ރައްޔިތުންނާ ގުޅުންހުރި ބޮޑެތި ކަންކަމުގައި ރައްޔިތުންގެ ސީދާ ބަސް ހޯދުމަށް ރައީސް ޑރ. މުޙައްމަދު މުޢިއްޒު ޚާއްސަ އިސްކަމެއް ދެއްވާ ކަމަށާއި، ރައްޔިތުންގެ އަޑުއައްސަވައިގެން ނޫނީ އެމަނިކުފާނު މިހާތަނަށް ބޮޑު ނިންމެވުމެއް ނުނިންމަވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ ސަރުކާރު ހިންގާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން ރޭ ބޭއްވި ”ދިވެހީންގެރާއްޖެ ތަރާވީސް“ ހަރަކާތުގައި ވާހަކަ ދައްކަވަމުންނެވެ.
ވަޒީރު ޝިޔާމް ފާހަގަކުރެއްވި ގޮތުގައި، ގާނޫނުއަސާސީއަށް ބަދަލު ގެނައުމުގައި ރައްޔިތުންގެ ވޯޓަކަށް ނުގޮސް އޮތް ފުރުސަތުތައް ބަންދުކުރުމަކީ ރައީސް އެންމެ ފުރަތަމަ ކުރެއްވި އެއް މަސައްކަތެވެ. އަދި ގައުމުގެ ސިޔާދަތާއި ސަރަހައްދާ ގުޅޭ މުހިންމު ނިންމުންތަކުގައި ރައްޔިތުންގެ އަޑުއެހުމަކީ ރައީސް ގެންގުޅުއްވާ ހަރުދަނާ ސިޔާސަތެއް ކަމަށް އޭނާ ވިދާޅުވިއެވެ.
ސަރުކާރުން ނިންމަވާފައިވާ ބައެއް މުހިންމު ނިންމެވުންތަކަށް އަލިއަޅުއްވާލައްވަމުން ޝިޔާމް ވިދާޅުވީ، ވޭޕް މަނާކުރުމާއި ސިނގިރޭޓުގެ ޓެކްސް ބޮޑުކުރުމަކީ ޖީލެއް ސަލާމަތްކުރުމަށް ރައީސް ނިންމެވި ހިތްވަރުގަދަ ނިންމެވުމެއް ކަމަށެވެ. އަދި ޑޮލަރުގެ މައްސަލައިގައި ފާޑުކިޔުންތައް އަމާޒުވި ނަމަވެސް، އެއީ އިގްތިސާދު ރަނގަޅުކުރުމަށް އެޅުއްވި ހަރުދަނާ ފިޔަވަޅެއްގެ ގޮތުގައި ވަޒީރު ސިފަކުރެއްވިއެވެ.
”އަޅުގަނޑުމެން މި ކުރަންއުޅޭ ކަމަކީ ސަރުކާރުން ރައްޔިތުންނާ ހަމައަށް ގެނެސްދޭ ތަރައްޤީގެ މަޝްރޫޢުތައް ބާރުސްޕީޑެއްގައި ކުރިއަށްގެންދިއުން. ދިވެހިރާއްޖޭގެ ތަރައްޤީ ސޮސްސާލާފައޮތް ސޮއްސާލުން ނިންމުމަކަށް ގެނައުން. މިހުރިހާ ކަމަކުންވެސް އަޅުގަނޑުމެންނަށް އެނގުނީ ރައްޔިތުންނަށް ފައިދާކުރާނެ، ރައްޔިތުންގެ ޖީބަށް ތަނަވަސްކަން ގެނުވާނެ ކަމަކަަށް ވެއްޖެެއްޔާމު އެ ހުރިހާ ކަމެއްވެސް އެމަނިކުފާނު ކުރައްވާތަން،“ ޝިޔާމް ވިދާޅުވެފަވެއެވެ.
މީގެއިތުރުން، ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމާ ގުޅޭގޮތުން ރައްޔިތުންގެ ޚިޔާލު ހޯދުމަށް ނިންމެވި ނިންމެވުމަށްވެސް ވަޒީރު ތައުރީފު ކުރެއްވިއެވެ. އޭނާ ވިދާޅުވީ މީގެ ކުރިން ގާނޫނުއަސާސީއަށް ބަދަލު ގެންނަނީ މަޖިލީހުގެ މެޖޯރިޓީ ބޭނުންކޮށްގެން ރައްޔިތުންގެ އަޑު އެހުމެއް ނެތި ކަމަށާއި، ނަމަވެސް މި ސަރުކާރުން މަސައްކަތް ކުރަނީ ރައްޔިތުންނަށް އެންމެ ފައިދާހުރި ގޮތަށް ކަންކަން ނިންމުމަށް ކަމަށެވެ.