ރ. އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރަކާއި ރ. ހުޅުދުއްފާރުގައި އެކޮމަޑޭޝަން ފެސިލިޓީއެއް ތަރައްގީކުރުމަށް ދެ ކުންފުންޏަކާ ހަވާލުކޮށްފިއެވެ.
އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރު ތަރައްޤީކުރުމަށް ހަވާލުކޮށްފައިވަނީ ސެންޓަރލައިން ކިޔާ ކުންފުންޏަކާއެވެ. ހުޅުދުއްފާރުގައި އެކޮމަޑޭޝަން ފެސިލިޓީ ތަރައްގީކުރުމަށް ހަވާލުކޮށްފައިވަނީ އެމްޓީސީސީއާއެވެ. މިމަޝްރޫއުތައް ހަވާލުކުރުމަށް ބޭއްވި ރަސްމިއްޔާތުގައި މަތީ ތައުލީމާ ބެހޭ ވަޒީރު ޑރ. އަލީ ހައިދަރު އަހްމަދު ބައިވެރިވެވަޑައިގެންނެވިއެވެ.
މިމަޝްރޫއުތަކުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި މަތީ ތައުލީމާ ބެހޭ ވަޒީރު ޑރ. އަލީ ހައިދަރު އަހްމަދު ވިދާޅުވީ ހުޅުދުއްފާރުގައި ތަރައްގީކުރާ އެކޮމަޑޭޝަން ފެސިލިޓީގައި ތަފާތު މޮޑެލްތަކުގެ އެކޮމަޑޭޝަން ހިމެނޭކަމަށާއި، ދަރިވަރުން އާއިލާތަކާއެކު ތިބެވޭ ގޮތަށް 2 ކޮޓަރިއާއި 3 ކޮޓަރީގެ އެޕާޓްމަންޓާއި ވަކިން އެކަނި ދިރިއުޅެވޭގޮތަށް ސްޓޫޑިއޯ އެޕާޓްމަންޓްތައް ހިމެނޭނެކަމަށެވެ.
ވަޒީރު އިތުރަށް ވިދާޅުވީ މި މަޝްރޫއުތަކަކީ އެ އަތޮޅުގެ ޒުވާނުންގެ މުސްތަގްބަލަށްޓަކައި އެޅޭ ވަރުގަދަ ބިންގަލަކަށްވާނެކަމަށާއި، މިމަޝްރޫއުތަކުގެ މައިގަނޑު ބޭނުމަކީ މަތީތައުލީމާއި ތަމްރީންދޭ މަރުކަޒުތައް އިތުރުކޮށް ރަށުގައި ތިބެގެން ފެންވަރު ރަނގަޅު ތައުލީމު ހޯދުމުގެ ފުރުސަތު ރައްޔިތުންނާ ވީހާވެސް ގާތުން ފޯރުކޮށްދިނުން ކަމަށެވެ.
އަދި މިމަރުކަޒުތަކުގެ ސަބަބުން އެ ސަރަޙައްދުގެ މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބާރަކަށް ވާނެކަމަށް ފާހަގަ ކުރައްވައި ވަޒީރު ވިދާޅުވީ ސަރުކާރުގެ އަމާޒަކީ ރާއްޖޭގެ ކޮންމެ ކުއްޖަކަށްވެސް އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތައުލީމުގެ ފުރުސަތު ހޯދައިދިނުންކަމަށެވެ.
ރ. އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރާއި ހުޅުދުއްފާރުގައި އެކަމަޑޭޝަން ފެސިލިޓީއެއް ތަރައްގީކުރުމަކީ ރަށްރަށުގައި ތިބެގެން ދަރިވަރުންނަށް މަތީ ތައުލީމާއި ތަމްރީން ހޯދޭނެ މަގުފަހިކުރުމުގެ ގޮތުން ސަރުކާރުން ކުރިއަށްގެންދާ މަޝްރޫއުތަކެކެވެ. އިންނަމާދޫ ޓިވެޓް ސެންޓަރު ހާއްސަ ކޮށްފައިވަނީ ބޯޓް-ބިލްޑިން ދާއިރާއިން މީހުން ތަމްރީންކުރުމަށެވެ. އަދި މިތަން ތައްޔާރުކުރުމަށް ހަމަޖެހިފައިވަނީ ޕްރީ-ފެބް އުސޫލުން އިންސްޓިޓިއުޓަކަށް ބޭނުންވާނެ މުހިއްމު ވަސީލަތްތައް ގާއިމްކޮށްގެންނެވެ.