ކުދި ވިޔަފާރިތަކުގެ ކަންބޮޑުވުންތައް އަޑުއެހުމަށް ސިލްސިލާ ބައްދަލުވުންތަކެއް ބާއްވަން ސަރުކާރުން ނިންމައިފިއެވެ.
އިކޮނޮމިކް މިނިސްޓަރު މުހައްމަދު ސައީދު މިކަން ހާމަކުރެއްވީ އޮތެންޓިކް މޯލްޑިވްސްގެ ހަވަނަ އަހަރީ ހަފްލާގައި ވާހަކަދައްކަވަމުންނެވެ.
ސައީދު ވިދާޅުވީ ވިޔަފާރިތަކަށް ދެވޭ ޚިދުމަތްތައް ހަރުދަނާކުރެވޭނީ، ސީދާ ވިޔަފާރިވެރިންނާ ވާހަކަ ދެކެވި، ކުރިމަތިވާ މައްސަލަތައް ދެނެގަނެވިގެން ކަމަށެވެ. އަދި އެކަން ކުރެވޭނީ ގަވައިދުން ވިޔަފާރިވެރިންނާ ބައްދަލުވެ، ޚިޔާލު ހޯދައިގެން ކަމަށް މިނިސްޓަރު ވިދާޅުވިއެވެ.
އެހެންވެ ކުދި ވިޔަފާރިވެރިންނާއެކު ސިލްސިލާ ބައްދަލުވުންތަކެއް ބާއްވަން ނިންމާފައިވާ ކަމަށް ސައީދު ވިދާޅުވިއެވެ.
ސަރުކާރުން އަންނަނީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް އެސްއެމްއީ ޑިޖިޓަލް މެދުވެރިކޮށް ލޯންތައް ވެސް ދެމުންނެވެ.