އިންތިހާބަކާ ދިމާކޮށް މި ސަރުކާރުން ކަންކަން ނުކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އާޓިފިޝަލް ބީޗުގައި ޕީއެންސީން ރޭ ބޭއްވި ތަރާވީހެއްގައި ވާހަކަފުޅުދައްކަވަމުން ރައީސް ވިދާޅުވީ ކަނޑުން ގެއްލުވާލި ބައި ހޯދުމަށް ކުރާ މަސައްކަތް ވަރަށް ބާރު ސްޕީޑެއްގައި ކުރިއަށްގެންދާ ކަމަށާއި ބައެއް ފަރާތްތަކުން މިއީ އިންތިހާބަށް ކުރާ ކަމެއް ކަމަށް ތުހުމަތު ކުރި ނަމަވެސް، މިކަމުގެ މަސައްކަތް ރިޔާސީ ދައުރު ފެށުމާއެކު ފައްޓަވާފައިވާ ކަމަށެވެ.
އެގޮތުން ކުރީގެ ރައީސް އިބްރާހިމް މުޙައްމަދު ސޯލިހުގެ ސަރުކާރުން މޮރިޝަސްގެ ބޮޑުވަޒީރަށް ކަނޑުގެ މައްސަލައިގައި ފޮނުވި ސިޓީ، މި ސަރުކާރުން އަނބުރާ ގެނައީ އެ ސިޓީ އަނބުރާ ގެނެވޭ ހިސާބަށް ދިޔުމުން ކަމަށާއި އަދި އެއީ ރާއްޖޭގެ ކަނޑުގެ ސަރަހައްދުކަން އިއުލާންކުރީ، އެކަން އިއުލާންކުރާ ހިސާބަށް ދިޔުމުން ކަމަށްވެސް ރައީސް ވިދާޅުވި އެވެ.
”ދެން ހުރި ކަންކަން ވެސް ކުރަމުންދަނީ އެ ތަރުތީބުން. އިންތިހާބަކާ ދިމާކޮށް އަޅުގަނޑުމެން ކަންކަމެއް ނުކުރާނަން،“ ރައީސް ވިދާޅުވިއެވެ.
ރައީސް ވިދާޅުވީ ފޯޅަވައްސަކީ ނުވަތަ ޗާގޯސްއަކީ ކުރީ ޒަމާނުގައި ރާއްޖޭގެ ތަނެއް ކަމަށާއި އެގޮތުން އެތައް ގަރުނެއް ކުރިން ދިވެހިން އެ ތަނަކަށް ފޯޅަވަހީގެ ނަމުން ނަން ދީފައި އޮއްވައި އެހެން ގައުމުތަކުން އެހެން ނަންނަން ކިޔައި ޗާގޯސް ކީ ކަމުގައި ވިޔަސް އެއީ ދިވެހިންގެ ތަނެއް ކަމަށެވެ.
”އެތަން އެއްވެސް ގައުމަކާ ހަވާލުކުރާނަމަ، އެ ތަނުގެ ރައިޓްފުލް އޯނަރުންނަކީ (ހައްގުވެރިންނަކީ) ދިވެހިރާއްޖެކަން އަޅުގަނޑު މި ދަނީ ދިވެހި ސަރުކާރުގެ ފަރާތުން ކަމާ ބެހޭ ހުރިހާ ފަރާތެއްގައި ދަންނަވަމުން. އެއީ ސިޔާސީ ބޭނުމަށް ކުރާ ކަމެއް ނޫން،“ ރައީސް ވިދާޅުވިއެވެ.
އިނގިރޭސިވިލާތުން ޗާގޯސް އެހެން ގައުމަކާ ހަވާލުކުރާނަމަ، ހަވާލުކުރަންޖެހޭނީ އެތަނުގެ ހައްގުވެރި ގައުމު ކަމަށްވާ ރާއްޖެއާ ކަމަށާއި އެކަން ދެ ފަހަރެއްގެ މަތިން އިނގިރޭސި ސަރުކާރުގައި ދަންނަވާފައިވާނެކަން ވެސް ރައީސް ފާހަގަކުރެއްވި އެވެ. މި މަސައްކަތްތައް ސަރުކާރުން ކުރަމުންދަނީ ވަރަށް ތަރުތީބުން އޮންނަ އުސޫލުގެ ތެރެއިން ކަމަށާއި މި ސަރުކާރުން ކަންކަން ކުރާނީ ގައުމީ ވިސްނުމުގައި ކަމަށްވެސް ވިދާޅުވިއެވެ.