ހުޅުމާލޭގައި ދިރިއުޅޭ އިސްރަށްވެހިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމުގެ މަގްސަދުގައި ”ދުޅަހެޔޮ އިސްރަށްވެހިން“ގެ ނަމުގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ހެލްތު މިނިސްޓްރީ ގުޅިގެން ހާއްސަ ޕްރޮގްރާމެއް މިއަދު ފަށައިފިއެވެ.
މިއަހަރުގެ އިސްރަށްވެހިންގެ ދުވަސް ފާހަގަކުރުމުގެ ގޮތުން މިއަދު ހެނދުނު ހުޅުމާލޭ ސެންޓްރަލް ޕާކުގައި ބޭއްވި ހާއްސަ ހަރަކާތުގެ ތެރެއިން މި ޕްރޮގުރާމު ރަސްމީކޮށް އިފްތިތާހުކޮށްދެއްވީ ހެލްތް މިނިސްޓަރ ޑރ. އަބްދުﷲ ހަލީލް ނުވަތަ މިނިސްޓަރ ގީލާ އަލީއެވެ.
މި ޕްރޮގްރާމަކީ ގިނަ އިސްރަށްވެހިން އަބަދު ގޭގައި ތިބެންޖެހުމާއި، އިޖުތިމާއީ ހަރަކާތްތަކުން އެކަހެރިވުން ނައްތާލައި، އެފަރާތްތަކަށް އުފާވެރި އަދި ހަރަކާތްތެރި މާހައުލެއް ގާއިމުކޮށްދިނުމަށް ރޭވިފައިވާ ހަރަކާތެކެވެ.
އެޗްޑީސީން ބުނި ގޮތުގައި، މި ޕްރޮގްރާމުގެ ދަށުން ކޮންމެ ހަފްތާއަކުވެސް ތިން ދުވަހު އިސްރަށްވެހިންގެ އުމުރާ ގުޅޭގޮތަށް ރޭވިފައިވާ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތުތައް ކުރިއަށްދާނެ އެވެ. އަދި ”ގޯލްޑަން އަވާ“ގެ ނަމުގައި ހަފްތާއަކު އެއްފަހަރު ނުވަތަ ކޮންމެ ދެ ހަފްތާއަކުން އެއް ދުވަހު އިސްރަށްވެހިންނަށް ހާއްސަ ހަވީރުގެ ސައެއް ބޭއްވުމަށް ހަމަޖެހިފައިވާކަމަށް އެޗްޑީސީން ބުންޏެވެ.
ހަމައެއާއެކު، މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް ވަގުތު ހޭދަކުރުމުގެ ފުރުސަތު ދިނުމާއި، އަހަރުގެ ކޮންމެ ކުއާޓަރަކު އެއްފަހަރު ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުމަށް ރޭވިފައިވެ އެވެ. އަދި ކުޑަކުދިންނާއި ޒުވާނުންނަށް އިސްރަށްވެހިންގެ ފަރާތުން ސަގާފީ މައުލޫމާތު ހިއްސާކުރުމުގެ ހަރަކާތްތައްވެސް މި ޕްރޮގްރާމްގެ ތެރެއިން ކުރިއަށްދާނެއެވެ.
އެޗްޑީސީން ބުނީ މި ހަރަކާތްތަކުގައި ބައިވެރިންގެ ރައްކާތެރިކަމާއި ސިއްހީ ހާލަތަށް ހާއްސަ ސަމާލުކަމެއް ދިނުމުގެ ގޮތުން ދަތުރުފަތުރުގެ އިންތިޒާމުތަކާއި، ސެޝަންތައް ކުރިއަށްދާ ވަގުތު ފަސްޓްއެއިޑްގެ ޚިދުމަތާއި، ބޯފެނާއި އަރާމުކުރާނެ އިންތިޒާމުތައް ހަމަޖައްސާފައި ހުންނާނެ ކަމަށެވެ.
މި ޕްރޮގްރާމަކީ އެޗްޑީސީއާއި ހެލްތް މިނިސްޓްރީގެ އިތުރުން ހުޅުމާލެ ހޮސްޕިޓަލް، ފުލުހުން، ފިޒިއޯ ސޮލިއުޝަންސް، ޕެންޝަން އޮފީސް، އެމްޓީސީސީ، އުރީދޫ އަދި އެކިއެކި ޖަމިއްޔާތަކުގެ އެއްބާރުލުމާއެކު ކުރިއަށްގެންދާ ޕްރޮގްރާމެކެވެ.