ކޮންމެ އަހަރެއްގެ ފިތުރު އީދާއި ދިމާކޮށް، ބައިބަލާ އެސޯސިއޭޝަނުން އިންތިޒާމު ކޮށްގެން ކުރިއަށް ގެންދާ ”އީދު ބައިބަލާ ޗެލެންޖް 1446″ގެ ފައިނަލުގައި ލޮރެންޒޯ ސްޕޯޓްސް ކުލަބް ބަލިކޮށް ޓީއެފްޓީ ޗެމްޕިއަންކަން ހޯދައިފިއެވެ.
މި މުބާރާތުގައި ޖުމްލަ 29 ޓީމު ބައިވެރިވެފައިވާއިރު، ރޭގައި ކުޅެވުނު ފައިނަލް މެޗުގައި ވާދަވެރި ކުޅުމެއް ވަނީ ފެނިގެން ގޮސްފައެވެ. އެގޮތުން މެޗުގެ ފުރަތަމަ ގޭމުގައި ގުރު ދިމާވެގެން ޓީއެފްޓީ އެތެރޭން ކުޅެފައިވާއިރު، ލޮރެންޒޯ ކުޅެފައިވަނީ ބޭރުންނެވެ.
މި މެޗުގެ ފުރަތަމަ ގޭމުގައި ދެ ޓީމުގައި އެތެރޭން ކުޅެމުންދިޔަ ޓީއެފްޓީން ވަނީ ވިސްނުންތެރި ކަމާއެކު ރޭވިލައިގެން މޮޅު ކުޅުމެއް ދައްކާފައެވެ. މި ގޭމުގައި ބޭރުން އަރަމުން ދިޔަ ލޮރެންޒޯގެ ކުޅުންތެރިން އެތެރޭގައި ތިބި ޓީއެފްޓީގެ ކުޅުންތެރިން ނުބައިކޮށް ލޮރެންޒޯ ކޮޅަށް ގޭމު އަނބުރާލަން ކުރި މަސައްކަތް ވަނީ ކާމިޔާބު ނުވެފައެވެ.
އެގޮތުން ފައިނަލް މެޗުގެ ފުރަތަމަ ގޭމުގެ ވަގުތު ހަމަވެގެން ދިޔައި 9-3 ގެ ނަތީޖާ އަކުން ޓީއެފްޓީ ކުރީގައި އޮވެގެންނެވެ.
ދެވަނަ ގޭމުގައި ލޮރެންޒޯއިން ބޭރުން ކުޅެފައިވާއިރު، ޓީއެފްޓީ ކުޅެފައިވަނީ އެތެރޭންނެވެ. މި ގޭމުގައިވެސް ޓީއެފްޓީގެ ފަރާތުން މޮޅު ކުޅުމެއް ވަނީ ފެނިގެން ގޮސްފައެވެ. މި ގޭމު ނިމެން ތިން މިނެޓަށް ވެފައިވަނިކޮށް ޓީއެފްޓީން ވަނީ 7-7 ގެ ނަތީޖާ އެއްވަރުކޮށް މެޗު ކާމިޔާބުކޮށްފައެވެ.
މީ އީދު ބައިބަލާ ޗެލެންޖުގެ ޗެމްޕިއަންކަން ޓީއެފްޓީން ކާމިޔާބު ކުރި ފުރަތަމަ ފަހަރެވެ.
މި ކުޅިވަރަކީ ޒުވާނުންގެ މެދުގައި މަގުބޫލު މި ކުޅިވަރަކީ ވާދަވެރި ކަމާއެކު ކޮންމެ އަހަރަކު ވެސް ކުރިއަށްދާ ފޯރިގަދަ މުބާރާތެކެވެ.