ލާމަރުކަޒު ކުރުމުގެ ނަމުގައިވެސް އެމްޑީޕީން މީގެ ކުރިން ވަނީ ބޮޑެތި އޮޅުވާލުންތައް ހިންގާފައިކަމަށް ހާރިޖީ ވަޒީރު އަބްދުﷲ ހަލީލް ވިދާޅުވެއްޖެއެވެ.
ޕީއެންސީގެ ގަލޮޅު އުތުރު ދާއިރާގެ ކެމްޕެއިން ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުން ހަލީލް ވިދާޅުވީ ކައުންސިލްތަކަކީ ސަރުކާރުގެ ފަށަލައެއް ކަމަށް އަބަދުވެސް ވިސްނަންވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާ ކަމަށެވެ. އެގޮތަށް ނުވިސްނާ ނަމަ، އޭގެ ގެއްލުން ރައްޔިތުންނަށް ކުރާ ކަމަށް ހަލީލް ވިދާޅުވިއެވެ.
އެކަމުގެ މިސާލެއް ނަންގަވަމުން ހަލީލް ވިދާޅުވީ އައްޑޫގައި ހިންގަން ނިންމާފައިވާ ވަރަށް ބޮޑު މަޝްރޫއުއަކަށް ބޭނުންވާ ބިން ހޯދުމަށް ސަރުކާރުން މަސައްކަތް ފެށި ހިސާބުން އެ މަސައްކަތަށް ކައުންސިލުން ހުރަސް އެޅި ކަމަށެވެ. އަދި ރައީސް އަށް ޖެހިވަޑައިގަންނަވަނީ ގާނޫނު ބަދަލުކޮށްގެން ނަމަވެސް ރައްޔިތުންގެ ހައްގުގައި އެ ޕްރޮޖެކްޓު ކުރިއަށް ގެންދިއުމަށް ކަމަށް ހަލީލް ވިދާޅުވިއެވެ. ހަލީލް ވިދާޅުވީ އެއީ ގޫގުލްގެ މަޝްރޫއު ކަމަށާއި، އެއީ ރައްޔިތުންނަށް ވަރަށް އަގުހުރި މަޝްރޫއެއް ކަމަށެވެ.
ހަލީލް ވިދާޅުވީ ގާނޫނު އަސާސީ ދަންނަނީ ދިވެހިރާއްޖެއަކީ ޔުނިޓަރީ ދައުލަތެއް އޮތް ގައުމެއްގެ ގޮތުގައި ކަމަށެވެ. އަދި އޮޅުވާލުމުގެ ތެރެއިން އެއްވެސް ކަމެއް ކުރުމަކީ މި ސަރުކާރުގެ ސިފައެއް ނޫން ކަމަށް ހަލީލް ވިދާޅުވިއެވެ.
އިތުރު މިސާލެއް ނަންގަވަމުން ހަލީލް ވިދާޅުވީ، 2023 ވަނަ އަހަރުގެ ރިޔާސީ އިންތިހާބު ކައިރިވުމުން މާލޭގެ ކަނޑުފަޅުން ރައްޔިތުންނަށް ގޯތިވެސް އެމްޑީޕީން ދިނީ ރައްޔިތުންގެ ވޯޓު ހޯދުމަށް ކަމަށާއި، އެތަނުގައި ބޯހިޔާވަހިކަމުގެ މަޝްރޫއެއް ހިންގުމުގެ އެއްވެސް ނިޔަތެއް އެމްޑީޕީގެ ނެތް ކަމަށެވެ.
އެއާ ހިލާފަށް އެ ވައުދުވެސް ފުއްދާދެއްވަނީ ރައީސް މުއިއްޒު ކަމަށް ވިދާޅުވެ ހަލީލް ވަނީ ހުޅުމާލެ ފޭސް ތިނެއްގެ ބިން ހިއްކުމުގެ މަޝްރޫއު އެމަނިކުފާނު ނިންމަވާފައިވާ ކަމަށާއި، ގުޅީފަޅާއި ގިރާވަރުފަޅުވެސް ހިއްކުމުގެ މަސައްކަތް ކުރަމުން އަންނަ ކަމަށް ވިދާޅުވެފައެވެ.
މީގެ އިތުރުން ރަސްމާލެ ބިން ހިއްކުމުގެ މަސައްކަތް ސަރުކާރުން ކުރަމުން އަންނަކަން ފާހަގަކުރައްވާ ހަލީލް ވިދާޅުވީ އަދުގެ ސަރުކާރުން ބޯހިޔާވަހިކަމުގެ ވައުދު ވަނީ އެކަން ފަހިވާނެ ގޮތަށް މަސައްކަތް ކުރައްވާފައި ކަމަށެވެ.
ހަލީލް ވިދާޅުވީ މާލޭގެ ރައްޔިތުން ދެވަނަ ވިސްނުމަކަށް ދާނެ ފުރުސަތެއް ވެސް ނެތް ކަމަށެވެ.
އަދި އެޕްރީލް ހަތަރު ވަނަ ދުވަހު އޮންނަ އިންތިހާބުގައި ވޯޓުލުމަށް ހުރިހާ ރައްޔިތުންވެސް ވަރަށް ހެނދުނާ ނުކުތުމަށާއި، ޕީއެންސީގެ ކެންޑިޑޭޓުންނަށްޓަކައި ވޯޓު ފޮށިތައް ފުރާލުމަށް ހަލީލް ވަނީ އެދިވަޑައިގެންފައެވެ.