ހުޅުމާލެ ދެވަނަ ފިޔަވަހީގައި ގެދޮރުވެރިޔާ ސްކީމްގެ ދަށުން އިމާރާތްކޮށްފައިވާ ފްލެޓްތައް ކުއްޔަށްދިން މީހަކު 50،000ރ. އިން ޖޫރިމަނާކޮށްފިއެވެ.
އެފްޑީސީގެ އޮފިޝަލަކު ވިދާޅުވީ ލޭބާ ކުއާޓަރު ހަދަން ފުރުސަތު ދިން ފްލެޓްގެ ވެރިފަރާތް 50،000ރ. އިން ޖޫރިމަނާކޮށް، 10 ދުވަހުގެ ތެރޭގައި އެތަން ހުސްކުރަން އަންގާފައިވާ ކަމަށެވެ. އަދި އެ މުއްދަތުގެ ތެރޭގައި އެތަން ހުސްނުކޮށްފިނަމަ އެ ފްލެޓް އަތުލައި އެހެން މީހަކަށް ދިނުމަށް މިނިސްޓްރީއަށް ފޮނުވާނެ ކަމަށް ވެސް އެފްޑީސީން ބުންޏެވެ.
މިފަދަ ފްލެޓްތަކަކީ ދަތިހާލުގައި އުޅޭ ނިކަމެތި ރައްޔިތުންނަށް ސަރުކާރުން އަޅައިދޭ ފްލެޓްތަކެކެވެ. މިފަދަ ފްލެޓްތައް ކުއްޔަށްދިނުމަކީ އެއްބަސްވުމާ ވެސް ޚިލާފު ކަމެކެވެ.
ކުރިއަށްއޮތްތަނުގައި ވެސް ފްލެޓްތައް ކުއްޔަށްދޭނަމަ ފިޔަވަޅު އަޅާނެ ކަމަށް އެފްޑީސީން ބުންޏެވެ.