ދުނިޔޭގެ އިސްލާމީ ގިނަ ގައުމުތަކުން ބަރަކާތްތެރި ރަމަޟާން މަސް މިއަދު ފަށާފައިވާއިރު، އޭގެ ތެރެއިން އެއް ގައުމަކީ ނިރުބަވެރި އިސްރާއީލުން ވަރުގަދަ އަދި އަނިޔާވެރި ހަމަލާތައް ދެމުން އަންނަ ފަލަސްތީނެވެ.
ފަލަސްތީނުގެ ޣައްޒާގައި ދިރުމެއް ނެތް ނަމަވެސް، ރަމަޟާން މަހާއި އެކީ ފަލަސްތީނު ރައްޔިތުން ތިބީ ރޯދަ ހިފައިގެންނެވެ.
ޣައްޒާގައި މީގެ ކުރިން ރައްޔިތުން ދިރިއުޅެމުން ދިޔަ އިމާރާތްތައް މިހާރު ވަނީ ބިމާހަމަކޮށްފައެވެ. އެއް އިމާރާތް، ދެ އިމާރާތެއް ނޫނެނެވެ. މުޅި ޣައްޒާ އެއްކޮށް ސުންނާފަތިކޮށްލާފައިވާ ކަމަށް ބުންޏަސް ދޮގަކަށް ނުވާނެއެވެ. އެހެން ކަމުން މިހާރު ޣައްޒާ ރައްޔިތުން ރަމަޟާން މަސް ފާހަގަ ކުރަމުން އަންނަނީ އަނދިރީގައި ނުވަތަ ކުދިކުދި ޓެންޓްތަކުގައެވެ. އެގޮތުން ފާހަގަކޮށްލަން ޖެހެނީ ޣައްޒާގެ މެދުތެރޭގައި އޮންނަ ބުރީޖް ރެފިއުޖީ ކޭޕްމެވެ.
ބުރީޖް ރެފިއުޖީ ކޭމްޕުގައި ރަމަޟާން މަސް އައިކަން ފާހަގަކުރުމުގެ ގޮތުން މައިސޫން އަލް-ބަރްބަރާވީ ވަނީ އޭނާ ދިރިއުޅޭ ޓެންޓް އެކި ކަހަލަ ތަކެތިން ޒީނަތްތެރިކޮށްފައެވެ. އުމުރުން 9 އަހަރުގެ ފިރިހެން ދަރިއެއް ހުންނަ މައިސޫން އެކަން ކުރަނީ އެކުއްޖާގެ އުފަލަށެވެ.
ރަމަޟާން މަހުގެ އުފަލާއި، ހިތްހަމަޖެހުމާއި އަޅުކަމުގައި މައިސޫން އުޅެން ބޭނުންވި ނަމަވެސް، އޭނާގެ ހިތުގައި އުފެދިފައިވަނީ އެންމެ ބިރުވެރިކަމެކެވެ. ހަމަލާތައް މިވަގުތު ހުއްޓިފައި އޮތް ނަމަވެސް އެ ހަމަލާތައް އަލުން ދޭނެ ވަގުތެއް ނޭނގޭތީ އެކަމެވެ.
އެމެރިގެ އެހީތެރިކަމާއިއެކު ހައްދުފަހަނައަޅާފައިވާ އިޒްރޭލުން ވަނީ ފަލަސްތީނުގެ އެތައް ކުޑަކުދިންނާއި އަންހެނުން ރަހުމު ކުޑަކޮށް މަރާފައެވެ. މިއީ ދުނިޔޭގެ ތާރީޚުގައިވެސް މިހާ ފާޅުކަންބޮޑު ގޮތެއްގައި އަންހެނުންނާއި ކުޑަކުދިންނަށް އަމާޒުކޮށްގެން ނަސްލެއް ނައްތާލުމުގެ ބޭނުމުގައި ހިންގާ ޖަރީމާއެކެވެ.