އިނގިރޭސި ޕްރިމިއާ ލީގުގެ ލިވަޕޫލް އަށް ކުޅޭ މިސްރުގެ ފޯވާޑް މުހައްމަދު ސަލާހު އެ ކްލަބާއިއެކު ހަދާފައިވާ އެއްބަސްވުމަށް ދެ އަހަރު އިތުރުކޮށްފިއެވެ.
ސަލާ ލިވަޕޫލް އާއިއެކު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާއިރު އޭނާ ލިވަޕޫލް ދޫކޮށްލާނެ ކަމުގެ އަޑުތައް ވަނީ ގަދަވެފައި ވަނިކޮށެވެ. އަދި ދާދި ފަހުންވެސް ސަލާ ވަނީ އޭނާ އަންނަ ސީޒަނުގައި ލިވަޕޫލް އިން ފެނިދާނެކަމާއިމެދު ސުވާލުވެސް އުފައްދާފައެވެ.
އުމުރުން 32 އަހަރު ސަލާ ލިވަޕޫލް އާއިއެކު އިތުރު ދެ އަހަރުގެ އެއްބަސްވުމެއްގައި މިއަދު ސޮއިކުރިއިރު އޭނާ ވަނީ މި ސީޒަނުގައި ހުރިހާ މުބާރާތެއްގައި ލިވަޕޫލް އަށް 32 ލަނޑު ޖަހައިދީފައެވެ.
ސަލާހު އަކީ 2017 ވަނަ އަހަރުގެ އިޓަލީގެ ރޯމާއިން ލިވަޕޫލް އާއި ގުޅުނު ކުޅުންތެރިއެކެވެ. އޭވާ ވަނީ އެ ޓީމަށް މިހާތަނަށް ކުޅެދިން 393 މެޗުގައި އެ ޓީމަށް 243 ލަނޑު ޖަހައިދީ 109 ލަނޑު ޖަހަން މަގު ތަނަވަސްކޮށްދީފަ އެވެ.
ލިވަޕޫލް އާއިއެކު އައު އެއްބަސްވުމެއްގައި ސޮއި ކުރުމަށްފަހު ސަލާ ބުނެފައިވަނީ ލިވަޕޫލްގައި މަޑު ކުރުމަށް އިތުރު އެއްބަސްވުމެއްގައި ސޮއި ކުރެވުމުން އެކަމާ އުފާ ކުރާ ކަމަށެވެ.
”ލިވަޕޫލް އާއިއެކު އިތުރު އަހަރުތަކެއް ހޭދަކުރަން ލިބުމުން އެކަމާ ވަރަށް އުފާ ކުރަން. އަދި އުންމީދު ކުރަނީ މި ވަރުގަދަ ޓީމާއިއެކު އިތުރު މުބާރާތްތަކެއް ކާމިޔާބު ކުރުން. ސަލާހު ބުންޏެވެ.
”ލިވަޕޫލް ގައި އަހަރެން އަށް އަހަރު ހޭދަކޮށްފިން އަދި އިތުރު ދެ އަހަރު މަޑު ކުރަން ފުރުސަތު ލިބުމުން އެކަމާ އުފާ ކުރަން. މިއީ އަހަރެންގެ ކެރިއަރުގައި އެންމެ ކާމިޔާބު އަހަރުތަކުގެ ގޮތުގައި ސިފަ ކުރަން.“ ސަލާ އިތުރަށް ބުންޏެވެ.
ލިވަޕޫލް އިން ސަލާ އާއިއެކު ހަދާފައިވާ އެއްބަސްވުން އައު ކޮށްފައިވާއިރު ޑިފެންޑަރ ވެންޑައިކްގެ އެއްބަސްވުންވެސް އައު ކުރުމުގެ މަސައްކަތް ދެ ފަރާތުން ކުރިއަށް ގެންދާކަމަށް ވެންޑައިކް ވަނީ ބުނެފަ އެވެ.
ނަމަވެސް ޑިފެންޑަރ އެލެކްޒެންޑަރ އާނޯލްޑްގެ އެއްބަސްވުމާއިމެދު ލިވަޕޫލް އިންވެސް އަދި ކުޅުންތެރިޔާގެ ފަރާތުންވެސް ކޮމެންޓެއް ލިބިފައެއް ނުވެއެވެ. މީޑިޔާ ރިޕޯޓްތައް ބުނާ ގޮތުގައި ކުރިއަށް އޮތް ސީޒަނުގައި އާނޯލްޑް ފެނިގެންދާނީ ސްޕެއިންގެ ރެއާލް މެޑްރިޑްއިންނެވެ.