ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނިޝާން މުލީގޭ ޢިއްޒަތުގެ ޝަރަފު ދަމާސް ކުންފުނީގެ ވެރިޔާ މުހައްމަދު ސޯލިހަށް އަރުވައިފިއެވެ.
އައްޑޫ ހުޅުދޫއަށް އުފަން މުހައްމަދު ސޯލިހަށް އެ ޝަރަފު އެރުވީ ރާއްޖޭގެ ވިޔަފާރިއާއި އިޤްތިޞާދު ކުރިއެރުވުމުގައި ބައި ޤަރުނަށްވުރެ ދިގު މުއްދަތަކަށް ކުރެއްވި ޚިދުމަތުގެ އަގުވަޒަންކުރެއްވުމުގެ ގޮތުންނެވެ.
ޖުމްހޫރީ ދުވަހުގެ މުނާސަބަތުގައި މިއަދު ބޭއްވި ޖަލްސާގައި ރައީސް މުއިއްޒު ވަނީ ރާއްޖޭގެ ވިޔަފާރީގެ ދާއިރާ ކުރިއަރުވާ، ފަތުރުވެރިކަމުގެ ސިނާޢަތް ކުރިއަރުވާ އިޤްތިޞާދު ބިނާކުރެއްވުމަށް މުޙައްމަދު ސޯލިހު ކޮށްދެއްވި ބުރަ މަސައްތަކުގެ އަގުވަޒަންކުރައްވާ ދިވެހި ދައުލަތުގެ ޢިއްޒަތް ނުވަތަ ނިޝާން މުލީގޭ ޢިއްޒަތުގެ ޝަރަފު އަރުވާފައެވެ.
1951 ވަނަ އަހަރު އައްޑޫގައި ހުރި ރޯޔަލް އެއާފޯސްގައި ޚިދުމަތް ފައްޓަވާ 15 ވަރަކަށް އަހަރު ޚިދުމަތްކުރެއްވިއެވެ. އެންމެ ފުރަތަމަ ކާގޯ ކްލިއަރެންސްގެ މަސައްކަތާއި ކޮންސްޓްރަކްޝަންގެ މަސައްކަތްކުރެއްވިއެވެ. އަދި އެމުއްދަތުގައި އެއްކުރެވުނު ފައިސާއަށް އަލްޓާފްގެ ނަމުގައި ފުރަތަމަ ކުންފުނި އުފައްދަވާ ފަތުރުވެރިކަމުގެ ދާއިރާއިން ޚިދުމަތް ކުރައްވަން ފެއްޓެވިއެވެ. ވޭތުވެދިޔަ އަހަރުތަކުގައިވަނީ ރާއްޖޭގެ ތިމާވެށީގެ ދާއިރާއަށް އިސްކަންދެއްވާ ތިމާވެއްޓާއި ރައްޓެހި ފަތުރުވެރިކަމެއް ތަޢާރަފްކުރެއްވުމުގައި މުހިއްމު މަސައްކަތްތަކެއް ކުރައްވާފައެވެ. ރީޓެއިލް އަދި ހޯލްސޭލްގެ އެކި ވިޔަފާރިތައް ކުރައްވާފައިވާއިރު 2000 ވަނަ އަހަރު ދަމާސް އުފައްދަވާ ވިޔަފާރި ފުޅާކުރެއްވިއެވެ. ރާއްޖެއަށް އެންމެ ގިނަ ފަތުރުވެރިން ޗައިނާއިން ގެނައުމުގައި މުހައްމަދު ސޯލިހުގެ ބުރަ މަސައްކަތް ސަރުކާރުން ފާހަގަކުރައްވައެވެ.
އަތޮޅުތަކުގައި ފަތުރުވެރިކަން ކުރިއެރުވުމަށް އެންމެ ފުރަތަމަ ސަރުކާރުން އުފެއްދެވި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަންގެ ފުރަތަމަ މެނޭޖިންގ ޑިރެކްޓަރުގެ މަޤާމު ފުރުއްވީ ވެސް ސޯލިހެވެ. އަދި އުފަން އަތޮޅުކަމުގައިވާ އައްޑޫގައި ފަތުރުވެރިކަން ތަރައްޤީކުރުމަށް ހެރެތެރެ ވުޖޫދުކުރެއްވުމަށް އިސް ދައުރެއް އަދާކުރެއްވި އެވެ.
ވިޔަފާރިއާއި އިޤްތިޞާދު ކުރިއެރުވުމަށް ބައި ޤަރުނުކޮށްދެއްވި ޚިދުމަތުގެ އަގުވަޒަންކޮށް ދައުލަތުން ވަނީ 2022 ވަނަ އަހަރު ޝަރަފުވެރިކަމުގެ ޤައުމީ އިނާމު އަރުވާފައެވެ. ފަތުރުވެރިކަމުގެ 50 އަހަރު ފާހަގަކުރެއްވުމަށް ބޭއްވި ރަސްމިއްޔާތުގައި ”ޕްރެޒިޑެންޓްސް ޓުރިޒަމް ގޯލްޑް އެވޯޑު“ މުހައްމަދު ސޯލިހަށް އަރުވާފައިވެއެވެ.