ސްޓޫޑެންޓް ލޯނަށް އެދި ހުށަހެޅުމުގެ ފުރުޞަތު މި ފެށޭ ބަންދުދުވަސްތަކަށްފަހު ހުޅުވާލާނެ ކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.
އެމަނިކިފާނު މިހެން ވިދާޅުވީ މަތީ ތަޢުލީމާބެހޭ ވުޒާރާގެ މަސައްކަތްތަކާގުޅޭގޮތުން މަޢުލޫމާތުދިނުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ވަޒީރު ވަނީ ލޯނަށް އެދެން ބޭނުންވާ ދަރިވަރުން ދުރާލާ ލިޔުންތައް ފުރިހަމަކޮށް ތައްޔާރުވުމަށް އިލްތިމާސްކުރައްވާފައެވެ. އަދި ފުރިހަމަ އެޕްލިކޭޝަނެއް ހުށަހަޅާ ދަރިވަރަކަށް ލޯނުގެ ފައިސާ ހަމަޖެހިގެން ދިޔުން، އިރާދަކުރެއްވިއްޔާ އެހެން އަހަރުތަކާ އަޅާބަލާއިރު ވަރަށް ބޮޑަށް އަވަސްވާނެކަމަށް ވަޒީރު ވިދާޅުވިއެވެ.
މީގެ އިތުރުން 2026 ގެ ލޯނު ސްކީމަށް އެދުމުގެ ފުރުޞަތު ހުޅުވާލުމަށްޓަކައި ޕޯޓަލް ތައްޔާރުކުރުމާއި އުސޫލު އެކުލަވާލުމުގެ މަސައްކަތް ކުރަމުންދާކަން ފާހަގަކުރައްވާ ވަޒީރު ވިދާޅުވީ ސްކީމުގެ ކަންކަން ހަރުދަނާކުރުމަށްޓަކާ، ކުރާ މަސައްކަތުގެ ތެރެއިން އެޕްލިކޭޝަން ޑެޑްލައިނެއް ނުބާއްވައި ލޯނަށް އެދުމުގެ ފުރުޞަތު މުޅި އަހަރަށް ހުޅުވާލާގޮތަށް ހަމަޖައްސާފައިވާކަމަށެވެ. އަދި މިކަމުގެ ސަބަބުން ލޯނަށް އެދޭ ދަރިވަރުންނަށް ފަސޭހަތަކެއް ލިބިގެންދާނެކަމަށް ވިދާޅުވިއެވެ.
ވަޒީރު ވިދާޅުވީ މިހާތަނަށް ދަރިވަރުން ލޯނު ހޯދަން އެދި ހުށަހަޅަން ވަކި މުއްދަތެއް ކަނޑައެޅިފައި އޮތުމުން، އެ މުއްދަތުގައި ލޯނަށް އެދި ހުށަހެޅުން ބައެއް ދަރިވަރުންނަށް ދަތިވާ ކަމަށާއި އެކަން އެގޮތަށް އޮތުމުން ލޯނަށް އެދުމުގެ ފުރުޞަތު ގެއްލޭގޮތް ދިމާވެފައިވާކަމށެވެ. އެހެންކަމުން މިބަދަލު ގެނައުމުގެ ސަބަބުން އެހެން ނުވާނެކަމަށް އުއްމީދުކުރައްވާ ކަމަށާއި ލޯނަށް އެދި ހުށަހެޅުން ދަރިވަރުންނަށް ވަރަށް ބޮޑުތަން ފަސޭހަވެގެންވެސް ދާނެކަމަށް ވިދާޅުވިއެވެ.
މި ބަދަލާއެކު، ދަރިވަރުން ލޯނު ހޯދަން އެދޭއިރު ހުށަހަޅަންވާ ލިޔުންތައްވެސް ތަފާތުވާނެކަމަށް ވަޒީރު ވިދާޅުވިއެވެ.
ލޯނަށް އެދޭއިރު ހުށަހަޅަންޖެހޭ ލިޔުންތައް:
• ކުރު މުއްދަތެއްގެ ތެރޭގައި ކިޔެވުން ފެށޭގޮތަށް، ކިޔަވައިދޭ މަރުކަޒުން ދޫކޮށްފައި އޮންނަ ޕްލޭސްމަންޓް/ އޮފަރ ލެޓަރ.
• ފުރިހަމަކުރަން ބޭނުންވާ ޕްރޮގްރާމްގެ ފީ ސްޓްރަކްޗަރ. (ލޯނަށް އެދި ހުށަހެޅުން ހުވައިލުމަށް ކުރާ އިޢުލާނުގައި ނުހިމެނޭ ގައުމެއްގައި ކިޔަވަން އެދޭ ނަމަ ޚަރަދު އަޅައިކިޔުމަށް އިޢުލާނުކުރި ގައުމެއްގެ ކިވައިދޭ މަރުކަޒެއްގެ ފީ ސްޓްރަކްޗަރވެސް ހުށަހަޅަން ވާނެ)
• އެމް.ކިޔު.އޭ.އިން ދޫކުރާ އިންޓެންޑެޑް ޕްރޮގްރާމް ރެކޮގްނިޝަން ލެޓަރ. މި ލެޓަރ އޮތުމުގެ ބޭނުމަކީ ފުރިހަމަކުރަން ބޭނުންވާ ޕްރޮގްރާމުގެ ސެޓްފިކެޓް އެމް.ކިޔު.އޭ. އިން ވެލިޑޭޓްކުމުގެ ޝަރުޠު ފުރިހަމަވާކަން ކަށަވަރުކުރުން.
• މަސައްކަތްކުރުމަށް ރެގިޔުލޭޓަރީ އޮތޯރީއަކުން ހުއްދަދޭ ދާއިރާއަކުން ކިޔަވާނަމަ، އެ ފުރިހަމަކުރާ ޕްރޮގްރާމަކީ އެ އޮތޯރިޓީން ހުއްދަ ދޭ ޕްރޮގްރާމެއްކަން އަންގައިދޭ ލިޔުން.