މާލެ ސަރަހައްދުގައި ހިމެނޭ 26 މިސްކިތެއްގައިވެސް މިއަދުގެ ހުކުރު ނަމާދު އިމާމުވެ ކުރާނީ ޒުވާން ޚަތީބުންކަމަށް އިސްލާމިކް މިނިސްޓްރީން ހާމަކޮށްފިއެވެ.
މިއަދަކީ މާލެ ސަރަހައްދުގެ ހުރިހާ މިސްކިތެއްގެ މިންބަރަށް ޒުވާން ޚަތީބުން އަރާނެ ދުވަހެއްކަން ފާހަގަކޮށް އިސްލާމިކް މިނިސްޓްރީން ބުނީ، މިއަދު އިސްލާމީ މަރުކަޒުގައި އިމާމްވެ ހުކުރު ކުރާނީ އަލްޙާފިޒު ޢަބްދުﷲ ބިން އިމްޖާދު ކަމަށެވެ. އަދި ކިންގް ސަލްމާން މިސްކިތުގައި އިމާމުވެ ހުކުރު ކުރާނީ އަލްޙާފިޒު މުޙައްމަދު ހަނޫން ޙުސެއިން ކަމަށް އެ މިނިސްޓްރީން މައުލޫމާތު ދެއެވެ.
މާލެ އާއި ވިލިމާލެ އަދި ހުޅުމާލޭގެ ބޮޑެތި މިސްކިތްތަކުގައި މިއަދު ހުކުރު ކުރުމަށް ހަމަޖެހިފައިވާ ޒުވާން ޚަތީބުންގެ ތެރޭގައި؛ އިސްކަންދަރު މިސްކިތަށް މުޙައްމަދު މަބާހް މުޙައްމަދު، ޔޫސުފުލް ބަރުބަރީ މިސްކިތަށް އާޔަން އަޙްމަދު އިނާން، ވިލިމާލޭ ބިއްރި މިސްކިތަށް އިސްމާޢީލް ރަޝީދު، ހުޅުމާލޭ ދެވަނަ ފިޔަވަހީގެ ޙަސަން އާދަމް މިސްކިތަށް މުޙައްމަދު ޔަޝައު މުސްތަފާ، އީމާން މިސްކިތަށް އަނަސް ބިން ޙަސަން، ސަލާހުއްދީން މިސްކިތަށް އަޙްމަދު އަލްތާފް މޫގިލް، ހުޅުމާލޭ ފުރަތަމަ ފިޔަވަހީގެ އަސްދިގާ މިސްކިތަށް ޢަބްދުﷲ ޔައިސް މުޙައްމަދު، އަމީލް ޖަލީލް މިސްކިތަށް އައްމާރު ބިން އިބްރާހިމް އަދި ވާލިދައިން މިސްކިތަށް އިބްރާހިމް ޒާކިރު ޒަލީގް ހިމެނެއެވެ.
މީގެ އިތުރުން މަސްޖިދުއްސުލްތާން މުޙައްމަދު ބިން ޢަބްދުﷲގައި ރައްޔާން މުޙައްމަދު ރަޝީދު، ފުރުގާން މިސްކިތުގައި އަޙްމަދު ޔޫސުފް ބިން ސަޢީދު، ނޫރު މިސްކިތުގައި ހަމްޒާ ބިން ޙަސަން، ޝަހީދު ޢަލީ މިސްކިތުގައި އާކިފް ޢަބްދުއްސައްތާރު، ތައިބާ މިސްކިތުގައި މުޙައްމަދު ދިނާޒް އަޙްމަދު ޝަރީފް، ރަޝީދު މިސްކިތުގައި ހަނީޒް ޙަނީފް، ޝައިޚް ޤާސިމް ބިން މުޙައްމަދު އާލް ސާނީ މިސްކިތުގައި އުވައިސް ބިން އިނާޒް، އަޒީޒާ މިސްކިތުގައި ޙަސަން މާޒް ޢަލީ، އަބީބަކުރުނިއްސިއްދީގު މިސްކިތުގައި އަޙްމަދު މާދިން ޢަބްދުއްސަލާމް، އުސްމާން ބިން އައްފާން މިސްކިތުގައި ޢަބްދުﷲ އަކްމަލް ރަޝީދު، ދުނބުރި މިސްކިތުގައި ޒައިނުލް އާބިދީން ޔޫސުފް، ފަނޑިޔާރު މިސްކިތުގައި އާތިކް ޢަބްދުއްސައްތާރު، ބަންޑާރަ މިސްކިތުގައި މުޙައްމަދު މަބާހް މުޙައްމަދު، އިބްރާހީމީ މިސްކިތުގައި މާޔިޒް ބިން މުސްތާގް އަދި ޖަލާލުއްދީން މިސްކިތުގައި އިސްމާޢީލް އިފްރާހް އިބްރާހިމް ޢަލީ ހުކުރު ކުރުމަށް ވަނީ ހަމަޖެހިފައެވެ.
މި ރޯދަމަހު މާލޭ ސަރަހައްދުގެ ގިނަ މިސްކިތްތަކުގައި އިމާމުވެ ތަރާވީހު ނަމާދުވެސް ކުރަމުން އަންނަނީ ޒުވާން ޚަތީބުންކަން ފާހަގަކޮށްލެވެއެވެ. ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ޚާއްސަކޮށްގެން ކުރިއަށްގެންދާ މި ޕްރޮގްރާމްގެ ތެރެއިން މިހާތަނަށް 300 އަށްވުރެ ގިނަ ޒުވާނުން ވަނީ ތަމްރީނު ފުރިހަމަކޮށް ސަނަދު ހާސިލުކޮށްފައެވެ.