ދުބާއީ ޕޯޓްސް ވޯލްޑް (ޑީޕީ ވޯލްޑް)އަށް ތިލަފުށީގައި ހަދާ ބަނދަރު ވިއްކަން އުޅޭކަމަށް ބުނެ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ދެއްކެވި ވާހަކަފުޅު ފިނޭންސް މިނިސްޓަރު މޫސާ ޒަމީރު ދޮގުކުރައްވައިފިއެވެ.
ހއ. ދިއްދޫގައި މިއަދު ހަވީރު އޮތް އެއާޕޯޓު ތަރައްގީކުރުމަށް ބިން ހިއްކުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން ޒަމީރު ވިދާޅުވީ މާލޭގެ ޕޯޓުގެ ވާހަކަ މީޑިއާތަކުގައި އެނބުރޭތާ ދެތިން ދުވަސް ވެއްޖެ ކަމަށެވެ. ނަމަވެސް ހަގީގަތަކީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތް ފަހުން އިގްތިސޯދަށް އައި ހެޔޮ ބަދަލާހުރެ، ދުނިޔޭގެ ވަރަށް ގިނަ ކުންފުނިތަކުން ރާއްޖޭގައި އިންވެސްޓުކުރަން ބޭނުންވުން ކަމަށް ޒަމީރު ވިދާޅުވިއެވެ.
”ޕޯޓަށް ވެސް، އެއާޕޯޓުގައި ހުރި ކަންކަމަށް ވެސް އަދި ދެން ހުރި ކަންކަމަށް ވެސް އިންވެސްޓުކުރަން ބޭނުންވޭ. އެހެންވީމަ މި މީހުންގެ އިންވެސްޓުކުރަން ބޭނުންވީމަ، ކޮންމެ ޕްރޮޕޯސަލެއް ހުށަހެޅިޔަސް [ރައީސް] ބައްލަވާނެ. އޭގެ މާނައަކީ ރައްޔިތުންނަށް ދެރަވާނެ ގޮތަކަށް ރައީސް ކަމެއް ކުރެއްވީކީއެއް ނޫން. ބަޔަކު ޕްރޮޕޯސަލެއް ހުށަހެޅުމަކީ އަދި ރައީސް އެ ގަބޫލުކުރައްވާ އެކަމެއް ކުރީކީއެއް ނޫން،“ ޒަމީރު ވިދާޅުވި އެވެ.
ޒަމީރު ވިދާޅުވީ ފަތުރަމުން ދަނީ ދޮގު ވާހަކަތަކެއް ކަމަށާއި މިހާތަނަށް ވެސް ރައީސް ޑރ. މުހައްމަދު މުއިއްޒު ނިންމުމެއް ނިންމަވާފައި ވަނީ ރައްޔިތުންނަށް އެންމެ ފައިދާވާ ގޮތަކަށް ކަންކަން ބައްލަވާފައި ކަމަށެވެ.
މާލޭގެ ވިޔަފާރި ބަނދަރު ޑީޕީ ވޯލްޑަށް ވިއްކާލަން އުޅޭ ކަމަށް ބުނެ ޔާމީން ވާހަކަފުޅު ދެއްކެވީ ރޭ ބޭއްވި ޕީއެންއެފްގެ ޖަލްސާގައެވެ.