ލީޑްސް ސެންޓްރަލް އަދި ހެޑިންގްލީގެ ޕާލިމެންޓް މެންބަރު އެލެކްސް ސޯބެލް އަދި ލީޑްސް ސިޓީގެ އެކި ދާއިރާތަކުގެ އިސް ބޭފުޅުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިނގިރޭސިވިލާތައް ކުރެއްވި ދަތުރުފުޅުގައި އެމަނިކުފާނާ ބައްދަލުކުރައްވައިފިއެވެ.
މި ބައްދަލުވުމުގައި ޞިއްޙީ ދާއިރާއާ ގުޅޭ ގޮތުން މަޝްވަރާކުރެވުނެވެ. މިގޮތުން ރައީސް ވަނީ އެކި އިސްނެގުންތަކުގެ މަޢުލޫމާތު ހިއްސާކުރައްވާ، ލީޑްސްގައި ބޭނުންކުރާ ޞިއްޙީ ޓެކްނޮލޮޖީ ބޭނުންކޮށްގެން ދިވެހިރާއްޖޭގައި ޓެލެމެޑިސިން ކުރިއެރުވުމަށް އެހީތެރިވެދެވިދާނެ ގޮތްތަކާ މެދު މަޝްވަރާކުރައްވާފައެވެ.
އަދި ރައީސް ވަނީ ސަރުކާރުގެ ކާބޯތަކެތީގެ ރައްކާތެރިކަމުގެ ލަނޑުދަނޑި ފާހަގަކުރައްވާ، ބޭރުން އެތެރެކުރުމުގެ ބަދަލުގައި ރާއްޖޭގައި ކާބޯތަކެތި އުފެއްދުމަށް ކުރެވޭ މަސައްކަތްތަކުގެ މައްޗަށް އަލިއަޅުވާލައްވާފައެވެ. މިކަމާ ގުޅިގެން ލީޑްސްގެ ވަފުދުން ވަނީ ކާބޯތަކެތީގެ ދާއިރާގައި ފަހަކަށް އައިސް ކުރެވިފައިވާ މަސައްކަތްތަކުގެ މަޢުލޫމާތު ހިއްސާކުރައްވާފައެވެ.
ރައީސް ޑރ. މުޢިއްޒު ވަނީ 2030 ވަނަ އަހަރާ ހަމައަށް ދިވެހިރާއްޖޭގެ ޑިޖިޓަލް އިޤްތިޞާދު ޖީ.ޑީ.ޕީގެ 15 އިންސައްތައަށް އިތުރުކުރުމުގެ ވިޝަން ހާމަކުރައްވާ، އާޓިފިޝަލް އިންޓެލިޖެންސް އަދި ޑިޖިޓަލް ޓްރާންސްފޮމޭޝަންގެ ދާއިރާއިން އެއްބާރުލުން ހޯއްދެވުމަށް ދަޢުވަތު ދެއްވާފައެވެ. އަދި ސަރުކާރުގެ މޮޑެލް ސިޓީގެ މަޝްރޫޢުގެ މަޢުލޫމާތު ދެއްވާ، މި ބާވަތުގެ މަޝްރޫޢުތަކަށް ބައިނަލްއަޤްވާމީ އެހީތެރިކަމާއި މާލީ އެހީ ބޭނުންވާކަން ފާހަގަކުރައްވާފައެވެ.
މީގެ އިތުރުން ފާއިތުވި މަހު ފެށުނު އެންމެ ބޮޑު ސޯލާ ޕެނަލް މަޝްރޫޢުގެ މަޢުލޫމާތު ދެއްވާ، މޫސުމަށް އަންނަ ބަދަލުތަކާ ގުޅިގެން ފިޔަވަޅު އެޅުމަށް ދިވެހިރާއްޖެއިން ކުރާ މަސައްކަތްތައް އަލުން ކަށަވަރުކޮށްދެއްވާ، ބައިނަލްއަޤްވާމީ އެއްބާރުލުމުގެ މުހިންމުކަން ފާހަގަކުރައްވާފައެވެ.
ރައީސް ޑރ. މުޢިއްޒު ވަނީ ދިވެހިރާއްޖޭގެ މުރަކަތަކާއި، ޤުދުރަތީ ރައީސް ޑރ. މުޢިއްޒު ވަނީ ދިވެހިރާއްޖޭގެ މުރަކަތަކާއި، ޤުދުރަތީ ރީތިކަމާއި، ބަޔޯސްފިއަރ ރައްކާތެރިކުރުމަށް ކުރެވޭ މަސައްކަތްތައް ފާހަގަކުރައްވާ، މޫސުމާ ބެހޭ ދިރާސާތައް ކުރުމާއި އަވަސް އިންޒާރުދޭ ނިޒާމުތައް ރަނގަޅުކުރުމާ ބެހޭ ގޮތުން މަޝްވަރާކުރައްވާފައެވެ. އަދި އެމަނިކުފާނު ވަނީ ސާފު ހަކަތައާއި ދެމެހެއްޓެނިވި ގޮތެއްގައި ސިޓީ ރޭވުމުގެ ތަޖުރިބާ ހޯދުމަށް ލީޑްސް ސިޓީއާ މަޝްވަރާކުރައްވާ، މާލެ ސިޓީއަށް ކާބަން މަދު ޢާންމު ދަތުރުފަތުރުގެ ނިޒާމެއް ގާއިމުކުރުމާ ބެހޭ ގޮތުން ވާހަކަދައްކަވާފައެވެ.
މީގެ އިތުރުން ދިވެހި ދަރިވަރުންނަށް ލީޑްސްގެ ޔުނިވަރސިޓީތަކުގައި ކިޔެވުމުގެ ފުރުޞަތުތައް އިތުރުކުރުމާއި، ޔުނިވަރސިޓީއާއެކު އެހެނިހެން ދާއިރާތަކުން އެއްބާރުލުން ހޯދުމުގެ މަގުތައް ބައްލަވާލައްވާފައެވެ.
އެލެކްސް ސޯބެލް އެމް.ޕީ އާއި އެހެނިހެން އިސް ބޭފުޅުން ވަނީ އެކި ޤައުމުތަކަށް ފޯރުކޮށްދޭ އެހީތެރިކަމުގެ ތަފްޞީލު ދެއްވާ، ސާފު ހަކަތަ، ދަތުރުފަތުރު އަދި ސަރުކާރުގެ ޚިދުމަތްތައް ޑިޖިޓަލައިޒްކުރުން ފަދަ ދާއިރާތަކުން އެއްބާރުލުން ދިނުމަށް ތައްޔާރަށް ތިބިކަން ފާޅުކުރައްވާފައެވެ.
މި ބައްދަލުވުން ނިމުނީ ދެ ފަރާތުން ވެސް ވަރުގަދަ އަދި ދެފަރާތަށް ފައިދާހުރި ގުޅުމެއް ބިނާކުރުމަށް އަޒުމު ކަނޑައަޅައި އަލުން ކަށަވަރުކޮށްދެއްވުމާ އެކުގައެވެ.