ވިމްބަލްޑަން ޓެނިސް މުބާރާތުގެ އަންހެން އިވެންޓުގެ ޗެމްޕިއަންކަން ޕޮލެންޑްގެ އިގާ ސްވިއަޓެކް ވަނީ ހޯދައިފައެވެ.
ސްވިއަޓެކް މި މުބާރާތުގެ ޗެމްޕިއަންކަން ހޯދީ ފައިނަލުގައި އެމެރިކާގެ އަމަންޑާ އަނިސިމޯވާ އާ ދެކޮޅަށް ކުޅުނު މެޗުގައި 6-0، 6-0 ގެ ނަތީޖާއަކުން ވަރަށް ފަސޭހަ ކާމިޔާބީއެއް ހޯދައިގެންނެވެ.
މި ކާމިޔާބީއާއެކު ސްވިއަޓެކް ވެގެން ގޮސްފައިވަނީ ވިމްބަލްޑަން ޓެނިސް މުބާރާތުގެ ސިންގަލްސް އިވެންޓެއްގެ ޗެމްޕިއަންކަން ހޯދި ޕޮލެންޑުގެ ފުރަތަމަ ކުޅުންތެރިޔާއަށެވެ. ގްރޭންޑް ސްލޭމް މުބާރާތެއްގެ ފައިނަލުގައި ފުރަތަމަ ފަހަރަށް ވާދަކުރި އަނިސިމޯވާއަށް މި މެޗުގައި އެއްވެސް ޕޮއިންޓެއް ނުހޯދުނެވެ.
ޖުމްލަ 57 މިނެޓަށް ދިގުދެމިގެން ދިޔަ މި މެޗަކީ ތާރީޚީ ގޮތުން ވެސް ފާހަގަކޮށްލެވޭ މެޗެކެވެ. މިއީ 1911 ވަނަ އަހަރަށްފަހު ވިމްބަލްޑަންގެ ފައިނަލް މެޗެއްގައި ޕޮއިންޓެއް ނުލިބި ކުޅުންތެރިއަކު ބަލިވި ފުރަތަމަ ފަހަރެވެ. އަދި ގްރޭންޑް ސްލޭމް މުބާރާތެއްގެ ފައިނަލުގައި މިފަދަ ނަތީޖާއެއް އެންމެ ފަހުން ފެނިފައިވަނީ 1988 ވަނަ އަހަރުގެ ފްރެންޗް އޯޕަން ފައިނަލުގައި ސްޓެފީ ގްރަފް އަތުން ނަތާޝާ ޒްވެރޭވާ ބަލިވި މެޗުގައެވެ.
ވިމްބަލްޑަން ޓެނިސް މުބާރާތުގެ ފައިނަލުގައި ފުރަތަމަ ފަހަރަށް ކުޅުނު ސްވިއަޓެކްގެ ކާމިޔާބީތަކަށް ބަލާއިރު، އޭނާ ވަނީ މީގެ ކުރިން ފްރެންޗް އޯޕަން ޓެނިސް މުބާރާތް ހަތަރު ފަހަރު ކާމިޔާބުކޮށްފައެވެ. މި އަހަރުގެ ވިމްބަލްޑަން މުބާރާތް ކާމިޔާބުކުރުމާއެކު އޭނާގެ ގްރޭންޑް ސްލޭމް ކާމިޔާބީތަކުގެ އަދަދު ވަނީ ހަޔަށް އަރާފައެވެ.