ހުޅުމާލޭ ސެންޓްރަލް ޕާކް ކައިރީ އިމާރާތްކޮށްފައިވާ ކޭ ޕާކް ފްލެޓްތައް ވިއްކުމުގެ ނަމުގައި ގިނަ ބައެއްގެ އަތުން ފައިސާ ނެގިކަމުގެ ތުހުމަތުވާ ހަސަން މަމްދޫހު (މަންޑޭ) ގެއްލިއްޖެއެވެ.
އެ މައްސަލައިގެ އަޑުއެހުމެއް އިއްޔެ ބާއްވަން ތާވަލްކުރިއެވެ. ނަމަވެސް މަންޑޭ ހާޒިރުނުވެގެން މާދަމާއަށް އަޑުއެހުން ފަސްކުރީއެވެ.
މަންޑޭ އިއްޔެ ކޯޓަށް ހާޒިރުނުވުމުން ކްރިމިނަލް ކޯޓުން ވަނީ ބަންދުގައި ބަހައްޓައިގެން މާދަމާ 2:00އަށް އޭނާ ހާޒިރުކުރަން އަމުރެއް ނެރެފައެވެ.
އެ އަމުރާ ގުޅިގެން ފުލުހުން އޭނާ ހޯދަން އުޅެ އުޅެ ނުފެނުނެވެ. އޭނާ ދިރިއުޅޭ ގެއަކު ވެސް ނެތެވެ. ދިޔަތަނެއް އެނގޭ މީހަކު ވެސް ނެތެވެ.
މަންޑޭ ވަނީ ”މާތްﷲއަށްޓަކައި ވެސް ޝަރީއަތް ފަސްކުރަން“ ކޯޓުގައި މީގެކުރިން އެދިފައެވެ.
ކޭޕާކް މައްސަލައިގައި މަންޑޭގެ މައްޗަށް ޖުމްލަ 104 ދައުވާއެއް އުފުލިއެވެ. އޭގެތެރޭގައި ހިމެނެނީ މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަނޫން ލިޔުމެއް ދިނުމުގެ ކުށުގެ 3 ދައުވާ، ޓެކުމުގެ ކުށުގެ 50 ދައުވާ، އޮޅުވާލުމުގެ އަމަލެއް ކުރުމުގެ ކުށުގެ 50 ދައުވާގެ އިތުރުން މަނީ ލޯންޑްރިން ކުށުގެ 1 ދައުވާއެވެ.