ރާއްޖޭގެ 20 އަހަރުން ދަށުގެ ގައުމީ ފުޓްބޯޅަ ޓީމު އިތުރު ތަމްރީނަށް ސިންގަޕޫރުގައި ކޭމްޕް ކުރަން މިއަދު ފުރައިފިއެވެ.
ޓީމުން ސިންގަޕޫރަށް ކުރާ ދަތުރުގެ ބޭނުމަކީ މި މަހުގެ 23 އިން އަންނަ މަހުގެ 3 އަށް ރާއްޖޭގައި ބާއްވަން ހަމަޖެހިފައިވާ 20 އަހަރުން ދަށުގެ ސާފް ޗެމްޕިއަންޝިޕަށް ތައްޔާރުވުމުގެ ގޮތުން އިތުރު ތަމްރީނުތައް ހޯދައި، އެގައުމުގެ ޒުވާން ޓީމުތަކާއި އެކު އެކުވެރިކަމުގެ މެޗުތައް ކުޅެ މެޗު ތަޖުރިބާތައް ހޯދުމެވެ.
މި ޓީމު ސާފް ޗެމްޕިއަންޝިޕަށް ތައްޔާރުވަމުން އަންނަނީ ޖެނުއަރީ މަހު ގައުމީ ޓީމާ ހަވާލުވި ހަންގޭރީގެ ކޯޗު އިސްޓަވާން އުރުބާނީގެ އިރުޝާދުގެ ދަށުންނެވެ.
މި މަހުގެ 7-11 އަށް ސިންގަޕޫރުގައި ކުރިއަށް ގެންދަން ހަމަޖެހިފައިވާ ޓްރޭނިން ކޭމްޕަކީ ޓީމަށް ވަރަށް މުހިއްމު ކަމެއް ކަމަާް ކޯޗް ބުންޏެވެ. އޭނަ ބުނީ މި ކޭމްޕަކީ ހަމައެކަނި ފީލްޑް ޓްރޭނިންތަކަށް ޚާއްސަ ކޭމްޕެއް ނޫން ކަމަށާއި ވަކިވަކި ކުޅުންތެރިންނާއި ކުދި ގްރޫޕްތައް ހިމަނައިގެން ކުޅުންތެރިންގެ ކުރިއެރުމަށް ބޭނުންވާ މުހިންމު ބައްދަލުވުންތައް ވެސް މި ކޭމްޕުގެ ތެރެއިން ބާއްވާނެ ކަމަށެވެ.
މި ކޭމްޕުގެ ތެރެއިން ސިންގަޕޫރުގެ 19 އަހަރުންދަށުގެ ޓީމާއި އެކު ރާއްޖޭގެ ޒުވާން ޓީމުން ދެ މެޗެއް ކުޅޭނެ އެވެ. ފުރަތަމަ މެޗު އަންނަ އާދިއްތަ ދުވަހަށް ތާވަލުކޮށްފައިވާ އިރު، ދެވަނަ މެޗު ކުޅޭނީ 11 ގަ އެވެ.
ސިންގަޕޫރުގައި ކުރިއަށްދާ ތަމްރީނުތަކަށް ފަހު ޒުވާން ޓީމުން އެނބުރި ރާއްޖެ އަންނާނީ 12 ގައެވެ.
ގަލޮޅު ދަނޑުގައި މެޗްތައް ކުޅޭ 20 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ ހިމެނެނީ ގުރޫޕް އޭގަ އެވެ. އެ ގުރޫޕުގައި ދެން ހިމެނެނީ ނޭޕާލް، ބޫޓާނާއި ސްރީ ލަންކާއެވެ. ގްރޫޕް ބީގައި ހިމެނެނީ ބަނގްލަދޭޝް، އިންޑިއާ އަދި ޕާކިސްތާނެވެ.
ވިހި އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގެ ސެމީ ފައިނަލް މެޗު ކުޅޭނީ އަންނަ އޭޕްރިލް 1 ގައެވެ. އަދި ފައިނަލް ކުޅޭނީ އެޕްރީލް 3 ގަ އެވެ.