މުނިފޫހިފިލުވުމުގެ ދާއިރާ ކުރިއެރުވުމަށް ސަރުކާރުން ކުރަމުންދާ މަސައްކަތުގެ ދަށުން، އައްޑޫ ސިޓީ އާއި ކުޅުދުއްފުށި ސިޓީގައި ސިނަމާ ކޮމްޕްލެކްސް ޤާއިމްކުރުމުގެ އަމަލީ މަސައްކަތް ވަރަށް އަވަހަށް ފަށާނެ ކަމަށް ޒުވާނުން ބާރުވެރިކުރުވުމާއި މައުލޫމާތާއި ފަންނާއި ބެހޭ ވަޒީރު އިބްރާހީމް ވަޙީދު ވިދާޅުވެއްޖެއެވެ.
ޒުވާނުންގެ ވުޒާރާގެ މަސައްކަތްތަކާ ގުޅޭގޮތުން ނޫސްވެރިންނަށް މައުލޫމާތު ދިނުމަށް ބޭއްވި ބައްދަލުވުމުގައި ވާހަކަ ދައްކަވަމުން ވަޒީރު ވިދާޅުވީ، މުނިފޫހިފިލުވުމުގެ ދާއިރާ ތަރައްޤީ ކުރުމުގެ މަސައްކަތުގެ ދަށުން ގިނަ ކަންތައްތަކެއް ރޭވިފައިވާ ކަމަށެވެ. މީގެ ތެރެއިން އެންމެ މުހިންމު އެއް މަސައްކަތަކީ ރާއްޖޭގެ އެކި ކަންކޮޅުތަކުގައި ޒަމާނީ ސިނަމާ ކޮމްޕްލެކްސްތައް ބިނާކުރުން ކަމަށް ވަޒީރު ފާހަގަކުރެއްވިއެވެ.
މާލެ ސަރަހައްދުގައި މިފަދަ ވަސީލަތްތައް ގާއިމްކުރުމަށް ކުރެވޭ މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، ހުޅުމާލޭގައި ޒަމާނީ ސިނަމާ ކޮމްޕްލެކްސްއެއް އެޅުމަށް ބޭނުންވާ ބިން ހަމަޖެއްސުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއެކު މަޝްވަރާ ކުރަމުންދާ ކަމަށެވެ. އަދި އަންނަ އަހަރުގެ ތެރޭގައި އެ މަސައްކަތް ފެށޭނެ ކަމަށް އުންމީދު ކުރައްވާ ކަމަށްވެސް ވިދާޅުވިއެވެ.
އަލަށް ގާއިމްކުރާ ސިނަމާތަކުގެ ތަފްސީލު ދެއްވަމުން ވަޒީރު ވިދާޅުވީ، މި ކޮމްޕްލެކްސްތަކުގައި އެއްފަހަރާ ތަފާތު ހަތަރު ފިލްމެއް ބެލޭނެ އިންތިޒާމު ހަމަޖެހިފައި ހުންނާނެ ކަމަށެވެ. ”އެއްފަހަރަކާ ނޫން 4 ފިލްމު ބަލަނީ. 4 ސްކްރީނުގައި 4 ތަނުގައި އިންނާނީ. 4 ރައްޓެހިން މިދަނީ. އެކަކު ބޭނުންވަނީ އެކްޝަން ފިލްމްއެއް ބަލަން. އަނެކަކު ބޭނުންވަނީ، ތަންކޮޅެއް ކޮމެޑީ ފިލްމެއް ބަލަން. އެކި ވައްތަރު ފިލްމު ބަލަން ބޭނުންވާނަމަ އެ ފުރުސަތުތަކޭ މި ހުޅުވާލަނީ،“ ވަޒީރު ވިދާޅުވިއެވެ.
މީގެ އިތުރުން، މި ސިނަމާ ކޮމްޕްލެކްސްތަކުގައި ހިމެނޭ ހަތަރު ސްކްރީނުގެ ތެރެއިން އެއް ސްކްރީން ހާއްސަކުރާނީ ދިވެހި އުފެއްދުންތަކާއި ދިވެހި ފިލްމުތައް އެޅުވުމަށް ކަމަށްވެސް ވަޒީރު އިބްރާހީމް ވަޙީދު ވިދާޅުވިއެވެ. މިއީ ދިވެހި ފިލްމީ ސިނާއަތުގައި މަސައްކަތްކުރާ ފަރާތްތަކަށް ލިބިގެންދާނެ ބޮޑު ފުރުސަތެއްގެ ގޮތުގައި ސަރުކާރުން ދެކެއެވެ.