ސަރުކާރަށް އަހަރެއް ފުރުން ފާހަގަކުރުމަށް މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައު ވާހަކަ ދައްކަވަމުން ރައީސް ވިދާޅުވީ ފަތުރުވެރިކަމުގެ ދާއިރާއިން މިދިޔަ އަހަރު ޖުމްލަ އާމްދަނީގެ ގޮތުގައި 4.5 ބިލިއަން ޑޮލަރު ލިބިފައި ވެއެވެ. އެހެން ނަމަވެސް އޭގެ ތެރެއިން ބޭންކުތަކަށް މާރުކުރީ އޭގެ 1.5 ޕަސަންޓެވެ.
ފަތުރުވެރިކަމުގެ ދާއިރާގެ ވިޔަފާރިތަކުން ވަކި އަދަދަކަށް ދިވެހި ބޭންކުތަކަށް ޑޮލަރު މާރުކުރަންޖެހޭ ގޮތަށް ސަރުކާރުން ނިންމީ ރާއްޖެއަށް ކުރިމަތިވެފައިވާ ބޭރުފައިސާގެ ދަތިކަން ހައްލު ކުރުމަށެވެ. އެއީ ފަތުރުވެރިކަމުން ލިބޭ ޑޮލަރުގެ ގާތްގަނޑަކަށް 20 ޕަސަންޓެވެ.
މި ސަބަބުތަކަށް ޓަކައި ރައީސްވަނީ ޑޮލަރު މާރުކުރަންޖެހޭ ގޮތަށް އޮތް ގަވާއިދު ބަދަލު ނުކުރައްވާނެ ކަމަށް ތަކުރާރުކޮށް ވިދާޅުވެފައެވެ.
”ވަރަށް ސާފުކޮށް މި ދަންނަވަނީ ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނޭ. ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެކޭ. މި ކަން ކުރައްވަން ޖެހިވަޑައިގަންނަވާނޭ“.
”މިއީ ގާނޫނު އަސާސީއާ އެއްގޮތަށް ކުރާ ކަމެއް. އަދި މިކަން އިތުރަށް ތަންފީޒުކުރަން އެހީތެރިވެދީ އެމްއެމްއޭއަށް ފަސޭހަކޮށްދިނުމަށް އެ ކަމަށް ޚާއްސަ ފޮރެކްސް ގާނޫނެއް ވެސް އިރާދަ ކުރެއްވިއްޔާ މަޖިލިސް ތެރެއިން ފާސްކޮށްދޭނަން“
ރައީސްގެ ވާހަކަފުޅުގައި ވަނީ ފަތުރުވެރިކަމުގެ ބާނީންނަށް ޝުކުރު އަދާކުރައްވައިފައެވެ. އަދި މި މަސައްކަތުގައި އެބޭފުޅުންގެ ފުރިހަމަ ތާއީދު ލިބޭނެކަމަށް ގަބޫލުކުރައްވާ ކަމަށް އެމަނިކުފާނު ވިދާޅުވިއެވެ.