ބޮޑު ކަންނެލި މަސްވެރިންގެ ކުރަމުން ދިޔަ މުޒާހަރާގެ ތެރެއިން ހައްޔަރުކުރި ކެންދޫ ދާއިރާގެ މެންބަރު މައުރޫފް ޒާކިރު ފަސް ދުވަހަށް ބަންދުކުރަން ކްރިމިނަލް ކޯޓުން އަމުރުކޮށްފިއެވެ.
މަސްވެރިންގެ ދުވަހުން ފެށިގެން، ބޮޑު ކަންނެލި މަސްވެރިން ކުރަމުން ދިޔަ މުޒާހަރާ ރުޅާލައި މައުރޫފް އާއި ދެ ކެޔޮޅަކާއި ހަތަރު ބިދޭސީއަކު ހައްޔަރު ކޮށްފައިވެއެވެ.
މައުރޫފްގެ ބަންދާ މެދު ގޮތެއް ނިންމަން މިއަދު ހާޒިރުކުރުމުން ވަނީ ފަސް ދުވަހަށް ރިމާންޑް ޖަލެއްގައި ބަންދުކުރަން އަމުރުކޮށްފައެވެ.
އޭނާ ހައްޔަރުކޮށްފައި ވަނީ ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ދައުރު އަދާކުރަން ހުރަސްއެޅި ކަމުގެ ތުހުމަތުގައެވެ.
ރައްޔިތުންގެ މަޖިލީހުގެ އިމްތިޔާޒު ކޮމިޓިން ވަނީ އޭނާ ބަންދުކުރި މައްސަލަ ބަލަން ނިންމާފައެވެ.
ބައެއް މަސްވެރިން މުޒާހަރާ ކުރިޔަސް ސަރުކާރުން އަންނަނީ މަސްވެރިންގެ ކަންބޮޑުވުންތަކަށް ހައްލު ގެނެސްދެމުން ކަމަށެވެ. އެގޮތުން ރައީސް ޑރ. މުހައްމަދު މުއިއްޒުގެ ވައުދާއެއްގޮތަށް މިފްކޯއަށް ކަންނެލި މަސް ގަތުމަށްޓަކައި ފުރިހަމަކުރަންޖެހޭ ކަންކަން ކުރަމުން އަންނަ ކަމަށް ފިޝަރީޒް މިނިސްޓަރު އަހްމަދު ޝިޔާމް ވަނީ ވިދާޅުވެފައެވެ.
މަސްވެރިން ބާނާ މަހަށް ބާރަބަރަށް ފައިސާ ދެއްކޭނެ ގޮތް ހަމަޖައްސައިދެއްވީ ވެސް ރައީސް މުއިއްޒެވެ. މިއީ މިހާތަނަށް ރާއްޖޭގެ ވެރިކަމަށް ވަޑައިގަަތް އެއްވެސް ރައީސަކަށް ކުރެވުނު ކަމެއް ނޫނެވެ.