އީރާނާއި އެމެރިކާއާ ދެމެދު ކުރިއަށްދާ ފުޅާ މަޝްވަރާތައް އަލުން ފެށުމުގެ ކުރިން، ހޮރްމުޒް ކަނޑުއޮޅިއާ ގުޅޭގޮތުން އީރާނާއި އޮމާނާ ދެމެދު ވެވޭ ދޭދޭ އެއްބަސްވުމަކަށް މެދުވެރިން އިންތިޒާރު ކުރަމުންދާ ކަމަށް ޤަޠަރުގެ ޚާރިޖީ ވުޒާރާއިން ހާމަކޮށްފިއެވެ.
މި މަޝްވަރާތަކަށް ތައްޔާރުވަމުންދާ މި ދަނޑިވަޅުގައި ވެސް، އީރާނާއި އެމެރިކާގެ އިސް ވެރިންގެ މެދުގައި ބަހުގެ ހޫނު ހަމަލާތަކެއް ދަނީ ބަދަލުކުރެވެމުންނެވެ. އީރާނުގެ ޚާރިޖީ ވަޒީރު އައްބާސް އަރަޣްޗީ ވިދާޅުވީ، އެމެރިކާއިން ދަނީ މަޝްވަރާތައް ކުރިއަށް ގެންދިއުމަށް އެދި އީރާނުގެ ކިބައިން ”އާދޭސްކުރަމުން“ ކަމަށެވެ. މިއާ ޚިލާފަށް، އެމެރިކާގެ ރައީސް ޑޮނަލްޑް ޓްރަމްޕް ވަނީ ހޮރްމުޒް ކަނޑުއޮޅިއަކީ ”އެމެރިކާގެ ސަރަޙައްދެއް“ ކަމުގައި އިޢުލާންކުރާނެ ކަމުގެ އިންޒާރު އަނެއްކާވެސް ތަކުރާރު ކޮށްފައެވެ.
މި ނުތަނަވަސްކަމުގެ ތެރޭގައި، ހޮރްމުޒް ކަނޑުއޮޅިން ދަތުރުކުރި އުޅަނދަކަށް ނޭނގޭ އެއްޗަކުން ޙަމަލާދިނުމުގެ ސަބަބުން، އެ އުޅަނދުގެ އިންޖީން ރޫމަށް ގެއްލުންވެ، ފަޅުވެރިއަކު މަރުވެފައިވާ ކަމަށް ޔޫކޭ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ވަނީ ކަށަވަރުކޮށްދީފައެވެ.
އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޤާއީ ވިދާޅުވީ، އެމެރިކާއިން ވެފައިވާ ބޮޑެތި ޚިލާފުވުންތަކުގެ ސަބަބުން، ތެހެރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ހިމެނޭހެން މައްސަލަތައް ޙައްލުކުރުމަށް އެމްއޯޔޫގައި ކަނޑައެޅި 60 ދުވަހުގެ މުއްދަތު މިހާރު މާނައެއް ނެތް އެއްޗަކަށް ވެފައިވާ ކަމަށެވެ. އަދި އެއްވެސް ފަރާތަކުން އީރާނަށް ޙަމަލާއެއް ދީފިނަމަ، އެކަމަށް ފުރިހަމައަށް ރައްދު ދިނުމަށް އެ ޤައުމުގެ އަސްކަރިއްޔާ އޮތީ ފުރިހަމައަށް ތައްޔާރަށް ކަމަށްވެސް އޭނާ ވިދާޅުވިއެވެ.