މީހަކު ރަހީނުކޮށް އަނިޔާކުރި ކަމުގެ ތުހުމަތުގައި ބިދޭސީއަކު ހައްޔަރުކޮށްފި އެވެ.
ފުލުހުން ބުނީ ހުއްދަނޫން ގޮތުގައި މީހަކު ހިފަހައްޓާފައިވާ މައްސަލައެއް މި މަހުގެ 19 ވަނަ ދުވަހުގެ ރޭ ދަންވަރު 01:22 ހާއިރު ރިޕޯޓުކޮށްފައިވާ ކަމަށެވެ.
މި މައްސަލައިގެ ތުހުމަތުގައި ހައްޔަރުކޮށްފައިވަނީ ބަންގްލަދޭޝްގެ އިގުބާލް މިއާ (35އ) ކަމަށެވެ.
ފުލުހުން ބުނީ ތަހުގީގުގެ ތެރެއިން ކުރި މަސައްކަތުން، އެ މީހާ މާލޭގައި ހުރި ތަން ދެނެގަނެ، އެތަނަށް ބާރުގެ ބޭނުންކޮށްގެން ވަދެ ހިފަހައްޓާފައިހުރި މީހާ ވަނީ އެރޭ 02:29 ހާއިރު ސަލާމަތްކޮށްފައިވާ ކަމަށާއި އެމީހާއަށް ބޭރުފުށުން އެއްވެސް އަނިޔާއެއް ވެފައި ނުވާ ކަމަށެވެ.
އޭނާގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން 30 ދުވަހަށް ބަންދުކުރަން އަމުރުކޮށްފައިވާކަމަށާއި އޭނާގެ ބަންދުގެ މުއްދަތު ހަމަވާނީ މާޗް 22 ވަނަ ދުވަހަށް ކަމަށް ފުލުހުން މައުލޫމާތުދެ އެވެ.
މި މައްސަލައިގައި ހައްޔަރުކުރި އިޤުބާލް މިއާ އަކީ ރާއްޖޭގައި ގަވާއިދާ ހިލާފަށް އުޅެމުންދާ ފަރާތެއް ކަމަށްވެސް ފުލުހުން ބުންޏެވެ.