މެޑިކަލް އިންޓާންޝިޕް ހެދުމުގެ ޖާގައަށް ހައްލު ހޯދައިދިނުމަށް ބޭރުގެ ފަސް ހޮސްޕިޓަލަކުން ދިވެހި ޑޮކްޓަރުންނަށް ފުރުސަތުތައް ފަހިކޮށްދީފިއެވެ.
މިކަމާއި ގުޅިގެން ސިއްޙީ ވުޒާރާއިން މިއަދު ބުނީ ރާއްޖޭގައި ވެސް އިންޓާންޝިޕް ފުރުސަތު އިތުރަށް ފުޅާކުރަން މަސައްކަތް ކުރާ ކަމަށެވެ. އޭގެ ތެރެއިން، ސަރުކާރުގެ އިތުރު ހޮސްޕިޓަލްތަކުގައި އިންޓާންޝިޕް ފެށުމަށް ތައްޔާރުވަމުން އަންނަ ކަމަށް ބުންޏެވެ.
ރާއްޖެއިން އިންޓާންޝިޕް ހަދަން ފުރުސަތު ނުލިބޭތީ އެމްބީބީއެސް ހެދުމަށްފަހު ގިނަ ޑޮކްޓަރުން ދަނީ ބަންގްލަދޭޝަށެވެ. ނަމަވެސް، މީގެ ކުރިން ހަމައެކަނި އެ ފުރުސަތު ލިބެނީ ޗިޓަގޮންގް މެޑިކަލް ކޮލެޖު ހޮސްޕިޓަލުން އަދި ޝޭރް-އޭ-ބަންގްލާ މެޑިކަލް ކޮލެޖް ހޮސްޕިޓަލުންނެވެ.
ހެލްތުން ބުނީ ފޮރިން މިނިސްޓްރީއާއެކު ކުރި މަސައްކަތުން ދިވެހިންނަށް އިތުރު ފަސް ކޮލެޖެއްގައި މެޑިކަލް އިންޓާންޝިޕް ފުރިހަމަކުރުމުގެ ފުރުސަތު މިހާރު ފަހިވެފައިވާ ކަމަށެވެ. އެއީ؛
– ސިލެޓު އެމްއޭޖީ އޮސްމާނީ މެޑިކަލް ކޮލެޖު
– މައިމެންސިންހު މެޑިކަލް ކޮލެޖު
– ރަޖްޝާނީ މެޑިކަލް ކޮލެޖު
– ޝަހީދު ޒިއައުރު ރަހުމާން މެޑިކަލް ކޮލެޖު، ބޮގުރާ
– ކޮކްސަސް ބާޒާރު މެޑިކަލް ކޮލެޖު
އެ ފަސް ކޮލެޖަކީ ވެސް ދެ ގައުމުގެ މެޑިކަލް އެންޑް ޑެންޓަލް ކައުންސިލުން ގަބޫލުކުރާ ތަންތަނެވެ. މިނިސްޓްރީން ވަނީ އިންޓާންޝިޕް ޖާގަ ހޯދަން ބޭނުންވާނަމަ training@health.gov.mv އަށް އީމެއިލް އިން ރިކުއެސްޓް ފޮނުވަން އެދިފަ އެވެ.
ސަރުކާރުގެ ހޮސްޕިޓަލެއްގައި އިންޓާންޝިޕް ހަދަމުން އަންނަނީ އައިޖީއެމްއެޗުގައި އެކަންޏެވެ. ނަމަވެސް، އެ ހޮސްޕިޓަލުން ވަނީ ރާއްޖޭގައި ކިޔަވާ ދަރިވަރުންނަށް އިސްކަންދޭ ގޮތަށް އިންޓާންޝިޕްގެ ޖާގަ ދޭން ނިންމައިފަ އެވެ. އޭގެ ފަހުން، ހެލްތު މިނިސްޓްރީން އެދިގެން އޭޑީކޭއިން ވަނީ އިންޓާންޝިޕް ފަށައިފަ އެވެ. ނަމަވެސް، އެ ހޮސްޕިޓަލުގައި އެއް އަހަރުގެ އިންޓާންޝިޕް ނިންމަން ޑޮކްޓަރުން އަމިއްލައަށް މަހަކު 14،500ރ. ދައްކަންޖެހެ އެވެ.