ޔޫއޭފާ ޗެމްޕިއަންސް ލީގުގެ ލީގު ފޭސްގައި އިޓަލީގެ ނަޕޯލީ އަތުން 1-0 އިން މޮޅުވެ، އިންގްލަންޑުގެ އާސެނަލުން މުބާރާތުގެ ފެށުން ރަނގަޅުކޮށްފިއެވެ.
ބުދަ ދުވަހުގެ ރޭ ނާޕޯލީގެ ދަނޑުގައި ކުޅުނު މި މެޗުން އާސެނަލް މޮޅުވީ މެޗުގެ ގިނަ ވަގުތު ކުޅުން ކޮންޓްރޯލްކޮށް، ނާޕޯލީގެ ވަރުގަދަ ޑިފެންސް ފާރު ފައްޓައިލުމަށްފަހު، ކެޕްޓަން މާޓިން އޮޑެގާޑް ކާމިޔާބުކުރި ފުރިހަމަ ލަނޑުންނެވެ.
މެޗުގެ ނަތީޖާ އާސެނަލް ކޮޅަށް އެނބުރުނީ މެޗު ނިމެން 15 މިނެޓަށް ވެފައި ވަނިކޮށެވެ. އޭރިއާ ބޭރުން އޮޑެގާޑް ފޮނުވާލި ވަރުގަދަ ހަމަލާ ގޯލަށް ވަނީ އަރިމަތީ ދަނޑީގައި ޖެހިފައެވެ. މިއީ އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ކުޅުނު މެޗުގައި އާސެނަލް މޮޅުކޮށްދިން ލަނޑު ޖެހިތާ ތިން ދުވަސް ފަހުން އޮޑެގާޑް ޖެހި އަނެއް މުހިންމު ގޯލެވެ.
މެޗުގެ ފުރަތަމަ ހާފުގައި އާސެނަލުން ގިނަ ހަމަލާތަކެއް އުފެއްދި ނަމަވެސް، ނާޕޯލީން ވަނީ ފަހަތަށް ޖެހި ޑިފެންސިވް ގޭމެއް ކުޅެ އާސެނަލް ހުއްޓުވުމަށް މަސައްކަތްކޮށްފައެވެ. ފުރަތަމަ ހާފުގެ މެދުތެރެއިން މައިކަލް މެރީނޯ ބޮލުން ފޮނުވާލި ނުރައްކާތެރި ހަމަލާއެއް ނާޕޯލީގެ ގޯލްކީޕަރު އަލެކްސް މެރެޓް ވަނީ މަތަކޮށްފައެވެ. އޭގެ އިތުރުން ބެން ވައިޓް އާއި ހިންކާޕީއަށް ލިބުނު ފުރުސަތުތަކުގެ ބޭނުން ނުހިފުނުއިރު، ފުރަތަމަ ހާފު ނިމެން އުޅެނިކޮށް ބުކާޔޯ ސާކާއަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ ދިޔައީ ގޯލްގެ ހުރަސް ދަނޑި މަތިންނެވެ. ނާޕޯލީގެ ކައުންޓަރ އެޓޭކްތަކުގައި ކެވިން ޑި ބްރޭނާ އާއި މެޓެއޯ ޕޮލިޓާން ފޮނުވާލި ހަމަލާތައް އާސެނަލްގެ ކީޕަރު ޑޭވިޑް ރާޔާ ވަނީ ދިފާއުކޮށްފައެވެ.
ދެވަނަ ހާފު ފެށުނުއިރު އަނިޔާގެ ސަބަބުން ނާޕޯލީގެ ކީޕަރު މެރެޓްގެ ބަދަލުގައި ވާންޔާ މިލިންކޮވިޗް-ސަވިޗް ވަނީ ކުޅެން ނެރެފައެވެ. ދެވަނަ ހާފު ފަށައިގެންވެސް އާސެނަލުން ދިޔައީ ނާޕޯލީގެ ގޯލަށް ނުރައްކާކުރަމުންނެވެ. އެގޮތުން ފަސް ޔާޑު ދުރުން ހިންކާޕީއަށް ލިބުނު ރަނގަޅު ފުރުސަތެއްގައި ފޮނުވާލި ބޯޅަވެސް ދިޔައީ ގޯލް މަތިން ބޭރަށެވެ. ނަމަވެސް، މެޗުގެ 75 ވަނަ މިނެޓުގައި އޮޑެގާޑް ވަނީ ލަނޑު ޖަހައި އާސެނަލަށް ކުރިހޯދައިދީފައެވެ.
ލަނޑަށްފަހު އާސެނަލަށް ނަތީޖާ ފުޅާކުރުމަށް އިތުރު ފުރުސަތުތަކެއް ލިބުނެވެ. މެޗު ނިމެން ފަސް މިނެޓަށް ވެފައި ވަނިކޮށް ބަދަލު ކުޅުންތެރިޔާ ނޯނީ މާޑުއެކޭ ފޮނުވާލި ހަމަލާ ކީޕަރު މިލިންކޮވިޗް-ސަވިޗް ދިފާއުކުރިއިރު، ރީބައުންސް ބޯޅައިން ކްރިސްޓޯސް ޒޯލިސް ފޮނުވާލި ހަމަލާ ނާޕޯލީގެ ޑިފެންޑަރުން ވަނީ ގޯލްގެ ރެސް އިން ސަލާމަތްކޮށްފައެވެ. އަދި އިތުރު ވަގުތުގެ ތެރޭގައި ކައި ހާވާޓްޒް ލަނޑެއް ޖެހި ނަމަވެސް، ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ. އަނެއްކޮޅުން ނާޕޯލީއަށް އެއްވަރުކުރަން ލިބުނު ފުރުސަތުގައި ޑި ބްރޭނާ އަމިއްލައަށް ގޯލަށް ހަމަލާދިނުމުގެ ބަދަލުގައި ހުސްކޮށް އޮތް އޭރިއާ ތެރެއަށް ހުރަސްކޮށްލި ބޯޅައިގެ ބޭނުން ހިފޭގޮތެއް ނުވިއެވެ.
މި މެޗަށް އާސެނަލްގެ ކޯޗު މައިކަލް އާޓެޓާ ވަނީ އެންމެ ފަހުން ޗެލްސީއާ ދެކޮޅަށް ކުޅުނު މެޗުގެ އެގާރައަށް ހަތަރު ބަދަލެއް ގެނެސްފައެވެ. އެގޮތުން ހިންކާޕީ، މައިކަލް މެރީނޯ، އެބެރެޗީ އެޒޭ އަދި ވިކްޓަރ ޔޮކެރެޝް ވަނީ މި ސީޒަނުގައި ފުރަތަމަ ފަހަރަށް ފުރަތަމަ އެގާރައިގައި ހިމެނިގެން ކުޅެފައެވެ. ނާޕޯލީގެ ކޯޗު މެސިމިލިއާނޯ އަލެގްރީއަށް ސކޮޓް މެކްޓޮމިނޭ އަދި އަންދްރޭ-ފްރޭންކް ޒަމްބޯ އަންގީސާއަށް ލިބުނު އަނިޔާތަކާ ގުޅިގެން ކެވިން ޑި ބްރޭނާ އާއި ބިލީ ގިލްމޯ ފުރަތަމަ އެގާރައިގައި ހިމަނަން މަޖުބޫރުވިއެވެ.
ނާޕޯލީ އަތުން ލިބުނު މޮޅާއެކު އާސެނަލުން ސީޒަން ފެށީ ސައްތައިން ސައްތައިގެ ރެކޯޑަކާއެކުގައެވެ. މިއީ ނާޕޯލީ ޖެހިޖެހިގެން ބަލިވި ތިންވަނަ މެޗެވެ. ޗެމްޕިއަންސް ލީގުގެ ކުރިއަށް އޮތް މެޗުގައި އޮކްޓޯބަރު 13 ވާ އަންގާރަ ދުވަހު އާސެނަލް އަމިއްލަ ދަނޑުގައި ނުކުންނާނީ ލިލްއާ ދެކޮޅަށެވެ. އެ ދުވަހު ނާޕޯލީ ރަށުން ބޭރުގައި ކުޅޭނީ ވިޔަރެއާލްއާ ދެކޮޅަށެވެ.