ކުޑަކުދިން ނަމާދަށް އަހުލުވެރިކުރުވުމަށާއި އެކުދިންގެ ހިތްތަކުގައި މިސްކިތްތަކަށް ލޯބިޖެއްސުމަށް މައިންބަފައިން ޚާއްސަ ސަމާލުކަމެއް ދިނުމަށް މިއަދު ހުކުރު ޚުތުބާގައި، ގޮވާލައްވައިފިއެވެ.
”ކުޑަކުދިން މިސްކިތަށް އަހުލުވެރިކުރުވުން“ މި މައުޟޫއަށް ޚާއްސަކޮށްގެން އިސްލާމިކް މިނިސްޓްރީން ތައްޔާރުކުރެއްވި މި ޚުތުބާގައި، އިންސާނުން ދުނިޔެއަށް ފޮނުއްވުމުގެ މައިގަނޑު މަޤްޞަދަކީ ﷲ އަށް އަޅުކަންކުރުންކަން ހަނދާންކޮށްދެއްވައި، އެކަން އެންމެ ފުރިހަމައަށް ޙާޞިލުވަނީ ފަރުޟު ފަސް ނަމާދު ޤާއިމުކޮށްގެންކަން ފާހަގަކުރައްވާފައިވެއެވެ.
ޚުތުބާގައި ބަޔާންކުރައްވާފައިވާ ގޮތުގައި ނަމާދަކީ ދީނުގެ ތަނބެވެ. އަދި ޤިޔާމަތް ދުވަހުން އަޅާގެ ޢަމަލުތަކުގެ ތެރެއިން އެންމެ ފުރަތަމަ ހިސާބު ބެއްލެވޭނީ ވެސް ނަމާދާ މެދުގައެވެ. އެހެންކަމުން، ﷲ ދެއްވި ބޮޑު ނިއުމަތެއް ކަމުގައިވާ ދަރިންނަށް މި މަތިވެރި އަޅުކަން ދަސްކޮށްދީ، ނަމާދަށް ރައްކާތެރިވާ ބަޔަކު ކަމުގައި އެކުދިން ހެދުމަކީ މައިންބަފައިންގެ ކޮނޑުގައި އެޅިފައިވާ ވާޖިބެއްކަމަށް ޚުތުބާގައި ވިދާޅުވިއެވެ. އަދި މިކަމުގައި އިހުމާލުވެއްޖެނަމަ ދުނިޔެއާއި އާޚިރަތުގެ ބާއްޖަވެރިކަން ގެއްލި، އެކަމުގެ ޒިންމާ މައިންބަފައިން އުފުލަންޖެހޭނެކަން ރަސޫލާ (ޞ) ގެ ޙަދީޘްފުޅުތަކުން ދަލީލު ދައްކަވައި ބަޔާންކޮށްދެއްވިއެވެ.
މީގެއިތުރުން، ދަރިން ނަމާދަށް ޝައުޤުވެރިކުރުވުމުގެ ބިންގަލަކީ ޞާލިޙު މައިމީހާ އިޚްތިޔާރުކުރުން ކަމަށާއި، ދީންވެރި އަންހެނަކާ ކައިވެނިކުރުމަށް ރަސޫލާ (ޞ) އިރުޝާދު ދެއްވާފައިވާކަން ޚުތުބާގައި ފާހަގަކުރެއްވިއެވެ. އަދި ހަމައެއާއެކު، ދަރިންނަކީ ޞާލިޙު، ނަމާދު ޤާއިމުކުރާ ބަޔަކު ކަމުގައި ލެއްވުން އެދި މައިންބަފައިން ގިނަގިނައިން ދުޢާކުރުމަށް ވެސް ނަސޭހަތްތެރިވެވަޑައިގެންނެވިއެވެ. މިގޮތުން އިބްރާހީމްގެފާނު އެކަލޭގެފާނުގެ ދަރިކޮޅު ނަމާދު ޤާއިމުކުރާ ބަޔަކު ކަމުގައި ލެއްވުން އެދި ކުރެއްވި ދުޢާގެ މިސާލު ޚުތުބާގައި ނަންގަވާފައިވެއެވެ.
ޚުތުބާ ނިންމާލައްވަމުން، ގޭގައި އެކަނި ނަމާދު ކުރުމަށްވުރެ ޖަމާޢަތުގައި ނަމާދުކުރުމުގެ ދަރުމަ 27 ގުނަ އިތުރުވެގެންވާކަން ހަނދާންކޮށްދެއްވައި، ކުދިން ގޮވައިގެން މިސްކިތަށް ދިއުމަށާއި މިސްކިތްތަކަށް އެކުދިން އަހުލުވެރިކުރުވުމަށް ބާރުއަޅުއްވާފައިވެއެވެ. އަދި އަޅުގަނޑުމެންގެ ދަރިންނަކީ ނަމާދަށް ރައްކާތެރިވާ، މިސްކިތްތަކާ ގުޅުންހުރި ބަޔަކު ކަމުގައި ލެއްވުން އެދި ޚުތުބާގައި ވަނީ ދުޢާ ދަންނަވާފައެވެ.