ރައީސް ޑރ. މުޙައްމަދު މުޢިއްޒު ނޫސްވެރިންނާ ބައްދަލުކުރެއްވުމަށް ބާއްވާ ސިލްސިލާ ބައްދަލުވުންތަކުގެ ފުރަތަމަ ބައްދަލުވުން މިއަދު ހެނދުނު 10:00 ގައި ބޭއްވުމަށް ނިންމަވައިފިއެވެ.
ރައީސް އޮފީހުގެ އިސް ތަރުޖަމާނު ހީނާ ވަލީދު ވިދާޅުވީ، މިއަހަރުގެ ރިޔާސީ ބަޔާނުގައި ރައީސް ވިދާޅުވެފައިވާ ގޮތުގެ މަތިން އެމަނިކުފާނު ދެއްވާ ފުރަތަމަ ޕްރެސް ކޮންފަރެންސް މިއަދު ހެނދުނު 10:00ގައި އޮންނާނެ ކަމަށެވެ. އަދި ވަޒީރުން ބާއްވާ ޕްރެސް ކޮންފަރެންސްތައް އިއްޔެ ފެށިފައިވާކަން ވެސް ހީނާ ފާހަގަކުރެއްވިއެވެ.
މި ބައްދަލުވުންތައް ފައްޓަވާނެކަމަށް މި އަހަރުގެ ރިޔާސީ ބަޔާނުގައި ރައީސް ވަނީ ވިދާޅުވެފައެވެ.
މިގޮތުން މި މަހުން ފެށިގެން ކޮންމެ ހަފްތާއެއްގެ ހޯމަ ދުވަހު އެއް ގަޑިއިރަށް ރައީސް ނޫސްވެރިންނާ ބައްދަލުކުރަށްވަން ނިންމަވާފައިވާއިރު، މި ބައްދަލުވުންތަކަކީ ރައީސް ރަށަކަށް ކުރައްވާ ދަތުރަކާ ނުވަތަ ރަސްމީ ބަންދު ދުވަހަކާ ދިމާނުވާނަމަ، މެދުނުކެނޑި ކުރިއަށް ގެންދިއުމަށް ނިންމާފައިވާ ބައްދަލުވުންތަކެކެވެ.
މީޑިއާތަކާ އޮންނަ ގުޅުން އިތުރަށް ވަރުގަދަކުރުމުގެ ގޮތުން، ރައީސްގެ އިތުރުން ކޮންމެ ހަފްތާއަކު ވަޒީރަކުވެސް ނޫސްވެރިންނާ ބައްދަލުކުރައްވާ ގޮތަށް މިހާރު ވަނީ ހަމަޖައްސަވާފައެވެ.