ބާޒާރުގައި އޮރެންޖް އަގުބޮޑު ކުރިނަމަވެސް އެސްޓީއޯއިން އަގުހެޔޮކޮށް އޮރެންޖް ލިބެން އެބަހުއްޓެވެ.
އޮރެންޖުގެ އަގު ބޮޑުވެފައިވާ ކަމަށް ބުނެ ގިނަ ބަޔަކު އަންނަނީ ކަންބޮޑުވުންފާޅުކުރަމުންނެވެ. މިކަމުގެ ހަގީގަތް ބަލާލިއިރު، އޮރެންޖުގެ އަގުތައް ބޮޑުވީ ހަމައެކަނި ބާޒާރުގައެވެ.
އެސްޓީއޯގެ ފިހާރައަށް ގޮސް ބެލިއިރު، ހެޔޮ އަގުގައި އޮރެންޖު ލިބެންހުރިކަން އެނގުނެވެ. އެސްޓީއޯ ޕީޕަލްސް ޗޮއިސް ފިހާރައިން އޮރެންޖު ކިލޯއެއް ވިއްކަނީ 40 ރުފިޔާގެ ރޭޓުންނެވެ. އެހެންކަމުން އޮރެންޖެއްގެ އަގު ޖެހެނީ ގާތްގަނޑަކަށް 6 ރުފިޔާއަށެވެ.
ބާޒާރުގައި އޮރެންޖުގެ އަގުތައް ބޮޑުވެފައި ވަނީ ރާއްޖެއިން ބޭރުން އަންނަ ޝިޕްމަންޓްތައް ލަސްވުމުގެ ސަބަބުންނެވެ. ލަސްވި ޝިޕްމަންޓްތައް މިހާރު ރާއްޖެ އަންނަން ފަށައިފިއެވެ.
އެމްޕީއެލް އިން ވަނީ ޝިޕްމަންޓްތައް ކްލިއާކުރުމުގެ ދުވެލި އަވަސްކޮށްފައެވެ. އެހެންކަމުން ކުރިއަށް އޮތް ދުވަސްތަކުގައި ބާޒާރުގައި ވެސް އޮރެންޖުގެ އަގު ހެޔޮވާނެ ކަމަށް ބެލެވެއެވެ.