ހުޅުމާލޭގެ އެޕާޓްމަންޓެއްގައި ރޭ ހިނގި އަލިފާނުގެ ހާދިސާއަކާ ގުޅިގެން ހާލުގައި ޖެހުނު ފަސް މީހަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ.
އެންޑީއެމްއޭއިން ބުނީ މި ހާދިސާ ހިނގާފައިވަނީ ރޭ 23:00 ހާއިރު، ހުޅުމާލެ ފޭސް 1 ގައި ހުންނަ ”ވަން އެވެނިއު“ އިމާރާތުގެ ހަތްވަނަ ފަންގިފިލާގެ އެޕާޓްމަންޓެއްގައި ކަމަށެވެ. މި އަލިފާނުގެ ހާދިސާގައި އެ އެޕާޓްމަންޓުގެ ބަދިގެ ބޭނުން ނުކުރެވޭ ވަރަށް ވަނީ އަނދާފައެވެ.
މި ހާދިސާއާ ގުޅިގެން ވަގުތީ ބޯހިޔާވަހިކަން ފޯރުކޮށްދިން ފަސް މީހުންގެ ތެރޭގައި އުމުރުން ދުވަސްވީ މީހަކާއި، ނޭވާހިއްލުމުގެ އުނދަގޫ ހުންނަ ކުޑަކުއްޖަކު ހިމެނެއެވެ.
މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައެއް ނުވެއެވެ. ނަމަވެސް، އެޕާޓްމަންޓުގެ މުދަލަށް ލިބުނު ގެއްލުންތަކުގެ ތަފްސީލީ އެސެސްމަންޓެއް ހެދުމުގެ މަސައްކަތް އެންޑީއެމްއޭއިން މިހާރު ދަނީ ކުރަމުންނެވެ.