ދުނިޔޭގެ ކޮންމެ ގައުމެއްގައި ވެސް އަސަސީ ޚިދުމަތްތައް އެ ގައުމެއްގެ ރައްޔިތުންނަށް ފޯރުކޮށްދިނުމަށް އެ ގައުމެއްގެ ސަރުކާރުން ބޮޑު އިސްކަމެއް ދެއެވެ. ކާމިޔާބުކަމާއެކު އެކަން ކުރެވެނީ އެ ޚިދުމަތްތައް ހޯދާ ފަރާތްތަކުން ދައްކާ ފައިސާ އިންނެވެ. ކަރަންޓާއި ފެނުގެ ޚިދުމަތް ފަދަ އަސާސީ ޚިދުމަތް ދިވެހި ރައްޔިތުންނަށް ފޯރުކޮށްދެނީ ވެސް ސަރުކާރުން އެ ޒިންމާ މަތިކޮށްފައިވާ ކުންފުނިތަކުން ވަރަށް ބޮޑެތި ގުރުބާނީތަކެއް ވެގެންނެވެ.
މި ޚިދުމަތްތަކަށް ބިލް ކުރަނީ ކުންފުނިތަކުން އެ ޚިދުމަތް ފޯރުކޮށްދިނުމަށްޓަކައި ބޮޑެތި ހޭދަތަކެއް ކުރަންޖެހޭތީއެވެ. ކޮންމެ ގޭބިސީއަކަށް ހިލޭ ކަރަންޓާއި ފެން ދޫކުރުމަކީ އެއްވެސް ގައުމަކަށް ކުޅަނދާނަވެގެންވާ ކަމެއް ނޫނެނެވެ. އެކަން އެގޮތަށް ކުރަން ފަށައިފިނަމަ ދައުލަތުގެ މާލީ ހާލަތު ދަށްވެ، ގައުމުގެ މިސްރާބު ދާނީ ބަނގުރޫޓުވުމާ ދިމާލަށެވެ.
ބިލްތަކަށް ފައިސާ ނުދެއްކުމަކީ ގެއްލުންހުރި ކަމެއް!
ބިލްތަކަށް ފައިސާ ނުދެއްކުމުގެ އާދައަކީ ދިވެހީންގެ ތެރޭގައި ވެސް އޮންނަ އާދައެކެވެ. ކޮންމެ ޒުވާނެއްގެ އަތުގައި އެންމެ ފަހުގެ އައިފޯނެއް އޮވެއެވެ. އެކަމަކު ކަރަންޓާއި ފެން ބިލް ނުދައްކާ އެތައް ގޭބިސީތަކެއް އެބަތިއްބެވެ.
މިފަދަ ކަންކަން ރާއްޖޭގައި ހިނގާ ކަމާއި އެކަމުން ލިބެމުންދާ ގެއްލުންތައް އޮޑިޓާ ޖެނެރަލް ނެރެފައިވާ ބައެއް އޮޑިޓް ރިޕޯޓްތަކުގައި ވެސް ފާހަގަކޮށްފައިވެއެވެ. އެގޮތުން ވެމްކޯގެ 2020 ވަނަ އަހަރުގެ އޮޑިޓު ރިޕޯޓުގައިވާ ގޮތުން، އެ އަހަރު ވެސް ކުނި އުކައިދިނުމުގެ ހިދުމަތަށް 73.5 މިލިއަން ރުފިޔާ އެ ކުންފުންޏަށް ވަނީ ނުލިބި އެވެ. އެއީ ހަމައެކަނި އެ އަހަރު ނުލިބިވާ ފައިސާގެ އަދަދުތަކެވެ. އޭގެކުރީ އަރާއި އޭގެފަހުގެ އަހަރުތަކުގައި ވެސް ލިބެންޖެހޭ އެތައް މިލިއަން ފައިސާއެއް ނުލިބި އެބަވެއެވެ.
އޮޑިޓް ރިޕޯޓްގައިވާގޮތުން ކުރީ އަހަރުތަކުގައި ވެފައިވާ ގެއްލުންތަކާއެކު، ވެމްކޯއަށް ލިބިފައިވާ ޖުމްލަ ގެއްލުމުގެ އަގު 2020 ވަނަ އަހަރުގެ ނިޔަލަށް 276.4 މިލިއަން ރުފިޔާއަށް އަރާފައިވާކަމަށް އެ ކުންފުނީގެ ހިސާބުތަކުން ދައްކައެވެ.
މިއީ އެންމެ ކުންފުންޏެއްގެ ވާހަކައެވެ. ފެނަކަ ކޯޕަރޭޝަނާއި ސްޓެލްކޯ އާއި އެމްޑަބްލިޔުއެސްސީއަށް ލިބެންޖެހޭ އެތައް މިލިއަން ފައިސާއެއް ވެސް ނުލިބި އެބަވެއެވެ. އެ ފައިސާ ނުލިބެނީ ބައެއް ގޭބިސީތަކުން ބިލްތައް ނުދައްކާތީއެވެ.
ބައެއް ފަރާތްތަކުން ކަރަންޓާއި ފެން ބިލް ދެއްކުން ލަސްކުރާކަން ވެސް ކަމާބެހޭ ކުންފުނިތަކުގެ މާލީ ހިސާބުތަކުން ކަށަވަރުވެއެވެ. މިއީ ވެސް ކުންފުންޏަށް ގެއްލުން ހުރި ކަމެކެވެ. ކުންފުނީގެ އެކި އެކި ޚަރަދުތައް ދެކޮޅު ޖައްސައި ރައްޔިތުންނަށް ދޭ ޚިދުމަތުގެ ފެންވަރު ރަނގަޅުކުރުމަށް ކުރަންޖެހޭ ޚަރަދުތައް ކުރުމަށް ކޮންމެ މަހަކު ލިބެންޖެހޭ ފައިސާ އިން ޚަރަދުކުރާގޮތަށް ޕްލޭންތައް ވަނީ ހެދިފައެވެ. ނަމަވެސް ގަވާއިދުން ނުވަތަ މަހުން މަހަށް ބިލްތަކަށް ފައިސާ ނުދެއްކުމުން ޚިދުމަތުގެ ފެންވަރު ރަނގަޅުކުރުމަށްޓަކައި ކުރަންޖެހޭ މަސައްކަތްތަކަށް ކަނޑައެޅިފައިވާ ވަގުތަށް ނިންމުމަށް ދަތިތަކާ ކުރިމަތިލާންޖެހެއެވެ.
ދީނީގޮތުން ބަލާއިރުވެސް މިއީ ރަނގަޅު ކަމެއް ނޫނެވެ. މިގޮތަށް ނުދައްކާވާ ފައިސާ އަކީ އެ މީހެއްގެ ބޮލުގައި އެޅިފައިވާ ދަރަންޏެކެވެ. ދަރަންޏަކަށް ވަނީ ހަމައެކަނި ނަގާ ލޯނެއް ނޫނެވެ. ބިލްތަކަށް ދައްކަންޖެހޭ ފައިސާ ނުދެއްކުމަކީ ވެސް ދަރަންޏެވެ.
އެހެންކަމުން ކޮންމެ ފަރުދަކު ވެސް އެ މީހެއްގެ ފަރުދީ ޒިންމާ އަދާކުރުމުގެ ގޮތުން އެ މީހަކު ހޯދާ ޚިދުމަތްތަކަށް ދައްކަންޖެހޭ ފައިސާ ގަވާއިދުން ދެއްކުމަކީ ކޮންމެހެން ކުރަންޖެހޭ ކަމެކެވެ.