ސްޕެނިޝް ކޯޕާ ޑެލް ރޭގެ ފައިނަލުގެ ފަހު ޖާގަ އެތްލިޓިކޯ މެޑްރިޑް ބަލިކޮށް ބާސެލޯނާއިން ހޯދައިފިއެވެ.
ރޭގައި މި ދެޓީމުގެ މެދުގައި ކުޅެވުނު ސެމީ ފައިނަލްގެ ދެވަނަ މެޗު ބާސެލޯނާއިން ކާމިޔާކޮށްފައިވަނީ 0-1 ގެ ނަތީޖާއަކުންނެވެ. އެހެންކަމުން ޖުމްލަ 4-5 ގެ ނަތީޖާއިން އެޓީމު ވަނީ ފައިނަލްގެ ޖާގަ ހޯދާފައެވެ. މެޗުގެ ހަމައެކަނި ލަނޑު ކާމިޔާބުކޮށްދިނީ ޔަމާލްގެ އެތީތެރިކަމާއިއެކު ޓޮރެސްއެވެ.
އެތްލެޓިކޯއާ ދެކޮޅަށް ކުޅުނު މެޗުގެ ފުރަތަމަ ހާފުގައި ބާސާއަށް އިތުރު ލަނޑުތަކެއް ޖެހިދާނެ ކަމަށް ބެލެވުނެވެ. ޖުލްސް ކައުންޑޭ، ލަމީން ޔަމަލް އަދި ރަފީންހާއަށް ލީޑު އިތުރުކުރުމުގެ ފުރުސަތު ގެއްލުނެވެ. ނަމަވެސް ދެވަނަ ހާފުގައި އެތްލެޓިކޯ އިން ވަރުގަދަ ކުޅުމެއް ދެއްކިއެވެ.
އެހެންނަމަވެސް އެތްލެޓިކޯއަށް ލަނޑެއް ނުޖެހުނެވެ. އަދި ބާސާ އިން ހުރިހާ މުބާރާތްތަކެއްގައި ވިދިވިދިގެން 21 މެޗު ނުބަލިވެ ކުޅުމުގެ ރެކޯޑު ވަނީ ދަމަހައްޓާފައެވެ.
މިއާއިއެކު ބާސެލޯނާއިން ވަނީ މި ސީޒަންގައި ޓްރެބަލް ހޯދުމުގެ ހުވަފެން ދެކެން ފަށާފައެވެ. މި މުބާރާތުގެ އިތުރުން ޗެމްޕިއަންސް ލީގުގައި އެޓީމަށް ފަސޭހައިން ފައިނަލާއި ހަމައަށް ދެވޭ ގޮތް ވަނީ ކުރިމަތިވެފައެވެ. މީގެ އިތުރުން ލީގުގައި މިހާރުވެސް ބާސެލޯނާ ވަނީ އެއްވަނާގައެވެ. އަދި އަހަރު އެ ޓީމުން ވަނީ ސްޕެނިޝް ސުޕަރކޯޕާ ވެސް ކާމިޔާބުކޮށްފައެވެ.
ބާސެލޯނާއިން ވަނީ 2009 އަދި 2015 ވަނަ އަހަރުވެސް ޓްރެބަލް ހޯދާފައެވެ. މެޗަށްފަހު ބާސެލޯނާގެ ކޯޗު ބުނެފައިވަނީ ”މިއީ ރަނގަޅު ވަގުތެއް، އެކަމަކު އަހަރެންނަކީ ތަޖުރިބާކާރެއް، އަހަރެންނަށް އެނގޭ ކިހާ އަވަހަކަށް ކަންކަން ބަދަލުވެދާނެކަން،“ ފްލިކް މެޗަށްފަހު ބޭއްވި ނޫސްވެރިންގެ ބައްދަލުވުމުގައި ބުންޏެވެ.
އެކަމަކު ފްލިކް އެހާ ދުރަށް ނުބަލައެވެ. ބާސާ އަށް އެއަށްވުރެ ކުރިން ލީގުގެ 4 މެޗެއް ކުޅެން ޖެހޭނެއެވެ. އެގޮތުން ހޮނިހިރު ދުވަހު ގޭގައި ރިއަލް ބެޓިސް އާ ދެކޮޅަށް ކުޅެން ޖެހޭއިރު، އޭގެ ފަހުން ޗެމްޕިއަންސް ލީގުގައި ޑޯޓްމުންޑާ ދެކޮޅަށް ކުޅެން ޖެހެއެވެ.
”އަހަރެން މިއުޅެނީ މިހާރުގެ ވަގުތުގައި، މާޒީ ނުވަތަ މުސްތަޤުބަލުގައެއް ނޫން،“ އޭނާ އިތުރަށް ބުންޏެވެ.
”ކްލާސިކޯއެއް، އާނ އެއީ ވަރަށް ރަނގަޅު، އެކަމަކު އަޅުގަނޑުމެން އެއަށްވުރެ ކުރިން ވަރަށް ގިނަ މެޗުތަކެއް ކުޅެން ޖެހޭނެ. އަހަރެންނަށް، އަހަރެންގެ ހިތުގައި، އެއަށްވުރެ މުހިންމު އެހެން ހުރިހާ ކަމެއްގެ ފަހަތުގައި އެކަން އޮތީ. އަހަރެންނަށް، މިހާރު އެއީ މުހިންމު ކަމެއް ނޫން.“
ލަލީގާގެ އެއްވަނަ އަދި ދެވަނައިގައި އޮތް ބާސާ އާއި މެޑްރިޑް އެންމެ ފަހުން ކޯޕާ ފައިނަލުގައި ބައްދަލުކުރީ 2014 ގައެވެ. މި އަހަރުގެ ބައްދަލުވުން އޮންނާނީ 26 އޭޕްރިލްގައި ސެވިއްޔާގެ އެސްޓަޑިއޯ ލާ ކަރްޓުޖާގައެވެ.