އައިޖީއެމްއެޗުން ހޯމްނާސިން ކެއާގެ ހިދުމަތް ފަށަން ފަސް ސައިކަލު ހޯދަން އިއުލާންކޮށްފިއެވެ.
އެ ހޮސްޕިޓަލުން ކުރި އިއުލާނެއްގައި ބުނީ އަލަށް ތައާރަފުކުރާ ހޯމް ނާސިން ކެއާގެ ހިދުމަތް ދިނުމަށާއި ހޮސްޕިޓަލުން އެކިއެކި ދަތުރުތަކުގައި ބޭނުންކުރަން ފަސް ސައިކަލު ސަޕްލައިކޮށްދޭނެ ފަރާތެއް ހޯދަމުން އަންނަ ކަމަށެވެ.
އިއުލާނުގައި ވަނީ ސައިކަލު ސަޕްލައިކޮށްދޭން ޝައުގުވެރިވާ ފަރާތްތަކުން ބީލަން ހުށަހެޅުމުގެ ފުރުސަތު ހުޅުވާލައިފައެވެ. ބީލަން ހުށަހެޅުން އޮތީ މިމަހުގެ 14 ވަަނަ ދުވަހު 11:00 ގައި އައިޖީއެމްއެޗުގެ ޕްރޮކިއުމެންޓް ޑިޕާޓްމަންޓުގައެވެ.
އިއުލާނުގައި ބުނެފައި ވަނީ ބީއޯކިއުގައި ބަޔާންކުރާގޮތަށް މަސައްކަތުގެ އަގު ހުށަހަޅާފައިވާ ފަރާތްތަކުގެ ތެރެއިން، ހުށަހަޅަންޖެހޭ ހުރިހާ ޑޮކިއުމަންޓްތައް ހަމައަށް ހުށަހަޅާފައިވާ ފަރާތްތަކުގެ ހުށަހެޅުންތައް އިވެލުއޭޝަންގައި ބައިވެރިކުރެވޭނެ ކަމަށެވެ. އަދި އަގާއި މުއްދަތަށް މާކްސް ދެވޭނީ އެންމެ ކުޑަ އަގެއް އަދި މުއްދަތެއް ހުށަހަޅާ ފަރާތްތަކަށް ފުލް މާކްސް ލިބޭގޮތަށް ޕްރޯރާޓާ އުސޫލުން ކަމަށް އެ އިއުލާނުގައިވެއެވެ.