ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ އަމާން އުދަރެސްގެ ޓަވަރެއްގައި އަޅާ ޖެނެރަލް ޕްރެކްޓިސް ކްލިނިކް (ޖީޕީ ކްލިނިކް) އަންނަ ފެބްރުއަރީގެ ނިޔަލަށް ނިމޭނެ ކަމަށް ފަހި ދިރިއުޅުން ކޯޕަރޭޝަން (އެފްޑީސީ)އިން މިއަދު ބުނެފިއެވެ.
އަމާން އުދަރެސް ޓަވަރު ހައެއްގައި ޖީޕީ ކްލިނިކެއް ގާއިމްކުރަން ހުޅުމާލެ ހޮސްޕިޓަލާއި އެފްޑީސީއާ ދެމެދު އެއްބަސްވުމެއްގައި ސޮއިކުރީ މިދިޔަ ހަފުތާގެ އަންގާރަ ދުވަހެވެ.
އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، އެ ކުންފުންޏާ ހަވާލުކުރެވިފައި ވަނީ ކްލިނިކް ޑިޒައިންކުރުމާއި ތަރައްގީކުރުން ކަމަށެވެ.
އެކަމުގެ ސަބަބުން އެފްޑީސީގެ ފްލެޓްތަކުގައި ދިރިއުޅޭ ރައްޔިތުންނަށް ސިއްހީ ހިދުމަތް ހޯދުމުގައި ފަސޭހަތަކެއް ލިބޭނެ ކަމަށް ވެސް ހަމްދާން ވިދާޅުވިއެވެ.
”ޖީޕީ ކްލިނިކުގެ މަސައްކަތްތައް ވަރަށް ބާރު ސްޕީޑުގައި ކުރިއަށްއެބަދޭ. އަންނަ ފެބްރުއަރީގެ ނިޔަލަށް އެ ތަނުގެ މަސައްކަތް ނިންމާލެވޭނެ،“ އޭނާ ވިދާޅުވިއެވެ.
ހުޅުމާލެ ދެވަނަ ފިޔަވަހީގައި މިހާރު ވެސް ޖީޕީ ކްލިނިކެއް ހިންގައެވެ. އެއީ ހިޔާ ޓަވަރު 16ގައެވެ. އެތަނުން 24 ގަޑިއިރު ހިދުމަތް ދޭން މިހާރު ވަނީ ފަށާފައެވެ.