ހިމެނެއެވެ. މި ހަމަލާތަކުގައި އާއިލާތަކެއް މުޅިން ފުހެލެވިގެން ގޮސްފައިވެއެވެ.
އިސްރާއީލް-ހަމާސް ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުޙަލާގެ މަޝްވަރާތައް، އެއީ ބާކީ އޮތް 60 އާ ގާތްކުރާ އަދަދެއްގެ ހަމާސްގެ ބަންދީން ދޫކޮށްލުމާއި ދާއިމީ ހަނގުރާމަ ހުއްޓާލުމެއް ޤާއިމުކުރުމާ ގުޅޭ މަޝްވަރާތައް، ހުއްޓިފައިވަނީ އިސްރާއީލުން ފުރަތަމަ މަރުޙަލާ އޭޕްރީލް މެދާ ހަމައަށް އިތުރުކުރުމަށް ބޭނުންނުވާތީއެވެ.
އިސްރާއީލުން ވޭތުވެދިޔަ ހަފްތާގައި ދެކޮޅުހަދާފައިވަނީ ހަމާސްއިން ހުށަހެޅި ހުށަހެޅުމަކަށެވެ. އެއީ އެމެރިކާ-އިސްރާއީލް ދެ ޤައުމުގެ ރައްޔިތެއް އަދި މަރުވެފައިވާ 4 ބަންދީންގެ ހަށިގަނޑު ދޫކޮށްލުމަށް، ދެވަނަ މަރުޙަލާގެ މަޝްވަރާތައް ފެށުމާއި މި މަހު ކުރީކޮޅު އިސްރާއީލުން އަޅާފައިވާ ބްލޮކޭޑް ނިމުމަކަށް ގެނައުމަށް ބަދަލުގައި ހުށަހެޅި ހުށަހެޅުމެކެވެ.
ހަނގުރާމަ ހުއްޓާލުން ފެށުނީއްސުރެ ހަމާސްއިން ދޫކޮށްލާފައިވަނީ ގާތްގަނޑަކަށް 36 ބަންދީންނެވެ. އެއީ ގާތްގަނޑަކަށް 2,000 ފަލަސްޠީނު ބަންދީންނާ ބަދަލުގައެވެ. މި ހަނގުރާމަ ހުއްޓާލުން މާޗް 1 އިން ފެށިގެން ހުއްޓިފައި އޮތެވެ. އެއީ 6 ހަފްތާގެ ފުރަތަމަ މަރުޙަލާ ނިމުމުންނެވެ.
އަންގާރަ ދުވަހުގެ ޚިޠާބުގައި، ނެތަންޔާހޫ މަޝްވަރާތަކުގައި ކުރިއެރުމެއް ނުލިބުމުގެ ޒިންމާ އެޅުއްވީ މުޅިން ހަމާސްގެ ބޮލުގައެވެ.
އިސްރާއިލުން މިހާރު ދެމުންދާ ހަމަލާތަކަކީ އެމެރިކާގެ ފުރިހަމަ ތާއީދާއިއެކު ދެމުންދާ ހަމަލާތަކެކެވެ. އަދި އެމެރިއާއަކީ ދުނިޔޭގެ ސުލްޙައަށް މަސައްކަތްކުރާނެ ބައެއް ނޫންކަން މީގެން އެނގިގެން ދެއެވެ. އަދި ހައްދުފަހަނައަޅާފައިވާ އިސްރާއީލުގެ މީހުން ދަނީ އެއްވެސް ކުށެއްނެތް ފަލަސްތީނުގެ ރައްޔިތުން ޝަހީދު ކުރަމުންނެވެ.