ސްރީލަންކާއަށް ކުރިމަތިވެފައިވާ ކާރިސާގައި އެހީތެރިކަން ފޯރުކޮށްދިނުމަށް ރާއްޖޭގައި ކުރިއަށްގެންދާ ”ސިލޯނާއެކު ދިވެހީން“ ޓެލެތޯނަށް، 5 މިލިޔަނަށްވުރެ ގިނަ ރުފިޔާގެ ބޮޑު އެހީއެއް ލިބިފައިވާކަމަށް އޮފިޝަލުން ހާމަކޮށްފިއެވެ.
ބޭންކް އޮފް މޯލްޑިވްސް (ބީއެމްއެލް) އިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް ހޯމަ ދުވަހުގެ މެންދަމުން އަލިވެ 1 ޖެހުމާ ހަމައަށް، 4.5 މިލިޔަނަށްވުރެ ގިނަ ރުފިޔާ ވަނީ ޖަމާކުރެވިފައެވެ. މީގެ އިތުރުން، ޑޮލަރު އެކައުންޓަށް ވެސް ވަނީ ދިވެހި ރައްޔިތުންގެ ފަރާތުން ބޮޑު އެހީއެއް ލިބިފައެވެ. އެގޮތުން، 38 ހާހަށްވުރެ ގިނަ ޑޮލަރު މިހާތަނަށް ޖަމާވެފައިވާކަމަށް މައުލޫމާތު ލިބެއެވެ. މި ދެ އެކައުންޓަށް ލިބުނު ޖުމްލަ އެހީ، 5 މިލިޔަން ރުފިޔާއިން މަތިވެފައިވަނީ ދިވެހީންގެ ހިތްހެޔޮކަން ހާމަކޮށްދެމުންނެވެ.
ސްރީލަންކާއަށް ދިމާވެފައިވާ އިޤްތިޞާދީ އަދި އިންސާނީ ކާރިސާގައި އެހީތެރިކަން ފޯރުކޮށްދިނުމަށް މި ޓެލެތޯން ފަށާފައިވަނީ އާދިއްތަ ދުވަހުގެ ހެނދުނު 9:00 ޖެހިއިރުއެވެ. މި ޓެލެތޯން ކުރިއަށްދާނީ މިއަދުގެ މެންދުރު 2 ޖެހުމާ ހަމައަށެވެ. އެހެންކަމުން، އެހީގެ ފައިސާ ޖަމާކުރުމުގެ ފުރުސަތު އަދިވެސް ވަނީ ހުޅުވާލެވިފައެވެ.