ވޯލްޑް ކަޕް ކޮލިފައިންގ މެޗެއްގައި އެންމެ ބޮޑު ވާދަވެރިޔާ އާޖެންޓީނާއާ ދެކޮޅަށް 4-1 އިން ބަލިވުމާ ގުޅިގެން ބްރެޒިލްގެ ކޯޗު ޑޮރިވަލް ޖޫނިއަރ ވަކިކޮށްފިއެވެ.
ވޯލްޑް ކަޕް ކޮލިފައިންގައި ދެކުނު އެމެރިކާގެ ގްރޫޕްގައި ބްރެޒިލް އޮތީ ހަތަރުވަނާގައެވެ. އެޓީމު މިހާތަނަށް ކުޅުނު 14 މެޗުން 5 މެޗުން ވަނީ ބަލިވެފައިވެއެވެ. ނަމަވެސް ބްރެޒިލަށް އަދިވެސް 2026 ގެ ވޯލްޑް ކަޕަށް ކޮލިފައި ވުމުގެ ފުރުސަތު އެބައޮތެވެ.
ބްރެޒިލްގެ ގިނަ ކްލަބްތަކުގެ ކޯޗުކަން ކޮށްފައިވާ 62 އަހަރުގެ ޑޮރިވަލް ޤައުމީ ޓީމުގެ ކޯޗުކަމުގައި ހުރީ 2024 ގެ ޖެނުއަރީ މަހުން ފެށިގެންނެވެ.
އޭނާގެ ފުރަތަމަ މެޗަކީ ވެމްބްލީގައި އިނގިރޭސިވިލާތާ ދެކޮޅަށް ކުޅުނު ރަޙްމަތްތެރިކަމުގެ މެޗެއްގައި 1-0 އިން ކާމިޔާބުކުރި މެޗެވެ. އޭނާގެ ދަށުން ކުޅުނު 16 މެޗުން 7 މެޗު ކާމިޔާބުކޮށް، 6 މެޗު އެއްވަރުކޮށް، 3 މެޗުން ވަނީ ބަލިވެފައިވެއެވެ.
ނަމަވެސް ވޯލްޑް ކަޕަށް ކޮލިފައިވެފައިވާ އާޖެންޓީނާއާ ދެކޮޅަށް ބޮޑު ސްކޯއަކުން ބަލިވުމާ ގުޅިގެން ބްރެޒިލްގެ ފުޓްބޯޅަ އެސޯސިއޭޝަން (ސީބީއެފް) އިން އޭނާ ވަކިކުރިކަން އިޢުލާންކޮށްފިއެވެ.
”ބޯޑުން އޭނާގެ ކުރިއަށް އޮތް ކެރިއަރަށް ކާމިޔާބު އެދެމެވެ. މިހާރުން ފެށިގެން ސީބީއެފް އިން އޭނާގެ ބަދަލުގައި މީހަކު ހޯދުމަށް މަސައްކަތްކުރާނެއެވެ.“ ސީބީއެފް ގެ ކުރު ބަޔާނެއްގައި ބުނެފައިވެއެވެ.
ބްރެޒިލްގެ މީޑިއާތަކުން ބުނާ ގޮތުގައި، އަލް-ހިލާލްގެ ކޯޗު ޖޯޖް ޖީސަސް އަކީ ބްރެޒިލްގެ ކޯޗުކަމަށް އެންމެ ބޮޑަށް އަންނާނެ ކަމަށް ބެލެވޭ ފަރާތެވެ.
ޑޮރިވަލް ހަވާލުކުރުމުގެ ކުރިން ބްރެޒިލުން ވަނީ ރިއަލް މެޑްރިޑްގެ ކޯޗު ކާލޯ އެންސެލޮޓީ ގެނައުމަށް މަސައްކަތްކޮށް ނާކާމިޔާބުވިއެވެ.
ދި އެތްލެޓިކް އިން ބުރާސްފަތި ދުވަހު ރިޕޯޓުކުރި ގޮތުގައި 2026 ގެ ވޯލްޑް ކަޕުގައި ބްރެޒިލްގެ ކޯޗުކަން ކުރުމާ ބެހޭ ގޮތުން އެންސެލޮޓީއާ ވާހަކަދައްކަން ބްރެޒިލް ބޭނުންވާ ކަމަށް ބުނެފައިވެއެވެ.