މިއަހަރާއި އަންނަ އަހަރަކީ ވިޔަފާރިވެރިންގެ ހިތަށް ތަސައްލީއެއް ލިބޭނެ ދެއަހަރު ކަމަށް އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒރު މުހައްމަދު ސައީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ރައީސުލްޖުމްހޫރިއްޔާ އޮފީހުން ތައްޔާރުކޮށް ގެނެސްދޭ، ތަރުޖަމާނު ޕޮޑްކާސްޓުގެ ފުރަތަމަ އެޕިސޯޑުގައި ވާހަކަ ދައްކަވަމުންނެވެ.
ސަރުކާރުން ކުރަމުންދާ ކަންތައް ހިނގާގޮތް ރައްޔިތުންނަށް ހާމަކޮށް ތެދު މައުލޫމާތު ފޯރުކޮށްދިނުމުގެ ގޮތުން އަލަށް ފެށި ”ތަރުޖަމާނާއެކު އެޕިސޯޑު 1“ ހުށަހަޅާދެއްވަމުން ރައީސް އޮފީހުގެ އިސް ތަރުޖަމާން ހީނާ ވަލީދު ވިދާޅުވީ އެ ޕްރޮގްރާމުގެ މައިގަނޑު މަގްސަދަކީ 2025 ވަނަ އަހަރު ނިމިގެން ދިޔައިރު ފާހަގަކޮށްލެވުނު ކަންތައްތަކުގެ ތެރޭގައި ކުދި އަދި މެދުފަންތީގެ ވިޔަފާރިތައް ހިންގާ ފަރާތްތަކާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލުކުރައްވައި އެބޭފުޅުން ދިން ހިޔާލާއި މަޝްވަރާގެ މަތިން ބައެއް ކަންކަންތައް ބަދަލުކުރައްވާފައިވާ ކަމަށާއި ވިޔަފާރިވެރިންނަށް ހިދުމަތްތައް އިތުރަށް ފަހިވާ ގޮތަށް ކަންކަން ކުރައްވަމުން ގެންދަވާތީ އެ މައުލޫމާތުތައް ރައްޔިތުންނާ ހަމައަށް ގެނެސްދެއްވުން ކަމަށެވެ.
އެ ޕްރޮގްރާމުގައި އިކޮނޮމިކް މިނިސްޓަރު މުހައްމަދު ސައީދުވެސް ވަނީ ބައިވެރިވެވަޑައިގެން ގިނަ މައުލޫމާޓު ހިއްސާކުރައްވާފައެވެ. މިނިސްޓަރު ސައީދު ވިދާޅުވީ ކުރިޔަށް އޮތް ދެއަހަރަކީ ރާއްޖޭގެ ކުދި ވިޔަފާރިތަކަށް ހިންގާ ބޭފުޅުންގެ ހިތަށް ތަސައްލީއެއް ލިބޭނެ ދެއަހަރު ކަމަށެވެ. އަދި މީގެ ކުރީ ސަރުކާރާ ހިލާފަށް މި ސަރުކާރުގައި ރައީސް ޑރ. މުހައްމަދު މުއިއްޒު މިނިސްޓްރީ އޮފް އިކޮނޮމިކް ޑިވެލޮޕްމަންޓު ބުނެ ނިންމާ ނުލައި އިކޮނޮމިކް ޑިވެލޮޕްމަންޓު އެންޑް ޓްރޭޑް ކެބިނެޓުގައި ހިމެނުއްވިކަމަށާއި މަގްސަދަކީ ވިޔަފާރިތަކަށް އިސްކަންދިނުންކަން މިނިސްޓަރު ސައީދު ވަނީ ފާހަގަކުރައްވާފައެވެ.
ވަޒީރު ވިދާޅުވީ މީގެ ކުރިންވެސް އިގްތިޞާދީ ވުޒާރާގެ ވަޒީރުކަން ކުރެއްވި ކަމަށާއި، ނަމަވެސް އެހެން ސަރުކާރެއްގައި ކުދި ވިޔަފާރިތަކަށް މިހާ ބޮޑު އަހަމީއްޔަތުކަމެއް ދެއްވައިގެން މަސައްކަތްކޮށްފައި ނުވާކަމަށެވެ.
”ރައީސް އަޑުއެއްސެވި އެވާހަކަ. މިއީ ދައުލަތުގެ އެކި އިދާރާތަކާއި ގުޅުން ހުރި ކަންކަން ވީމަ، ސީދާ ރައީސް އޮފީހުންވެސް އެކަމުގެ އިރުޝާދުތަކެއް ގޮސްފައިވަނީ އެކި އިދާރާތަކަށް. ކުދި ވިޔަފާރިތަކުން މި ޝަކުވާތައް އުފުއްލާފައޭ ވަނީ، މިކަމުގައި ގޮތްތަކެއް ހަމަޖައްސަވައި ދެއްވުމަށް. މީގެ ކުރިން ރާއްޖޭގެ ރައީސުލްޖުމްހޫރިއްޔާއަކު މިހާ ފޯކަސްޑްކޮށް މިހާ ނަތީޖާ ނެރެވޭ ގޮތަށް މިއިންތިޒާމުތައް ހަމަޖެއްސެވި ކަމަށް ޤަބޫލެއް ނުކުރެވޭ އެއްވެސް ޒަމާނެއްގައި. “ ވަޒީރު ވިދާޅުވިއެވެ.
ތަރުޖަމާނު ޕްޑްކާސްޓަގައި މިނސިްޓަރ ސައީދު އިތުރަށް ފާހަގަކުރެއްވި މުހިންމު ކަންތައްތަކުގެ ތެރޭގައި ކުދި ވިޔަފާރިތަކަށް ދިމާވާ މައްސަލަތައް ހައްލުކުރުމަށް ރައީސް ޑރ. މުޢިއްޒު ނަތީޖާ ނެރެވޭނެ ފިޔަވަޅުތަކެއް އަޅުއްވަމުން ގެންދަވާ ކަމަށް ވިދާޅުވިއެވެ. އަދި ވިޔަފާރިވެރިންގެ ކަންބޮޑުވުންތައް އަޑުއައްސަވައި، އެކަންކަން ހައްލުކުރުމަށް ސަރުކާރުގެ އެކި އިދާރާތައް ރައީސް އޮފީހުން އަންގަވާފައިވާކަމަށާއި އެގޮތުން، މަަސައްކަތްކުރަމުން ގެންދާކަން މިނިސްޓަރު ފާހަގަކުރެއްވިއެވެ. ވިޔަފާރި ބަނދަރުތަކުން މުދަލަށް ޑެމަރޭޖް ނާރާ ވަގުތު 3 ދުވަހުން 5 ދުވަހަށް އިތުރުކޮށް، ޚިދުމަތް ދޭ ގަޑިތަކަށް ބަދަލު ގެނައުމަކީ ވެސް ވިޔަފާރިވެރިންނަށް ދިމާވާ ދަތިތައް ހައްލުކޮށްދެއްވުމަށް ސަރުކާރުން އެޅި ފިޔަވަޅެއްކަން މިނިސްޓަރ ފާހަގކުރެއްވިއެވެ. އަދި ފައިސާ ނުލިބިވާ ކުންފުނިތަކަށް ހައްލު ހޯދައިދިނުމަށް ފިނޭންސް މިނިސްޓްރީއާއި މީރާ ގުޅިގެން މަސައްކަތް ކުރަމުންދާކަން ވެސް ހާމަކުރެއްވިއެވެ.
މި ފިޔަވަޅުތަކަކީ އިޤްތިޞާދީ ހަރަކާތްތެރިކަން އިތުރުކޮށް، ކުދި ވިޔަފާރިތަކަށް ފަހި މާހައުލެއް ބިނާކުރުމަށް ކުރެވޭ މަސައްކަތްތަކެއް ކަމަށް ވަޒީރު ސައީދް ވިދާޅުވިއެވެ.