ޕޭޕަލް އިން އެމް-ފައިސާ ވޮލެޓަށް ފައިސާ ޓްރާންސްފާ ކުރުމަށް އުރީދޫއިން އެއްވެސް އިތުރު ފީއެއް ނުނަގާ ކަމަށް އުރީދޫ މޯލްޑިވްސް އިން ބުނެފިއެވެ.
އުރީދޫ މޯލްޑިވްސް އިން ބުނި ގޮތުގައި ކަސްޓަމަރުން މިވަގުތު ދައްކަން ޖެހެނީ ހަމައެކަނި ޕޭޕަލްގެ އާންމު ޓްރާންސެކްޝަން ފީއެވެ. ޕޭޕަލް އިން އެމް-ފައިސާ ވޮލެޓަށް ފައިސާ ޓްރާންސްފާ ކުރުމަށް އުރީދޫއިން އެއްވެސް އިތުރު ފީއެއް ނުނަގައެވެ.
”މީގެ މާނައަކީ ބޭރު ގައުމުތަކުގެ ކްލައިންޓުންނާއި، ކަސްޓަމަރުންނާއި، އާއިލާގެ މެންބަރުން ނުވަތަ އެހެނިހެން ވަސީލަތްތަކުން ފޮނުވާ ފައިސާ، ސާފު އަދި ދެފުށް ފެންނަ އަގުތަކެއްގައި ލިބިގަތުމުގެ ފުރުސަތު ބޭނުންކުރާ ފަރާތްތަކަށް ލިބިގެންދިއުން،“ އުރީދޫއިން ބުންޏެވެ.
ޕޭޕަލް މެދުވެރިކޮށް ފައިސާ ލިބޭއިރު ނަގާނީ 1.50 ޔޫއެސް ޑޮލަރުގެ އިތުރުން، ޓްރާންސެކްޝަން ހަދާ ޖުމްލަ އަދަދުގެ 2 އިންސައްތައެވެ.
ކަސްޓަމަރުންގެ ޕޭޕަލް އެކައުންޓުގައި ހުންނަ ފައިސާ އެމް-ފައިސާ ވޮލެޓަށް ބަދަލުކުރުމުގެ ހިދުމަތަށް އުރީދޫއިން މިވަގުތު އެއްވެސް އިތުރު ޗާޖެއް ނުނަގާ ކަމަށް އެ ކުންފުނިން ވަނީ ބުނެފައެވެ.
ފްރީލާންސަރުންނާއި، އަމިއްލަ ވިޔަފާރިވެރިން އަދި ބޭރު ގައުމުތަކުން ފައިސާ ލިބޭ އަމިއްލަ ފަރުދުންގެ އެންމެ ބޮޑު އެއް ކަންބޮޑުވުމަކީ، ފީތައް ކެނޑުމަށްފަހު އެމީހުންނަށް ހަގީގަތުގައި ލިބޭނީ ކިހާ ފައިސާއެއްކަން ސާފުކޮށް ނޭނގުމެވެ.
ފީ ނެގުމުގައި ސާދާ އަދި ދެފުށް ފެންނަ އުސޫލެއް ގެންގުޅުމުން، ކަސްޓަމަރުންނަށް ލިބޭ ފައިސާގެ ސައްހަ ހިސާބެއް ހެދުމަށާއި، މާލީ ކަންކަން މާ ރަނގަޅަށް ބެލެހެއްޓުމަށް މަގުފަހިވެގެންދެއެވެ.
ބޭރުގެ ކްލައިންޓުންނާއެކު މަސައްކަތްކުރާ ފްރީލާންސަރުންނަށް، މީގެ ސަބަބުން ހިދުމަތްތަކުގެ އަގު ކަނޑައެޅުމަށާއި އެއްބަސްވުންތައް ހެދުމުގައި ޔަގީންކަން ލިބިގެންދެ އެވެ. އަދި ކުދި ވިޔަފާރިތަކާއި އަމިއްލަ މަސައްކަތްތެރިންނަށް، ބައިނަލްއަގުވާމީ ބާޒާރުތަކުގެ ކަސްޓަމަރުންނާއެކު މުޢާމަލާތްކުރުމުގައި އިތުބާރު ބޮޑުވެގެންދެ އެވެ.
ބައިނަލްއަޤުވާމީ މުޢާމަލާތްތަކުން ފައިސާ ލިބުމަކީ ހަމައެކަނި ފަސޭހައެއް ނޫނެވެ. މިއީ ދިވެހިންނަށް ދުނިޔޭގެ ޑިޖިޓަލް އިގުތިސޯދުގައި މިއަށްވުރެ ހަރަކާތްތެރިކޮށް ބައިވެރިވުމަށް ލިބޭ ފުރުސަތެކެވެ.
ބޭރުގެ ކްލައިންޓުންނާއެކު މަސައްކަތްކުރާ ގްރެފިކް ޑިޒައިނަރަކަށް ވިޔަސް، ދުރުގައި ހުރެގެން ހިދުމަތްދޭ ސޮފްޓްވެއާ ޑިވެލޮޕަރަކަށް ވިޔަސް، އޮންލައިންކޮށް އާމްދަނީ ހޯދާ ކޮންޓެންޓް ކްރިއޭޓަރަކަށް ވިޔަސް، ނުވަތަ ބޭރުން ފައިސާ ލިބޭ އާއިލާއަކަށް ވިޔަސް، ބައިނަލްއަގުވާމީ ޕޭމަންޓް ހިދުމަތްތަކުގެ ސަބަބުން ދިވެހިންނަށް ގައުމުގެ ބޯޑަރުން ބޭރުގައި ހުރި ފުރުސަތުތަކާ ގުޅުވައިދެ އެވެ.
މިހާރު ހަމަޖެހިފައިވާ އިންތިޒާމުން ދައްކުވައިދެނީ ބައިނަލްއަޤުވާމީ ޕޭމަންޓްތައް ކަސްޓަމަރުންނަށް ފަސޭހައިން ލިބޭނެ ގޮތް ހެދުމަށް ދޭ ސަމާލުކަމެވެ.
މި މަރުޙަލާގައި އިތުރު ޓްރާންސްފާ ފީއެއް ނުނަގައި، އުރީދޫއިން އެހީތެރިވެ ދެނީ ބައިނަލްއަގުވާމީ ބާޒާރުތަކަށް ވަނުމަށާއި ބޭރުން ފައިސާ ހޯދުމަށް މަސައްކަތްކުރާ އަމިއްލަ ފަރުދުންނާއި ވިޔަފާރިތަކަށް ހުރި ހުރަސްތައް ކުޑަކޮށްދިނުމަށެވެ.
ޑިޖިޓަލް ވިޔަފާރި ކުރިއަރަމުންދާ ވަރަކަށް، އަގުހެޔޮ އަދި ދެފުށް ފެންނަ ޕޭމަންޓް ހިދުމަތްތަކަކީ އިގުތިސޯދީ ބައިވެރިވުން އިތުރުކުރުމަށާއި، އަމިއްލަ މަސައްކަތްތެރިކަމަށް އެހީތެރިވުމަށާއި، ޑިޖިޓަލް ވަސީލަތްތައް މެދުވެރިކޮށް ރާއްޖެއަށް އިތުރަށް ބޭރު ފައިސާ ވެއްދުމުގައި މުހިންމު ދައުރެއް އަދާކުރާނެ ކަންކަމެވެ.
ގިނަ ދިވެހިންނަށް، ޕޭޕަލް އަށް ލިބޭ ފައިސާ އެމް-ފައިސާ ވޮލެޓަށް ގެނެވުމަކީ އައު ފުރުސަތުތަކަކަށާއި ދުނިޔޭގެ އެކި ކަންކޮޅުތަކުގައި ތިބި ކަސްޓަމަރުންނަށާއި އިތުރަށް ގުޅިލާމެހިފައިވާ ޑިޖިޓަލް މުސްތަގުބަލަކަށް ހުޅުވިގެންދިޔަ ދޮރެއްކަން އުރީދޫ އިން ފާހަގަކުރެއެވެ.