ސަރުކާރުން ދޫކޮށްފައިވާ ސޯޝަލް ހައުސިން ޔުނިޓްތަކުގެ ތެރެއިން ބިދޭސީންނަށް ކުއްޔަށް ދީފައިވާ ތަންތަން ހުސްކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މުހުލަތެއް ދީފިއެވެ. މިކަން ހާމަކޮށް އެ ކުންފުނިން ވަނީ އިއުލާނެއް ނެރެފައެވެ.
އެޗްޑީސީން ބުނި ގޮތުގައި ސޯޝަލް ހައުސިން ޔުނިޓްތަކަކީ އެކަމަށް ޝަރުތުހަމަވާ ދިވެހި ރައްޔިތުންނަށް ދޫކޮށްފައިވާ ތަންތަން ކަމަށްވީ ނަމަވެސް، އެފަދަ ބައެއް ތަންތަން ބިދޭސީންނަށް ކުއްޔަށް ދީފައިވާކަން ވަނީ ފާހަގަކުރެވިފައެވެ. މިއީ އެ ކުންފުނިން ކަނޑައަޅާފައިވާ އުސޫލުތަކާއި ގަވާއިދުތަކާ ކަނޑައެޅިގެން ޚިލާފު ކަމެއް ކަމަށް އެޗްޑީސީން ބުނެފައިވެއެވެ.
ސޯޝަލް ހައުސިންގެ ގޮތުގައި ދޫކޮށްފައިވާ އެއްވެސް ތަނެއްގައި ބިދޭސީން ދިރިއުޅެމުންދާނަމަ، އަންނަ ޖަނަވަރީ މަހުގެ ތިންވަނަ ދުވަހުގެ ކުރިން އެ ތަންތަން ހުސްކުރުމަށް އެޗްޑީސީން ވަނީ އަންގާފައެވެ. އަދި އެ ތާރީޚުގެ ކުރިން ބިދޭސީން އެ ތަންތަނުން ނެރުމަށް، ޔުނިޓްތަކުގެ ވެރިފަރާތްތަކަށް ވަނީ އިލްތިމާސްކޮށްފައެވެ.
އެޗްޑީސީން އިތުރަށް ބުނެފައިވަނީ ސޯޝަލް ހައުސިން ޔުނިޓްތައް ލިބިފައިވާ ފަރާތްތަކުން އެ ކުންފުންޏާއެކު ވެފައިވާ އެއްބަސްވުމަށް ފުރިހަމައަށް އަމަލުކުރަން ޖެހޭނެ ކަމަށެވެ. އެއްބަސްވުމާ ޚިލާފަށް އަމަލުކުރާ ފަރާތްތަކާމެދު ހަރުކަށި ފިޔަވަޅު އެޅުމަށް އެ ކުންފުނިން ވަނީ ނިންމާފައެވެ.
މި މުހުލަތު ހަމަވުމަށްފަހު، ޖަނަވަރީ ތިނެއްގެ ފަހުން ވެސް ސޯޝަލް ހައުސިން ޔުނިޓެއް ބިދޭސީންނަށް ކުއްޔަށް ދީފައިވާކަން ފާހަގަކުރެވިއްޖެނަމަ، އެ ފަރާތަކާއެކު ވެފައިވާ އެއްބަސްވުން އުވާލާނެ ކަމުގެ އިންޒާރު ވެސް އެޗްޑީސީން ވަނީ ދީފައެވެ.