އިސްރާއިލުން ރިޕޯޓުކުރާ ގޮތުގައި، ހޯމަ ދުވަހުގެ ރޭ ޖެރޫސަލަމްގައި ހުންނަ އެ ޤައުމުގެ ބޮޑުވަޒީރުގެ ގެއާއި ކައިރީގައި އިސްރާއީލު މީހުން ވަނީ އެއްވެފައެވެ. މިއީ އެ ޤައުމުގެ އެތެރޭގެ ސަލާމަތީ އިސްވެރިޔާ ރޯނެން ބާރު ވަޒީފާއިން ވަކިކުރަން ކުރާ މަސައްކަތާއި ޣައްޒާގައި ހިފަހައްޓާފައިވާ މީހުން ދޫކޮށްލުމަށް އެދި ކުރި އިހުތިޖާޖެކެވެ.
ބާރު ވަޒީފާއިން ވަކިކުރުމުގެ މަސައްކަތް ހުކުރު ދުވަހު ސުޕްރީމް ކޯޓުން ހުއްޓުވާލުމާ ގުޅިގެން، ނެތަންޔާހޫގެ ސަރުކާރުން އެޓަރނީ ޖެނެރަލް ވަޒީފާއިން ވަކިކުރުމުގެ މަސައްކަތް ވަނީ ފަށައިފިއެވެ.
60 އަހަރުގެ ޔުނިވަރސިޓީ މުދައްރިސާ ތަމާރާ ހެސް ބުނަނީ ނެތަންޔާހޫގެ ސަރުކާރުން ޤާނޫނަށް އިހުތިރާމް ނުކުރާތީ ކަންބޮޑުވާ ކަމަށެވެ.
”މިއީ ވަރަށް ކަންބޮޑުވާންޖެހޭ ކަމެއް، މިހާތަނަށް ނުފެންނަވަރުގެ ކަމެއް ސަރުކާރުން ޤާނޫނަށް އިޖާބަ ނުދިނުމަކީ. އަހަރުމެންގެ ރަސްމީ ސަރުކާރުން ބުނަނީ އެމީހުން ފަނޑިޔާރުންނަށް އިޖާބަ ނުދޭނެ ކަމަށާއި، ޤާނޫނު އެއްފަރާތްކޮށް އެމީހުންނަށް އަމިއްލައަށް ޤާނޫނު ހެދިދާނެ ކަމަށާއި އެމީހުން ޤާނޫނަށްވުރެ މަތީގައި ތިބޭނެ ކަމަށް،“ އޭނާ އޭއެފްޕީ ނިއުސް އޭޖެންސީއަށް ބުންޏެވެ. ”އަހަރުމެން ބިރުގަންނަނީ މުޅި ދައުލަތް މިކަމުގެ ސަބަބުން ފުނޑުފުނޑުވެގެން ދާނެތީ.“
ސުލްހަވެރިކަމަށް މަސައްކަތްކުރާ ޖަމާޢަތެއް ކަމަށްވާ ސްޓޭންޑިންގ ޓުގެދަރގެ މެންބަރެއް ކަމަށްވާ ރަފާއެލް އަރކޭޑް މި ހާދިސާތައް ސިފަކުރެއްވީ އިސްރާއީލުގެ ޑިމޮކްރަސީ ނައްތާލުމަށް ކުރާ މަސައްކަތެއްގެ ގޮތުގައެވެ.
”މިއަދު މި ޤައުމުގައި ހިނގަމުންދާ ކަންތައްތަކަކީ ސާފުކޮށް ހުރިހާ ޑިމޮކްރެޓިކް މުއައްސަސާތަކެއް ހަލާކުކޮށް ނައްތާލުމަށް ކުރާ މަސައްކަތެއް، އަދި އޮކިއުޕޭޝަން ޕްރޮޖެކްޓުގެ ބައެއްގެ ގޮތުގައި ކުރިއަށް ގެންދާ މަސައްކަތެއް، މީހުން މެރުމުގެ ޕްރޮޖެކްޓެއް، ހަނގުރާމައިގައި ހިފަހައްޓާފައިވާ މީހުން ދޫކޮށްލުމުގެ ޕްރޮޖެކްޓެއް، މި ހުރިހާ ކަމަކީވެސް އެއް ޕްލޭނެއްގެ ބައިތަކެއް،“ އޭނާ ބުންޏެވެ.