ތުރުކީ، ސަޢޫދީ ޢަރަބިއްޔާ އަދި ޕާކިސްތާނުގެ މެދުގައި ޤާއިމުކޮށްފައިވާ މައްކާ ދިފާޢީ އެއްބަސްވުން ތުރުކީގެ ޕާލަމެންޓުން ބުރާސްފަތި ދުވަހު ފާސްކޮށްފިއެވެ.
މި އެއްބަސްވުނޤާނޫނުހަދާ މަޖިލީހުގައި ވޯޓުގައި ބައިވެރިވި 398 މެންބަރުންގެ ތެރެއިން 279 މެންބަރުންގެ އަޣުލަބިއްޔަތުންނެވެ. ދެކޮޅަށް 119 މެންބަރަކު ވޯޓު ދެއްވިއެވެ.
ޖުމްލަ 16 މާއްދާގެ މައްޗަށް އެކުލެވޭ މި އެއްބަސްވުމުގެ ދެވަނަ މާއްދާގައި ބަޔާންކޮށްފައިވާ ގޮތުގައި، އެއްބަސްވުމުގައި ބައިވެރިވާ ޤައުމަކަށް ޢަސްކަރީ ޙަމަލާއެއް އަތުވެއްޖެނަމަ، އެހެން މެންބަރު ޤައުމުތަކުން ލިބެންހުރި ހުރިހާ ވަސީލަތްތަކެއް ބޭނުންކޮށްގެން ވަގުތުން އެހީތެރިކަން ފޯރުކޮށްދޭން ޖެހޭނެއެވެ. މިއީ ނޭޓޯގެ 5 ވަނަ މާއްދާއާ ދާދި އެއްގޮތް އުޞޫލެކެވެ.
މިދިޔަ އޯގަސްޓު މަހު މައްކާގައި މި އެއްބަސްވުމުގައި ސޮއިކުރެއްވީ ތުރުކީގެ ރައީސް ރަޖަބް ޠައްޔިބް އުރުދުޣާން، ސަޢޫދީ ޢަރަބިއްޔާގެ ވަލީއަޙްދު މުޙައްމަދު ބިން ސަލްމާން އަދި ޕާކިސްތާނުގެ ބޮޑުވަޒީރު ޝަހްބާޒް ޝަރީފްއެވެ.
މި އެއްބަސްވުން ފާސްކޮށްފައިވަނީ ޔަމަނުގެ ޙޫޘީންގެ ފަރާތުން ރިޔާޟަށް ދެމުންދާ ޙަމަލާތައް އިތުރުވެފައިވާ ދަނޑިވަޅެއްގައެވެ. މީގެ މައިގަނޑު ބައިތަކުގެ ތެރޭގައި ދިފާޢީ އުފެއްދުންތެރިކަން ކުރިއެރުވުމާއި، ގުޅިގެން ތަމްރީނުތައް ހިންގުން އަދި އިންޓެލިޖެންސް މަޢުލޫމާތު ޙިއްޞާކުރުން ހިމެނެއެވެ.
ޕާލަމެންޓުން މި އެއްބަސްވުން ފާސްކުރި ނަމަވެސް، ސަޢޫދީ ޢަރަބިއްޔާއަށް ތުރުކީ ސިފައިން ފޮނުވުމަށްޓަކައި އަދިވެސް އިތުރު ޤާނޫނީ މަރުޙަލާތަކެއް ފުރިހަމަކުރަން ޖެހެއެވެ. ތުރުކީގެ ދިފާޢީ ވަޒީރު ޔާޝާރު ގުލޭރު ފާހަގަކުރެއްވި ގޮތުގައި، ތުރުކީން ޙޫޘީންނާ ދެކޮޅަށް ސީދާ ހަނގުރާމައަކަށް ނުވަންނާނެއެވެ. އޭގެ ބަދަލުގައި، މި އެހީތެރިކަމުގެ މައިގަނޑު އަމާޒަކީ ކުރިމަތިވެދާނެ ނުރައްކާތައް ހުއްޓުވުމުގެ ދިފާޢީ ޤާބިލުކަން އިތުރުކުރުމެވެ.
މަދުވެގެން 10 އަހަރު ދުވަހުގެ މުއްދަތަށް ޤާއިމުކުރެވިފައިވާ މި އެއްބަސްވުމުގެ ދަށުން، މިހާރު ތިބި ބައިވެރިންގެ އިއްތިފާޤާއެކު އިތުރު ޤައުމުތަކަށްވެސް މި އިއްތިޙާދާ ގުޅުމުގެ ފުރުޞަތު ވަނީ ހުޅުވާލެވިފައެވެ. އަދި ސޫރިޔާއިން މިހާރުވެސް ވަނީ މި އިއްތިޙާދުގައި ބައިވެރިވުމުގެ ޝައުޤުވެރިކަން ފާޅުކޮށްފައެވެ.