ސަރުކާރު ހިންގާ ޕާޓީ ޕީއެންސީގެ ޓިކެޓުގައި އައްޑޫގެ މޭޔަރު ކަމަށް ކުރިމަތިލުމަށް ޕްރައިމަރީއަށް ހުށަހަޅާފައިވާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަހުމަދު އަދީލް ނަސީރު މިއަދު އޭނާގެ ނަން އަނބުރާ ގެންދަވައިފިއެވެ.
ޕީއެންސީގެ އޮފިޝަލަކު ބައެއް މީޑިއާތަކަށް މައުލޫމާތު ދެއްވާފައިވާ ގޮތުގައި އަދީލް ނަން އަނބުރާ ގެންދިޔައީ އަމިއްލަ އަށް ބޭނުންވެގެންނެވެ. އަދީލްގެ ނަން އަނބުރާ ގެންދެވުމުން އައްޑޫ މޭޔަރުކަމަށް ޕީއެންސީގެ ޓިކެޓު ލިބުނީ މޭޔަރުކަމުގެ ޕްރައިމަރީއަށް ކުރިމަތިލެއްވި އަނެއް ކެނޑިޑޭޓު މުޝްރިފް އަލީ އަށެވެ. އެހެންވެ މާދަމާ އައްޑޫގެ މޭޔަރުގެ ޕްރައިމަރީއެއް ނުބާއްވާނެއެވެ.
އައްޑޫ ޝަރަފުއްދީން ސްކޫލްގެ ކުރީގެ ޕްރިންސިޕަލް އަދީލް ފޭސްބުކްގައި ކުރެއްވި ޕޯސްޓެއްގައި ވިދާޅުވީ އައްޑޫގެ ހާލަތު ބަދަލުކުރުމަށް ޕީއެންސީގެ ތެރެއިން އެ ފުރުސަތު ހޯދަން މަސައްކަތް ކުރެއްވުމުން އެނގިވަޑައިގަތީ އެ ޕާޓީގެ އައްޑޫގެ މެންބަރުން ވެސް ތިބީ އެ ފުރުސަތު ދިނުމަށް ކެތްމަދުވެފައިކަން ކަމަށެވެ.
އަދީލް ވަނީ 2023 ގެ ރިޔާސީ އިންތިހާބުގައި އެމްއެންޕީގެ ރަނިންމޭޓެއްގެ ގޮތުގައި ކެމްޕެއިން ކުރައްވައި، 2019 ވަނަ އަހަރު ހިތަދޫ ދެކުނު ދާއިރާއަށް އަމިއްލަ ގޮތުން ވާދަކުރައްވައިފައެވެ. އަންނަ އަހަރު އޭޕްރީލް ހަތަރެއްގައި ލޯކަލް ކައުންސިލް އިންތިހާބާއި އަންހެނުންގެ ކޮމެޓީ އިންތިހާބު ބާއްވަން ނިންމާފައިވާއިރު ޕީއެންސީން 300 އެއްހާ ކެންޑިޑޭޓުން ވާދަކުރާނެކަމަށް ބެލެވެއެވެ.