ރާއްޖޭގެ ވައި ނުސާފުވުމުގެ ސަބަބުން ދުރު ފެންނަ މިންވަރު ދަށްވަމުންދާތީ، މަތިންދާބޯޓު ދަތުރުކުރުމުގައި ރައްކާތެރިކަމުގެ ފިޔަވަޅުތައް ވަރުގަދަކޮށްފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
އެ ކުންފުނިން ނެރުނު ނޫސް ބަޔާނެއްގައި ބުނެފައިވަނީ، ވައި ނުސާފުވުމުގެ ސަބަބުން ނުވަތަ ބޯކޮށް ވާރޭ ވެހުމުގެ ސަބަބުން ދުރު ފެންނަ މިންވަރު ދަށްވެއްޖެނަމަ، ހެދިފައިވާ ގަވާއިދުތަކާ އެއްގޮތަށް ރައްކާތެރިކަމުގެ ފިޔަވަޅު އެޅުމަކީ އެއާ ފްލައިޓް ސާވިސް ދޭ ފަރާތުގެ ހައިސިއްޔަތުން އެމްއޭސީއެލްއަށް ލާޒިމުކުރާ ކަމެއް ކަމަށެވެ.
އެގޮތުން އަޅާ ފިޔަވަޅުތަކުގެ ތެރޭގައި، އާންމުކޮށް ބޭނުންކުރާ ބަލައިގެން ދުއްވާ ގަވާއިދު ނުވަތަ ވިޝުއަލް ފްލައިޓް ރޫލްސް (ވީއެފްއާރު) ވަގުތީ ގޮތުން މަޑުޖައްސާލުން ހިމެނެއެވެ. އަދި މިފަދަ ހާލަތްތަކުގައި އިތުރު އެހީތެރިކަން ލިބޭނެ ގޮތަކަށް ސްޕެޝަލް ވިޝުއަލް ފްލައިޓް ރޫލްސް (އެސްވީއެފްއާރު) އަށް ދަތުރުކުރުމަށް މަތިންދާބޯޓުތަކަށް އަންގަމުންދާ ކަމަށް އެ ކުންފުނިން ބުނެއެވެ.
އެމްއޭސީއެލް އިން ބުނި ގޮތުގައި، ދުރު ފެންނަ މިންވަރު 5 ކިލޯމީޓަރަށްވުރެ ދަށްވާ ހާލަތްތަކުގައި އެސްވީއެފްއާރު ބޭނުންކުރުމަކީ މޯލްޑިވްސް ސިވިލް އޭވިއޭޝަން އޮތޯރިޓީގެ ގަވާއިދުތަކާއި އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) ގެ ގަވާއިދުތަކާ އެއްގޮތްވާގޮތުގެ މަތީން މީގެ ކުރިންވެސް އަމަލުކުރަމުން އަންނަ އުސޫލެކެވެ. މި ދުވަސްވަރު ރާއްޖޭގެ ވައި ނުސާފުވުމުގެ ސަބަބުން ބައެއް ފަހަރު މި އުސޫލަށް އަމަލުކުރަން ޖެހިފައިވާ ކަމަށް ވެސް އެ ކުންފުނިން ފާހަގަކުރިއެވެ.
އެމްއޭސީއެލްގެ މައިގަނޑު މަގްސަދަކީ ޑޮމެސްޓިކް އަދި އިންޓަރނޭޝަނަލް ދަތުރުތައްކުރާ ހުރިހާ އެއާލައިންތަކާއި ފަސިންޖަރުންގެ ސަލާމަތާއި ރައްކާތެރިކަން ކަށަވަރުކޮށްދިނުންކަމަށް އެކުންފުނިން ބުންޏެވެ. އަދި ކޮންމެ ހާލަތެއްގައިވެސް އެންމެ މަތީ ފަންތީގެ ޚިދުމަތް ފޯރުކޮށްދިނުމަށް އެ ކުންފުނިން އަބަދުވެސް މަސައްކަތް ކުރަމުންދާނެ ކަމަށް އެމްއޭސީއެލް އިން ވަނީ ބުނެފައެވެ.