ހުކުރު ހުތުބާގެ މައުލޫއު އިމާމުން އަމިއްލައަށް ކަނޑައެޅުމުގެ މިނިވަންކަން ދިނުމަކީ ރާއްޖޭގައި ދީނީ ހަމަނުޖެހުން އުފެދިދާނެ ކަމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އިސްލާމިކް މިނިސްޓްރީން ހުތުބާގެ މައުލޫމާތުތަކާ ގުޅިގެން ރައްޔިތުންގެ ހިޔާލު ހޯދަން ފަށާފައިވަނިކޮށް، ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވީ، ހުރިހާ މިސްކިތެއްގައި އެއް ހުތުބާއެއް ކޮންމެހެން ކިޔަންޖެހޭ ކަމަކަށް ނުދެކޭ ކަމަށާއި އިމާމުންނަށް އެ އިރެއްގެ ހާލަތާ ގުޅޭ މައުޟޫއަކަށް ހުތުބާ ދިނުމުގެ މިނިވަންކަން ދޭންޖެހޭ ކަމަށެވެ.
މިކަމާ ގުޅިގެން މިނިސްޓަރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، އަހުމަދު އަބްދުﷲއަށް ވަރަށް އިހުތިރާމު ކުރައްވަކަމުގައި ވިޔަސް އެ މައުލޫމާތުގައި އެ ވާހަކަތައް ގޯސް ކަމަށެވެ. މިނިސްޓަރު ފާހަގަކުރެއްވީ، ހައްދެއް ނެތި މިކަން ހުޅުވާލުމުން ދީނީ ގޮތުން ރާއްޖެ ނުތަނަވަސް ހާލަތަކަށް ވެއްޓިދާނެ ކަމަށާއި އެފަދަ ކަމަކަށް ޖާގައެއް ނުދެއްވާނެ ކަމަށެވެ.
ޝަހީމް ވިދާޅުވީ، މިފަދަ މިނިވަންކަން ދީފައިވާ ގައުމުތަކުގައި ތަފާތު ދީނީ ފިކުރުތަކާއި ޖަމާއަތްތައް އުފެދިގެން އެކި މިސްކިތްތަކުގައި އެކި މަޒްހަބުތަކަށް ހުތުބާ ކިޔައި ހަމަނުޖެހުން އުފެދިފައިވާ ކަމަށާއި ދުނިޔޭގެ އެހެން ގައުމުތައްވެސް ރާއްޖޭގެ ހުތުބާ ނިޒާމަށް އެނބުރެމުންދާ ކަމަށެވެ. މިނިސްޓަރު ވިދާޅުވީ، ރާއްޖޭގެ ކުރީގެ ވެރިންނާއި ސަރުކާރުތަކުން ހުތުބާގެ ނިޒާމު ރަނގަޅަށް ދެމެހެއްޓީ މުޖުތަމައުއަށް އެންމެ ފައިދާހުރި މަގުން ހުތުބާ ތައްޔާރުކުރުމަށް ކަމަށެވެ.