މާލޭގައި ޒަމާނީ ފެންވަރުގެ އިތުރު ދެ މިސިތް އިމާރާތްކުރަން ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ހާމަކުރައްވައިފިއެވެ.
ފުރަތަމަ މިސްކިތަކީ މަޖީދީ މަގުގައި ހުންނަ ޒިކުރާ މިސްކިތް ހުރި ބިމުގައި އިމާރާތްކުރާ ޒަމާނީ ފެންވަރުގެ މިސްކިތެވެ. ދެވަނަ މިސްކިތަކީ އެސްޓީއޯ ޕީޕަލްސް ޗޮއިސްއާ ޖެހިގެން ހުންނަ ބަންޑާރަ މިސްކިތް ތަޅާލައި އަޅަން ނިންމާފައިވާ ޒަމާނީ ފެންވަރުގެ މިސްކިތެވެ.
މިނިސްޓަރު ޝަހީމް ވިދާޅުވީ ޒިކުރާ މިސްކިތުގެ ބިންގާ އެޅުން ރަމަޟާން މަހުގެ 27 ވިލޭރޭ އޮންނާނެ ކަމަށެވެ. އަދި މި ދެ މިސްކިތް އިމާރާތްކުރުމުގެ އަމަލީ މަސައްކަތް ރޯދަ މަސް ނިމުމުން ފެށޭނެ ކަމަށް ޝަހީމް ވިދާޅުވިއެވެ.
މި ދެ މިސްކިތް ބިނާކުރަނީ ވެސް ހެޔޮއެދޭ ދެ ފަރާތެއްގެ ދީލަތި އެހީތެރިކަމާއެކުއެވެ.
އަލިސާފު ކުންފުނީގެ ދީލަތި އެހީގައި ވަނީ މަޖީދީމަގުގައި ހުންނަ ޔޫސުފުލް ބަރުބަރީ މިސްކިތް ތަޅާލައި ޒަމާނީ ފެންވަރަށް ބިނާކޮށްފައެވެ. އެ މިސްކިތް ހުޅުއްވައިދެއްވީ ރައީސް ޑރ. މުހައްމަދު މުއިއްޒެވެ.
މީގެއިތުރުން މާފަންނު ބޮޑުގެ މިސްކިތް ތަޅާލައި ޒަމާނީ ފެންވަރުގެ މިސްކިތެއް އިމާރާތްކުރުމުގެ މަސައްކަތް ވެސް މިހާރު ވަނީ ފަށާފައެވެ. އެއީ ވެސް ހެޔޮއެދޭ ފަރާތެއްގެ ދީލަތި އެހީގައި ބިނާކުރާ މިސްކިތެކެވެ.